一直好想寫一次謝安琪，由2006年第一次聽到佢嘅《愁人節》開始，已經好想寫。最近Kay同香港獨立音樂人Room307合作一段Live Session（由OC2S策劃），睇完後，促使我15年後終於落筆。
Live Session入面，佢哋玩咗三首歌，將Kay新歌《離不開》同Room307嘅《背山望海》Jam埋一齊；Room307亦翻玩Kay舊歌《第一天》向天后致敬。成個Session都充滿濃濃爵士氣息，二人恍如Natural High懶洋洋合唱，既軟綿綿同時卻捉摸不住；其中《背山望海》原曲已有好Jazzy嘅結他彈奏，Live版本變得更Jazzy，令歌曲多添一份濃濃醉意，比錄音室原版更覺昇華，更加出色。
香港史上最佳Jazz-Pop
謝安琪唱Jazz，我一直認為非常適合；其實早喺處女專輯《Kay One》，佢已有過一首可能係香港樂壇史上最出色嘅爵士流行曲《開卷快樂》──歌曲由專輯兩位監製林思聰同周博賢，以及Kay一齊創作，密集而喘不過氣嘅旋律歌詞唱法，抵死而一針見血道出昔日娛樂新聞種種荒誕，人人爭相睇藝人名人種種醜與醜態，卻很快過目即忘──呢種套路，而家已轉化成社交網絡生態。音樂部份多得香港著名爵士音樂人Ted Lo參與編曲，完完全全係爵士級演奏，變化莫測，規律中求亂，亂中求生存，比昔日蘇永康嘅Jazz-Pop更加徹底，胡琳之流相比之下根本唔入流。究竟我仲要用幾多文字去描述呢首如此高質嘅Jazz-Pop？都係去歌，俾大家親耳感受更實在：
可能係香港史上最佳處女專輯
每一位女歌手，相信心入面都有諗過成為爵士女伶，謝安琪當然有呢個潛質，但最終佢成為香港流行天后，都無所謂嘅。事實上當年Kay喺《Kay One》嘅表現，足以證明佢非池中魚。除咗《開卷快樂》，其他歌曲同樣出色，第一首派台歌《姿色分子》無論曲詞編已十分之唔大路，其他如《喪婆》玩Ska、《一人之夏》帶點Bossanova嘅清新Acoustic-Pop、《臭男人》好鬼死Jamiroquai、後來新版加入嘅新歌《跟我走》走爽朗Guitar-Pop風格……當中算比較大路嘅《我歌…故我在》卻非言情，而係言志，凸顯全碟內容非常多元化，卻無一首屬於典型廣東流行曲嘅樣板情情塔塔。從來無諗過一位香港流行歌手，夠膽喺自己第一張專輯已玩到咁盡，音樂上亦非常折衷多樣性，成隻碟其實非常Pop，但偏偏就係唔唱K歌，真心覺得Kay夠薑夠勁！
喪婆悟入歧途玩音樂
不過全碟我覺得最勁唔係《開卷快樂》，而係一曲兩詞兩編嘅《喪婆》同《悟入歧途》──《喪婆》喺輕快Ska節奏下，Kay高歌自主萬歲，又會自嘲「扮外國，學鬼婆，仲唱啲咁嘅歌」；另一句「試吓去玩望落冇乜錯，有錯最多咪從頭嚟過」，你話係咪好試當真呢？
《悟入歧途》由快轉慢，歌詞遙遠呼應《喪婆》，歌者卻已變成中女年輕不再：「過往有些事物錯失過，卻再不可以從頭走過」。兩首歌拍埋一齊聽，更能感受到每個人由年少輕狂到時不予我嘅唏噓，但《悟入歧途》並唔係消極，關鍵在「悟」而非「誤」：
「可否試驗禁果，相信我直覺，
不想走進軌跡裡渡過。
即使怪異眼光，嘲笑戲弄我，
得不到世界為我扶助。
只想以盛放的膽色共遐想跳舞
去走歧途，從未怕闖禍，
總可按著我譜寫的韻律唱歌。」
《愁人節》現實版The Smiths
謝安琪講過，《悟入歧途》代表佢初入行時嘅心願，「能夠真心做音樂，做一啲自己鍾意嘅歌曲」。《Kay One》呢張專輯，的確俾我感受到，Kay好努力嘗試多種唔同類型音樂，而且做得好好。雖然當年銷情麻麻，但靠住口碑，Kay慢慢吸納一批Fans支持。繼後一張E.P.《Ksus2》繼續保持高水準，尤其《愁人節》，紮實嘅Rock-Pop曲式，幾有陳奕迅早期作品風格。歌詞描寫窮人，而家聽返係有啲左膠，但比起本人之前聽開The Smiths / Pulp嗰啲將貧窮浪漫化嘅歌曲，《愁人節》無疑係更真實更殘酷嘅版本，描寫貧窮，理應如此先夠貼地。
離棄．回來
再後嚟，謝安琪由大肚結婚到產後復出推出《囍帖街》全城大賣，佢成為天后嘅故事，相信大家都耳熟能詳。我估中個結局，但估唔到個過程。Kay嚟到第二張專輯《Binary》開始唱K歌，我卻諗起佢喺《喪婆》唱道「但係我話淨唱K歌有啲（火羅）」。嗱佢都無話完全唔唱，只係話唔會淨唱啫，OK無衝突，係我自己一廂情願想太美啫。當然碟入面仍有部份作品如《十七度》、《十字架》屬佳作，不過整體卻令我聽得不是味兒，OK相信呢個只係我個人問題，因為之後Kay越嚟越紅，而我再買多佢兩張碟《Yelling》同《Slowness》後，越聽越覺唔啱Channel，就無再跟落去。
為咗寫呢篇文章，我特意聽返Kay打後嘅專輯，包括佢同Juno合作一大堆作品；聽完，仍然無改觀，當然我要再次強調係我個人問題。不過事情嚟到2021年似有轉機。Kay同Room307嘅合作，固然係原因之一；仲有之前佢上ViuTv夥拍另一隊香港獨立樂隊WHIZZ演出，翻玩City-Pop經典《Plastic Love》固然正斗，更驚喜係Kay特別揀返《臭男人》呢首Groovy舊歌同WHIZZ一齊Jam，明顯有諗過度過，因為WHIZZ就係一隊擅玩Groovy-Pop嘅樂隊！
常存希望
因為咁，我再細心聽返Kay自己包辦曲、詞、編同監製嘅新歌《離不開》，呢首亦係佢離開主流唱片公司、自組獨立音樂廠牌「淺白本部」後首作。以歌論歌，《離不開》仍離不開好多廣東流行曲一貫「詞大於曲」問題（但歌詞的確寫得好好，好有文采，亦有強烈弦外之音。呢方面坊間已有唔少品評，我唔作分析，總之明就明，唔明就家明）。不過我欣賞呢首歌旋律淡如白開水，毫無K歌潛質，但藉住Kay多年建立嘅名聲，歌曲仍能順利登上各大流行榜冠軍。莫非呢十幾年嚟，佢做緊無間道，係我錯怪咗佢？我昔日欣賞嗰位謝安琪，好似有機會返嚟喇。我會再次期待Kay日後嘅新作同搞作，希望佢會出一隻《Kay Two》、希望佢會同曾中風嘅林思聰再合作、希望佢會同更多獨立樂隊Crossover、希望佢會做更多更多唔同類型音樂……做人有希望，你話幾好呢。希望我日後會寫多幾次謝安琪。
