時間返番去1987年，當時香港Band Sound風氣好勁，令聽開譚詠麟陳百強張學友嘅我耳目一新，其中有兩隊我特別留意，分別係Radias同達明一派，兩隊Band嘅派台歌（Radias《傳說》、達明一派《石頭記》）我都好鍾意。
好記得，當年佢哋差唔多同時間出新碟。當年自己零用錢唔多，只夠錢買其中一隊嘅Cassette，最後我揀咗達明一派嘅《石頭記》。而家要我諗返原因，真係唔太記得喇。不過好肯定嘅係，我做咗人生其中一個重要抉擇。
好清楚記得，當日買咗《石頭記》返屋企後，幾乎每日每天都不停Loop，由第一Cut純音樂《離》到完場曲《棄》，成餅帶Side 1 Side 2全無冷場，首首我都好鍾意。《石頭記》唔使多講，將中國音樂加入電子音樂，係非常創新嘅手法，當年自己連電子音樂係乜都未知，總之覺得非常新鮮，非常好聽。
殊不知，專輯入面其他作品，令我聽得更興奮。快歌方面，《馬路天使》同《後窗》兩首繼後派台作，入型入格唔在講；《美好「新世界」》更加破格，歌名括住「新世界」，令我首次知道何謂意內言外嘅修辭手法，亦係達明第一首預言書；《崩裂》嗰份冷酷 / 冷峻風格，同樣係我之前從未聽過嘅音樂風格。
慢歌方面，當年我最鍾意《無風的秋季》，淡淡然嘅愁傷，卻令人聽得好舒服；《傷逝》係一首好心噏嘅作品，聽完個心會揦住揦住，結尾嗰句歌詞「無限痛苦，但美麗」，真心覺得寫得好勁！《一個人在途上》從曲到詞營造出一份孤獨感覺，而家聽返，其實幾中二病；《棄》更係絕望到盡頭。而家聽返，其實係一首禁得嘅鼓吹自殺歌。
當年家中有買《年青人周報》，我留意到入面有人寫《石頭記》嘅樂評，不過部份內容完全睇唔明，例如話達明一派嘅音樂師承英倫新浪漫電子、造型似Pet Shop Boys、《美好「新世界」》係Post-Punk、《無風的秋季》有啲Jazz味道、《崩裂》似New Order、《傷逝》個Intro抄The Chameleon嘅《Tears》……當年只識分辨快歌慢歌嘅我，真係睇到一頭霧水，同時好奇心作崇：想搵返以上達明嘅音樂薰陶嚟聽聽，睇吓係咪都咁好聽。
就係咁，我開始聽外國流行音樂，直到而家仍然係。
如果，當日我揀咗買Radias嘅《傳說》，我嘅人生係咪會變得唔一樣？我仲會唔會好似而家咁，呢一世都會繼續聽歌，Music non-stop techno-pop？
以前，我會成日咁諗。人大個咗，就知自己諗多咗——喺另一個平行時空，如果我真係揀咗買《傳說》返屋企，相信我好快就聽厭，然後再儲錢買返《石頭記》——所以最終結果仍然一樣！
Yes, something changed. And yes, something will never change.
