每個年代，都有代表佢哋嘅音樂。回首80年代，你會諗起乜？我馬上會諗到New Romantic / Synth-Pop。無錯，我係嗰種一聽到叮叮噹噹電子琴音，就會興奮得跳起嘅人。
點解我會喜愛New Romantic / Synth-Pop？呢度我要多謝一個人，商台DJ陳家樂。
記得自己90年初開始聽外國流行音樂時候，好鍾意狄柏之舞、寵物店男孩、新秩序等英倫樂隊；讀《年青人周報》亦認識返好多新浪漫名字如杜倫杜倫、也叔、Ultravox、Visage等等，對佢哋嘅音樂感到好奇。
不過讀書時候零用錢唔多，無理由一次過買晒以上樂隊嘅Cassttee返屋企聽（家中無黑膠唱盤）。於是電台便成為我接觸英文歌其中一個重要Channel。黃志淙、梁兆輝、陳輝虹我都鍾意聽（後嚟佢哋三人一齊主持「豁達音樂天空」）。不過印象最深刻一位，始終係陳家樂。
仍然清楚記得，90年代初某一晚，自己一個乖乖坐喺收音機前，收聽陳家樂一個新浪漫節目特輯，同步錄落Cassette，之後成日重溫。雖然餅帶已唔知去咗邊，但多得現今串流平台盛行，我可以憑藉記憶，重組當晚節目成為Playlist。
節目應該全長2小時，理所當然播出多首極具代表性嘅New Romantic / Synth-Pop經典，包括狄柏之舞《See You》、OMD《Enola Gay》、杜倫杜倫《Save A Prayer》、Ultravox《Vienna》、Visage《Fade To Grey》、也叔《Nobody’s Diary》、Philip Oakey ＆ Giorgio Moroder嘅《Together In Electric Dream》（電影《鬼馬電腦追女仔》主題曲）。開場曲就選上ABC非常搶耳兼煞食嘅《The Look Of Love》。
節目入面有3首選曲，令我留下極深刻印象，分別係B-Movie《Nowhere Girl》嘅新浪漫混音版本、A Flock Of Seagulls《Wishing (If I Have A Photograph Of You)》，以及The Assembly《Never Never》。前兩者仿如同根生，帶有行雲流水鍵琴 / Synth彈奏、非常多嘢聽嘅豐富Hidden Tracks編排，亦不約而同加入結他 / 電結他彈奏，全都構成並奠定我所喜愛嘅新浪漫音樂風格。而《Never Never》，就係我聽過最傷感嘅New Romantic / Synth-Pop作品。
三拍子Sad & Magic Moment
節目中另一難忘片段，係陳家樂連續播出3首三拍子歌曲 —— Japan《Nightporter》、達明一派《禁色》及浮世繪《月滿繁星夜》。呢一個Moment，應該係香港電台史上一個Magic Moment，將英倫同香港嘅低調傷感連結一起。《禁色》及《月滿繁色夜》兩曲，明顯係向《Nightporter》致敬，黃耀明同劉以達過去已不止一次提到Japan對佢哋嘅影響；而浮世繪主音梁翹柏嘅唱腔，你話佢係香港David Sylvian，相信無人會反對。
但其實，呢3首歌曲唔算太新浪漫，所以陳家樂亦私心每隊播多一首作品 —— Japan《Quiet Life》、達明一派《迷戀》、浮世繪《舞姬》。難忘當晚第一次聽到《舞姬》，一聽便鍾情，一首非常非常出色嘅新浪漫歌曲，令我決意追聽返浮世繪所有作品，成為佢哋遲來Fans（其時樂隊已解散）。
香港電子新浪漫
陳家樂向來以播英文歌為主，但亦一直支持本地Band Sound。當晚佢仲揀咗Beyond《Water Boy》、Radias《低調感覺》、CoCos《紅磚牆》同風雲樂隊《浪漫的追尋》播放。其實《Water Boy》唔算新浪漫，但歌如其名，帶點80年代著名樂隊The Waterboys嘅Indie-Folk味道。慢板作《低調感覺》，屬Raidas眾多作品中擁有最純正Synth-Pop血統一曲，如果當年佢哋夠膽用此作做派台歌，相信我會對Raidas更尊重。
CoCos嘅《紅磚牆》亦係100% Synth-Pop慢歌，更係派台歌，收錄喺樂隊唯一Full Length Album《我們都是人》內，屬少人提及、但非常精彩嘅電子專輯，碟內好幾首歌曲嘅電音效果處理，更令我聯想起Depeche Mode。
至於風雲嘅《浪漫的追尋》，我認為此作同《舞姬》係香港樂壇史上2首最具New Romantic靈魂嘅歌曲，尤其難忘陳少偉超低音演繹，比梁翹柏仲要Low Key，完完全全係英倫新浪漫低調Style，亦同鄭敬基嘅豆沙喉成強烈對比。日後若有時間，希望再寫寫呢兩隊被人遺忘嘅香港樂隊，還有浮世繪。
節目最後，陳家樂揀Soft Cell《Say Hello Wave Goodbye》做完場曲，確係完美之選。以前聽電台DJ，就係鍾意佢哋揀歌有晒起承轉合，代表唔同DJ音樂品味取向，對當年初聽英文歌嘅我而言，係閱讀《年青人周報》以外另一重要音樂養份吸收。
今天串流平台當道，樂迷可隨時隨地聆聽大部份音樂，未必再需要DJ推介。唔同平台亦設有唔同「猜你喜歡」Playlist，透過大數據幫你揀埋歌曲播放。不過呢，我仍然懷念陳家樂嘅電台節目，透過佢嘅聲音導航推介，令我對音樂有多一份人性化了解。
聽完呢個新浪漫特輯，我真係按照陳家樂嘅Playlist，陸續搵返相關音樂單位細聽，除浮世繪，仲有風雲、CoCos、B-Movie、A Flock Of Seagulls、The Assembly……由此擴闊我嘅電子音樂世界，亦讓我知道，未必所有出色嘅音樂能夠大紅大賣，但總會有人記得佢哋存在。
網上有關陳家樂嘅資料好少好少，據知佢離開商台後去咗加拿大，2014年曾返港喺新城電台開咪，但近年行蹤去向欠奉。唔知道佢而家點？仲有無聽英文歌？希望陳家樂有機會睇到呢篇文章，衷心多謝你當年給我嘅音樂薰陶，祝你今天一切安好。
