我對台灣樂隊風籟坊嘅記憶，主要嚟自佢哋嘅結他音色。
風籟坊大約喺十幾年前出道，低調地推出過兩張《Demo甲》同《Demo乙》E.P.；話係Demo，只係自謙，其實錄音製作非常唔錯，佢哋用非常英倫結他流行曲嘅模式唱台語，某啲作品比Britpop更好聽。好似《長途電話》，一直覺得佢係Radiohead介乎《The Bends》同《OK Computer》之間風格嘅作品，嗰啲結他聲音，就好似藏住千言萬語咁。兩張E.P.後，佢哋發表過另一首《別人的歌》，亦玩咗一啲live，然後大概喺2013年左右嘅時間，悄然無聲告別。再然後，佢哋喺2018年悄然回歸。
活喺大數據網絡年代，風籟坊嘅Facebook page早已沉底多時。台灣以外嘅樂迷，的確好難得知佢哋重組。好在，思憶總比忘掉永久，間中總會拎返《長途電話》出嚟聽；因為呢份念念不忘嘅loyalty，我搵返風籟坊嘅Facebook page，亦多得社交網絡嘅互動，從前只係默默支持佢哋嘅CD-Rom歌迷，而家亦同樂隊成員聊起天來。我會永遠感謝你哋對我（哋）嘅祝福。
寫咗咁多，其實我想講乜？我仍然唔太肯定。或者我係想表達，呢篇文章，喺每日如汪洋嘅Facebook post大海中，好快會被新嘅掩沒；佢喺Facebook系統入面，只係一堆符號同數字。但我唔想就咁樣，我希望呢篇文章係有佢嘅獨特存在價值，起碼對我嚟講。
風籟坊今次重組，係希望完成當年未圓嘅計劃——推出《Demo丙》。事實上碟內歌曲當年已寫好錄好（包括《別人的歌》），只係計劃其後被擱置，成員Chris、戴子、泰元放下樂團，各有自己發展。人大了，時機亦到了，三年前佢哋再次行返埋一齊玩live，開始重製《Demo丙》；後嚟泰元因病退出，由Chris嘅大學學長阿貴補上。喺度祝願泰元重拾健康，日後可以同戴子同Chris一齊行山。
《Demo丙》入面嘅作品，其實係差不多十年前嘅舊歌，如今重見天日，你可以話佢哋已過時，亦可以話一啲都唔過時——風籟坊無隨波逐流，刻意為歌曲注入乜嘢新世代元素，佢哋嘅音樂，從來都係咁樣，無變過。因為無變過，我認為《Demo丙》先能經得上時間考驗，超越咗時代更替。今日聽住碟入面嘅作品，我諗起嘅唔再係Radiohead，而係The House of Love，嗰份濃濃嘅Indie Rock氣味、時而爽勁時而沉靜時而失真嘅結他音色，無論放喺邊一個時代，都一樣充滿生命力，同動聽。
要講《Demo丙》最愛嘅歌曲，我會揀無收錄喺實體黑膠、只係喺數碼版出現嘅《海》。《海》係佢哋舊年創作嘅新歌，音樂上就同樂隊其他作品一樣無「新意」，頂多喺尾段少有地加入合成器演奏（但唔係為加而加，而係配合歌曲嘅氣氛編排而加），為風籟坊樂迷帶嚟點點新鮮感。我鍾意《海》，佢唔單止令我諗起The House of Love，仲有Breathless，係好Classic、好長青嘅英倫Nosiy結他流行曲格式；我鍾意歌曲嘅起承轉合，能感受到樂隊眾人同監製老王（王昱辰）的默契，仲有佢哋之間嘅密切關係。我鍾意副歌歌詞：「海底有吃人的黑暗，亦有美麗的眠夢。」一針形容出世界嘅兩面，水能載舟，亦能覆舟，就睇我哋每個人，選擇以邊一面去應對世界嘅殘酷。
我鍾意《海》，佢代表住今天嘅風籟坊，仍然同昨天、將會同明天一樣，從來無變過。「看船火閃閃爍爍，流星來來去去。」世上有無數出色樂隊來來去去，我希望我鍾意嘅樂隊，唔止我一人聆聽到。佢哋嘅閃爍光芒，會有其他人睇到，同記住。
（原文2021年5月12日喺「紳吟」Facebook上載）
