方丈劉以達早前宣佈即將發表《Season's Greetings》EP，提及新作會包括「充滿情境想像嘅純音樂」。感謝達哥多年來一直堅持純音樂呢條非主流路線；而在我城香港，同樣有唔少音樂人／樂隊，默默耕耘創作Instrumental，值得讓更多人知道。
達明一派《離》（1987）
達哥最廣為人知嘅樂隊達明一派，當然有創作純音樂，主要用作唱片Intro／Outro同Reprise，帶出專輯／樂曲概念。當年我在唱片店買下生平第一張達明專輯、《石頭記》盒帶，從卡式機轉出來第一首作品，就係純音樂《離》。
《離》只得短短2分鐘，卻盡現達哥處理電子合成器功力，氣氛緊湊，將樂曲漸次推向高潮張力，亦同緊接第二Cut《馬路天使》銜接得天衣無縫。
記得曾喺電視睇過達明現場「玩奏」過《離》。多謝Tat Ming Archive上載當年演出版本，讓我重拾這段不一樣記憶。那是達明參與港台節目「勁Band衝天飛」音樂會，雖然只係現場播帶，並非真正玩Live，但見達哥同一眾「樂手」仍落力演出扮拉小提琴，明哥黃耀明臨尾手執一束黑色汽球出場。當最後一粒音完結，明哥將汽球放上天空，呢個End Shot非常有型，整段演出亦帶有舞台劇效果。達明與別不同嘅基因，當年早已呈現於人前。
林海峰《Hardbeat Vol.2: Bit, Bit...Bit, Bit》（1998）
林海峰近年不時發表新歌，慰藉一下中年人／香港人弱小心靈；我自己就比較懷念佢早期個人發展作品，處男專輯《Hardbeat》（的士夠格）大玩80年代的士高舞曲，無論銷量及口碑皆不俗；但Jan夠膽死緊接第二張專輯《Hardbeat Vol.2: Bit, Bit...Bit, Bit》轉玩純音樂，在本地主流樂壇屬非常另類嘗試，勇氣實在可嘉。更犀利嘅係，呢隻碟令我想起Felt！
Felt第九張專輯《Train Above The City》，主腦Lawrence將創作大權交俾兩位成員Martin Duffy同Gary Ainge，佢只為樂曲命名。林海峰呢張《Bit, Bit...Bit, Bit》亦十分類似，Jan為專輯訂立主題概念及改歌名，音樂部份就交由三人主理 —— 本地獨立電子音樂人Timmy Lok（Juno／Ex-Minimal）、DJ Tommy（農夫音樂監製／前LMF成員），以及Jer迷／Mirror迷／Muse迷一定識嘅王雙駿，三人各自負責不同曲目創作及編曲。
雖然係純音樂大碟，但碟入面好多歌曲都加入人聲拼貼（Jan自己都有份聲演），成為樂器一部份，既切合專輯彷如萬花筒豐富嘅Cut N' Paste電子樂風，亦令樂曲披上一層香港社會文化，甚至政治色彩。
當年聽住呢隻碟，不禁令人發出會心微笑，同時引領樂迷有所思考。今天重聽，卻不勝唏噓。有啲嘢無咗就係無咗，無得再返轉頭。
