英超完成上周賽事後，接連有車路士樸達及李斯特城達羅渣士兩位領隊「落鑊」被炒。因為炒人時間太倉卒，兩隊喺剛完成嘅周中快車比賽中，只能起用原先助教般奴沙托（車仔）、薩拿及史杜維（李城）擔任看守領隊，結果兩隊表現同樣失望，車路士主場只能同利物浦0:0言和；李城更慘，1:2輸俾踢風流波嘅阿士東維拉。
此情此景，實令人想起球迷成日挪揄曼聯不停換領隊、但表現仍繼續差勁嘅金句「咪一X樣」；如今套用喺車路士同李斯特城身上，同樣切合；又或點一首英國著名饒舌歌手The Streets作品《Same Old Thing》嚟「贈興」一番。
以事論事，車仔對紅軍一場，其實埋門機會唔少，亦兩度食詐糊；但呢個亦係球隊自樸達上任後一直發生嘅問題，空有埋門攻勢，但入球量極少。入唔到波，點能夠贏波？
另一邊廂，狐狸今季越踢越沉，長期留喺護級區域，早前曾有一段時間踢返起少少，最近又打回原形，球隊高層終於忍唔住，掃走羅渣士；不過輸俾維拉後，李城已跌到尾二，降班危機越見嚴重。雖說由榜末修咸頓（23分）到第12位嘅水晶宮（30分）之間只有7分差距，但如今球季只剩下1/3，留俾李城及其他護級球隊嘅時間已唔多。
The Streets嘅《Same Old Thing》，描繪英國市井市民每周每天幾乎一模一樣嘅平凡生活，「Seems the only difference between mid week shit and weekend is how loud I speak」。對每位平凡嘅車仔及狐狸球迷嚟講，睇見愛隊炒領隊後仍然踢得毫無起色，自然感到氣憤，好想大嗌泄憤；但臨時主帥沙托、薩拿同史杜維，何嘗唔係平凡人？現階段叫做開助教嘅佢哋，一下子為球隊帶嚟截然唔同改變，無疑強人所難。由於車仔今季已兩度換帥，估計沙托任期可「捱」到季尾；李城則盛傳聘請賓尼迪斯救亡，且看呢隊前英超冠軍級球隊，能否盡早逃離降班漩渦。
（原文2023年4月5日於Now Sports網站上載，現稍作修訂，並改成粵文版本）
