2021年之後，香港仲會唔會出現新嘅流行巨星﹖
2021年之前，陳奕迅，香港最後一個流行巨星，擁有無數Cantopop名作，紅遍亞洲。2020年，佢曾發表《致明日的舞》，充滿正能量氣場，好適合用嚟為香港人打氣。不過今日，你仲會唔會聽佢嘅歌？
我會。我選擇聽返25年前佢嘅《時代曲》。由1996年嚟到2021年，今日聽返仍然唔覺過時。呢首係一首超越時代、可一不可再嘅經典。
《時代曲》
作曲：江港生 / 陳奕迅 作詞：黃偉文 編曲：楊雲驃
「就散席了 人客急將美酒喝掉
趕於舞曲奏盡前離坐
是我夜了吧 最後這分鐘到場
待熱情盡過 方看到場內燦爛燈火」
1996年，仍然係四大天王當道年代。Eason憑新秀冠軍出道，趕上Cantopop最後盛世。《時代曲》係佢第一首主打作，但外間反應麻麻。又係嘅，一個新人，夠薑派一首Chorus唔算易記易唱嘅Blues Rock流行曲上台，係趕客嘅。
「好想唱一闕歌 叫你認清楚我
我也曾到來慶賀
好想唱一闕歌 見證日子怎過
哪個時勢能沒有歌？」
唱完呢闕歌、出完第一隻碟，陳奕迅未有贏得太多掌聲。97年嘅繼後作《與我常在》，開始獲較多好評，然後到第三隻碟《我的快樂時代》更廣為人之。可以講Eason係越嚟越Pop，但頭三張專輯，主調仍建基於《時代曲》嘅Pop Rock風格，亦係Eason骨子裡嘅音樂風格。
「若問你會如何 你會罵我別傻
剩下光景不多
但是你會如何 我也沒有奈何
盼你亦賞面安坐
替我用掌聲和唱著這歌」
千禧世紀開始後，陳奕迅轉投英皇，正式開啟佢嘅天王時代，贏得唔少掌聲。走紅後嘅Eason，個人認為係偶有佳作，有嘗試唔同樂風；但更多人記住嘅，卻係Chorus易記易唱嘅Cantopop。整體感覺係炒雜燴、各自為政。你咪理，人紅歌好聽就得啦。你咁講，根本係為批評而批評，雞蛋裡挑骨頭。
對唔住對唔住對唔住，係我唔啱，太偏激。
「就散席了 人客深知箇中奧妙
將講到一半話題完掉
若注定這樣 故事尾聲方進場
別人話遲極了 願時代仍為我留了座」
陳奕迅紅咗幾多年？由千禧年走紅，直至2021年。既然佢係香港最後一個天王，今日用佢嚟引證香港嘅衰落墮落，實在非常理所當然。
「只想唱一闕歌 叫你認清楚我
我也曾到來慶賀
只想唱一闕歌 一首淒美的讚歌
派對完結前為你寫的歌」
一切，只不過係我哋一廂情願而已。套用黃子華金句：搵食啫，犯法啊？香港從來係咁，我哋都喺呢個借嚟嘅地方，用借嚟嘅時間搵錢搵錢搵錢。有無其他價值觀？當然有，但唔係主流。東方之豬另一個外號叫文化沙漠，喺文化沙漠中特立獨行，嘗試走另一條路，注定不易為。
「若問你會如何 你會罵我別傻
剩下光景不多
但是你會如何 我也沒有奈何
盼你耐心的安坐
怕以後掌聲 未夠是晚多」
但，呢一切光景都過去喇，派對亦已完結喇。好多人都想返番去1996年。嗰時候，陳奕迅初出道，派咗《時代曲》上台，呢首歌佢有份作曲，好有Blues Rock味道。多得「細AL」楊雲驃（玉石樂隊結他手，2021年7月不幸因病離世）嘅編曲，開首同中段過門嘅結他彈奏，Blues得來帶少少抑鬱傷感；亦多謝鍾一匡以往嘅樂評解說，令我得知呢首歌嘅藍調結他風格同尾段嘅變調，係呼應著夏韶聲嘅滄海遺珠《今天昨天》。不過，《時代曲》俾我更強烈嘅感覺，係Rock N’ Roll嗰份唔服輸態度，以及Eason演繹出嗰份唔甘心嘅情緒。
現實，無疑係令人無奈同沮喪，喺混沌迷茫中不斷嘗試探索、堅持行自己嘅路，注定不易為，你同我都未必做得到。佢同你同我都係一樣，人一個而已。有人堅持有人放棄有人離場有人投誠有人轉唱另一些歌，人之常情而已。2021年之前，陳奕迅被時代選中成為香港最後一個流行巨星，佢本應係一名藍調搖滾歌手。
「若問哪裡不妥 你會罵我別傻
剩下光景不多 別寄望太多
日後我會如何？我也沒有奈何
卻怕在今晚之後
不知有誰來迫我轉唱另一些歌？」
（原文上載喺2021年3月26日「紳吟」Facebook，現版本稍作修改）
