「而家啲人上Youtube睇嘢，淨係想嘻嘻哈哈開開心心㗎咋。」但你有無試過，睇Youtube睇到喊？
我試過，都係睇同一Youtube Channel香城映画兩條短片而喊。
「我拍出嚟，其實係Remind自己唔好麻木。」
一年前，本地Youtube Channel香城映画發表《下週同樣時間再見》，當時佢哋仍處於叫好不叫座階段。片中表面談及Youtuber為流量抑或為自己而拍嘅心理爭扎，藉著一場Channel內部會議，眾成員就一條原本打算拍攝嘅短片，發表不同意見，背後其實代表著唔同類型香港人，如何應對當下呢個香港。
雖然香城一姐阿讚同「我覺得應該要拍嘅」，但最後，香城主腦趙羅尼決定都係唔拍喇，下星期先出片；然後Radiohead嘅《No Surprises》響起，眾成員各自回到自己生活日常，「Bruises that won't heal / You look so tired, unhappy」，英倫經典Britpop音樂，結合香港此情此境，不禁已令我眼濕濕。
原來，香城映画拍一條短片話俾大家聽，佢哋最後無拍到一條短片。
香城映画主腦趙羅尼，10年前曾拍攝《公屋潮文：公屋．居屋．私樓》大熱短片，View數至今累積過百萬。3年前，他嘗試眾籌開拍電影《堅尼地道殺人事件》但失敗，後來促成佢同何笑等人開設香城映画再戰Youtube。
「不如我哋Send個Song List俾大家。」
香城映画Thumbnail圖片不時會加上一堆模仿影展得獎Logo，代表趙羅尼對電影嘅夢想同執著；早期亦會喺片頭片尾以一段重金屬音樂做Intro同Outro，令我覺得佢哋音樂上係會「有啲嘢」。果不其然，香城第2條正式短片《背景音樂情人》，分別用上林家謙翻玩陳百強經典《有了你》、韓國BTS《Euphoria》、以及王菲90年代Cantopop名作《夢中人》做「背景」，幽默道出中年男女同年輕世代溝通（及溝女溝仔）嘅困難。當然，對英倫樂迷而言，《夢中人》原作、The Cranberries嘅《Dreams》，先至係我哋心目中嘅「背景音樂情人」！
「下一秒，我都唔知會發生咩事㗎。」
早期嘅香城映画，的確創意無限。一連四集《喂！趙羅尼！》系列，講廢中趙羅尼接連重遇多位小學同學，發生種種荒誕抵死妙事，結局一集卻反轉180度言志，更有早前爆紅嘅咖喱飾演趙羅尼太太，無論選角到劇情推進，皆在鼓勵人到中年嘅每一位，就算一事無成，亦唔好失去信念。最後一幕咖哩深情望著趙羅尼漸漸離開鏡頭，隨即響起80年代著名女歌手Belinda Carlisle嘅《Heaven Is A Place On Earth》，音樂完美結合結局，兩者成為Perfect Match！
「佢話唔會陪我捱麥記，因為自己煮仲平。」
實在佩服香城映画獨具慧眼（揀女眼光獨到），早喺咖喱走紅前已搵佢拍片。《不會捱麥記的女人》同樣由佢做女主角；劇情同《喂！趙羅尼！》系列一樣，再次由悲轉喜，再次引證男人身邊有一個好老婆，真係好重要！結尾採用美國獨立樂隊The Know一曲《143》同樣襯到絕，趙羅尼揀歌確有一手。佢更透露當日自己膽粗粗Inbox樂隊能否徵用呢首歌，獲對方一口答應，果然好片有好報！也要多謝呢條片令我認識The Know，佢哋屬新世代Dream-Pop樂隊，音樂飄吓飄吓十分「榮」，但結他音牆唔算太吵耳，配上甜美女聲，非常易入口！
香城映画其他高質選曲，仲有Radiohead《Creep》@《脫毒工程2024》、The Pretenders《I'm A Mother》@《帶老母返工》、The Police《Every Breath You Take》@《愛情重口味》、Blonde Rehead《For The Damaged Coda》@《都市職業病：YouTuber》……至於惡搞MK活地亞倫嘅《十分愛》，理所當然出現吳雨霏《愛你變成恨你》。將王家衛《春光乍洩》變成地踎版嘅《春光咋舌（BL雷厲風行修正版）》，最後當然要播返首《Happy Together》作結。另外本人相當欣賞《電影騷媚》，雖然無特別挑選歌曲做BGM，但全片挑選多套經典電影橋段玩轉再玩轉，再串連成一個完整扭橋故事，勁！女主角戴妙珊演出亦十分正（再次證明香城揀女眼光獨到）！
「我哋真係相逢恨晚啊。」
近日，香城映画憑食正全城熱話嘅新片《何伯揚名燉湯（未開業）》而爆紅；上下兩集《執笠潮》同樣極多人討論。上集《執笠潮之亂世兒女》Twist位確實有趣，但估唔到下集《執笠潮之不租之客》還可以再扭橋，結尾播出David Bowie《The Man Who Sold The World》更令人拍案叫絕。但其實舊片《編劇生存法則》及《新肉食主義》已玩過同類型黑色荒謬重口味，可說一脈相承。《編劇》一片Ending就揀咗Gun N' Roses《Used To Love Her》，亦有異曲同工之妙！
「我終於明白，點解佢哋都唔願意講過去嘅事。」
恭喜香城映画Youtube訂閱人數早前剛破10萬，稍後亦會舉行首次Fans聚會，佢哋終於獲得同短片質素成正比嘅支持讚賞，可喜可賀。「到我哋真係做大咗有人要養，你覺得我仲敢拍咩。」但無論如何，我會永遠感謝你哋拍過《下週同樣時間再見》，仲有《流浮山刀手》、《嚴厲譴責》、《飛越瘋人院》系列，以及《德仔 - 1994年皇室堡劫案倖存者的自白》。
《德仔 - 1994年皇室堡劫案倖存者的自白》以偽紀錄片（Mockumentary）拍攝，用上90年代New Age樂隊Secret Garden一曲《Adagio》做配樂。不同於試當真嘅癲佬認真廢噏Mocku，香城映画將周星馳《國產凌凌漆》角色德仔幻化成有血有肉真實人物，由90年代佢親眼目睹爸爸喺皇室堡被悍匪槍殺講起，再借佢2014年遇意外後失憶，回看過去10年香港種種變遷。10年時間，真係可以發生好多好多事，「有人會選擇逃避，有人會選擇正常生活，有人甚至會選擇忘記」，睇到呢度，實在已忍唔住流下眼淚。
「翌年，德仔重返香港生活，並改名換姓，過著不問世事的生活。」或者，佢同《流浮山刀手》入面嘅阿泰一樣，淨係想一個人留喺流浮山，一個人靜靜地生活。可以嗎？
