香港獨立音樂人蛋撻頭近兩年開始活躍，推出過唔少細碟歌曲，亦同好多歌手音樂人合作。今年年初聽過他一首City-Pop風格作品，水準OK但聽完印象唔算好深；豈料士別三日，刮目相看！近日蛋撻頭推出新歌《寂寞的雪糕》；聽完一次，已可以立即有呢個結論：呢首歌係香港流行音樂史上少數做得出色嘅Synth-Pop流行曲！
出色嘅Synth-Pop，尤其係輕快作品，我認為旋律必需夠Catchy、Hook Line必需夠入腦，還要有一段搶耳嘅Synth Solo。《寂寞的雪糕》基本上做齊以上幾點，電子合成器嘅處理及編排亦十分流暢，絕非新世代嗰啲「鳩流流」求其整首EDM加段Synth Solo就當係，絕對係高質示範。
蛋撻頭講過，創作呢首歌曲時有參考多首80年代Synth-Pop作品如a-ha嘅《Take on Me》，我聯想到嘅仲有Depeche Mode《Just Can't Get Enough》、OMD《Enola Gay》。更類近嘅例子，就係2007年荷里活電影《冧歌有情人》（Music and Lyrics）入面一首《PoP! Goes My Heart》，同《寂寞的雪糕》一樣「古老當時興」，就好似時空交錯，令人再度置身喺昔日新浪漫 / Synth-Pop嘅美好80年代。
《寂寞的雪糕》仲有一個正斗地方，聽得出歌詞完全係為旋律服務，唱起嚟聽起嚟十分順耳，就算部份歌詞意思有啲亂嚟，亦完全唔覺有問題。呢種填詞style，其實就係Depeche Mode初代主腦Vince Clarke喺創作《Speak and Spell》專輯時採用嘅填詞手法：總之一切以順耳啱音押韻為大前題，大家一齊sing-along跟住唱就掂；歌詞內容講乜嘢，其實唔太重要！
Synth-Pop真係一種好奇妙嘅音樂類別，佢已經超過40年歷史，今時今日聽返，難免有啲老土過時。但呢40年嚟，全世界仍有唔少音樂人堅持創作Synth-Pop，點解？除咗古老當時興，Synth-Pop的確有佢獨特魅力，好似《寂寞的雪糕》，就有一份純粹而真誠嘅懷舊電子感覺，叮叮噹噹，令人聽得開懷。呢種感覺，只要愛上咗，就會上癮。就算有人一早戒咗，黑膠都賣晒；多年後今日，如果喺收音機或YouTube偶然聽到呢首《寂寞的雪糕》，相信你都會聽得好開心，同埋諗返起當年迷戀音樂嗰份初心。
多得《寂寞的雪糕》，我重新認真聆聽蛋撻頭其他歌曲，其實佢嗰首同Uka Yeung合唱嘅City-Pop作品《都市~Lonely Night~》，多聽幾次後都覺相當唔錯，亦同樣好80年代。佢同JNYBeatz同PØK1合作嘅《Can't Stop》，都係一首舒舒服服帶點R&B味道嘅溝女歌。無錯，PØK1就係最近好紅嘅 ERROR 成員保錡，佢唔少作品均有蛋撻頭參與，果然「物以類聚」騎呢配騎呢！
呢兩年時常聽人話，連香港人都唔撐香港音樂（或電影或其他），邊個撐？呢種講法其實唔係太正確，亦太騎劫式。香港音樂，應該係音樂先於香港；只要玩得有水準，就值得更多人支持，而且唔止香港人會撐。
（原文2021年6月3日喺「紳吟」Facebook上載）
