Youtube嘅興起，完全改變我哋以往觀影模式，而家更會有人用Youtube代替Google search。喺恆河沙數嘅短片入面，點樣先能夠戰勝Big Data突圍而出？好老土一句，首先你要做好內容。點樣做好內容？首先你要願意不斷經歷、嘗試、實驗。
試當真 Trial & Error短短兩個月入面火速崛起，就係靠認真試驗、認真拍片。喺原本Youtube固有嘅群眾喜好計算框架下，嘗試試多一點點，成功令佢哋喺云云本土Youtube Channel中突圍而出。從早期佢哋嘅作品《唔准偷睇》，將內心世界擬人化為Youtuber分身自拍、將心聲物化為攝錄機SD card，已充滿神來之筆之妙。
《Channel需要女》係佢哋第一條爆出短片，以Mockumentary手法拍攝，彷如《The Office》嘅癲佬認真講廢話式對白，加上有女…仔四位客串，任由「試當真」三人糟質，最終短片成功跑出，相信都係佢哋掌握之中內。
「試當真」三位幕前（兼幕後）主力游學修、許賢同豪哥（最近《點五步》嘅林家𤋮Locker都加入），早喺Captv年代已合作無間；今次開新頻道，仍然保留昔日Captv嘅二次創作配音片，代表作品《后翼棄糊》，係將早前大熱嘅Netflix劇集《后翼棄兵》Crossover杜Sir韋家輝《嚦咕嚦咕新年財》，估唔到兩者嘅場景畫面加起來，原來竟然咁夾perfect match！
另一條同屬二次創作嘅《哪裡只塞駿業里》則玩改歌詞（原曲為Dear Jane嘅《哪裡只得我共你》），請嚟填詞人梁柏堅一齊參與，真實兼抵死寫出觀塘天天塞車嘅慘烈狀況，主唱嘅阿修，唱功意外地非常唔錯。MV製作同樣認真，觀塘實景拍攝，仲有袁澧林擔任女主角，成功吸引網民瘋傳，成為佢哋迄今最高View數短片，睇嚟觀塘塞車的確好嚴重，好多人都有感同身受嘅共鳴！
「試當真」亦成功帶動唔少網絡潮語。《咁大件事冇人講》片名據知源自連登，但佢哋將之發揚光大，近日連馮睎乾都喺專欄引用！片入面阿修同豪哥一人輪流一段連珠炮發對白，個人認為比《寒戰》梁家輝同阿皇疊聲嗌交一段更有劇力；結局荒謬得來卻神傷，令我諗起達明一派《十個救火的少年》一句歌詞：「在這社會最怕走得太前」。全片暗喻色彩濃厚，為大家解答咗一條過去一年嚟好多人問嘅問題：點解香港會搞成咁。另一條《唔准唔叫》，片名亦成為「試當真」Fans之間in-joke。呢條片十分瘋狂十分gay，結局同樣別具心思、另有所指。最後有一個Shot，竟令我想起另一首歌，Pet Shop Boys嘅《Rent》：「I love you, you pay my rent.」真心一句，十分勁！
然之後，他們將以上同其他in-joke一次過放喺《早晨，搭膊頭咁大件事唔准唔叫，多謝！》呢條片，嚟個反高潮戲謔， 岑珈其有份合演，全片短短四分鐘，就咁睇係不停跳嚟跳去、不停玩嘢，但其實十分認真，眾人嘅對白同節奏掌握得好好，更採用一鏡到底拍攝手法，難度大增。睇完後再嗒真啲，亦明白到的確要用長鏡頭去拍，咁樣先能帶出成個劇本效果，並非為扮勁Show Off先咁做。
個人私心最喜歡嘅作品，係描寫家庭關係嘅《Uber爸爸》。片中角色造型設定驟眼睇好Hea（靠出Caption話俾觀眾聽邊個係老竇，邊個係仔），但性格設定十分深入而深刻。老竇許腎同阿仔Locker都演得好好，貼地演繹出當下世代，阿爸阿媽與同仔女之間一直存在嘅溝通問題：最親近嘅唔會彼此對望講真話，卻只能夠同陌生人傾偈吐心聲。片中嗰場小風波，實在太真實而具普遍性，以致有一刻，我認為車上嗰位Uber司機，根本唔係阿仔，而係另一個人（Locker周圍都係）。又或者，連嗰位乘客老竇都唔係許腎。結局毫無意外地扭橋，但這次荒謬之餘，仲多咗一份殘酷，令我一邊笑，一邊痛。
「試當真」嘅成功，絕非突然爆出嚟。Captv之後，阿修拍過好多電影、上過港台同劉鳴偉鬥Package；舊年他自導自演嘅《仇老爺爺》偶有靈光但整體好壞參半。豪哥同許腎另組過「金剛Crew」，叫好唔算太叫座；至今年年初佢哋同伍公子合作嘅《孫文的野望》，尖酸刻薄得來並一矢中的，非常有料到，可惜睇過嘅人同樣唔多。三人一路走嚟嘅經歷，終於成就今日「試當真」嘅成熟圓渾。佢哋噚日發佈嘅最新短片《外賣修澧賢》（改歌仔，原曲為Dear Jane《銀河修理員》），亦係佢哋第一條廣告片，恭喜恭喜。寫到呢度，我想引用九十年代香港獨立樂隊AMK經典作《浪漫是你的本性》一句歌詞，為呢篇評論作結：「仍願你能，保持自我風格。」
（原文2020年12月17日喺「紳吟」Facebook專頁上載）
