2020年，達明一派再度復出，舉行Replay演唱會，並推出新歌《今天世上所有地方》。近幾年嚟，達明間中會有新作發表，但唔係完整專輯，做法非常聰明──試問呢個時代，仲有幾多人願意買新碟？亦一如既往，達明嘅作品，都努力回應緊時代。
呢首《今天世上所有地方》，據知係達明請求填詞嘅潘源良，呼應當年佢哋合作嘅經典《今天應該很高興》。嗰陣時，8964仲未發生，但唔少人已了解到，香港只係借嚟嘅地方。所以偉業獨自在美洲，很多新打算；瑪莉現活在澳洲，天天溫暖。
《今天應該很高興》講移民潮，今日香港唔單止再現移民潮，更出現《迷惘夜車》中嘅流亡場面。所以《今天世上所有地方》描寫嘅情境，必須提升去另一層次。歌詞其實非常淺白，「聽說你今天到達一個地方，戰勝了哀傷卻在繼續靜養。」有良知嘅香港人聽到，感受一定好深。「繼續唱，繼續找，總會找到方向。」最後呢幾句，我認為同時呼應緊達明第一首作品《繼續追尋》：
前望去，默然面對，
再去追尋，哪怕累？
網上睇到歌迷喺演唱會拍攝嘅片段，可聽到《今天世上所有地方》中段有達哥劉以達嘅結他彈奏，有少少蒼涼，令我諗起《上路》同《是我有錯嗎？》，好令人懷念嘅感覺。後來，我知道V記李端嫻有份編曲，即刻再放心一啲。衷心期待呢首歌嘅正式版本，會同《今天應該很高興》及《繼續追尋》一樣，末段有一段長長嘅音樂演奏。
當年聽《繼續追尋》，感覺真係好破格、好新鮮，好似之前從未聽過尾段有咁長演奏（電子合成器+型到爆低音結他solo）嘅Canton-pop。《今天應該很高興》最深刻係由起始充滿聖誕佳節氣氛，漸漸推進到末段軍鼓/軍樂演奏，最後用飛機起飛聲收尾，一切意喻，盡在不言中。
如果《今天世上所有地方》真係有一段長長演奏，我希望由達哥主導，好想再聽多啲佢嘅結他，或者係keyboard solo都可以；佢勾勒出來嘅畫面，會係邊笪地方？係漫長嘅黑暗戰場？定係遙不可及嘅烏托邦？
（後記：呢篇文章當日發布報無耐，《今天世上所有地方》就推出錄音室版本，果然係由V記編曲，可惜中段嘅結他彈奏因為同時加左鍵琴音，變咗唔再係主導；末段音樂演奏大約有1分鐘，話長唔長，話短唔短，主要用Vocoder帶起成段，見係V記，我都收貨啦。）
（原文2020年11月18日喺「紳吟」Facebook上載）
