藍奕邦，從《竇》回到《青春於舞池流逝》

多謝史健仁推介，聽完藍奕邦新歌《竇》（Featuring獨立音樂人cehryl），實在覺得呢首歌要出CD Single或12吋黑膠，要用實體Hi-Fi聽，先至過癮。

一切全因歌曲非常突出嘅鼓同低音節拍，實在非常好跳；而家用串流聽，雖然已經好正，但總覺有少許失真，唔夠完美圓滿。

我亦建議駁靚聲耳筒聽，先至完整感受到《竇》嘅意味。當按下Play制，兩賻已隨住歌曲節奏兩邊「Un」。Pong一開始唱得有啲拘謹，Vocal同音樂底唔太夾；但之後漸入佳境，越唱越飄越榮，同cehryl嘅飄逸和音啱晒Vibe。

《竇》的確好好跳，但只適合低調起舞，連電結他彈奏都嚟得不經意，但襯喺Bassline同鼓之上又特別有型，幾下掃撥已有畫龍點晴效果；歌曲中段仲要加多段8-Bit電音過目，問你死未？稍嫌曲末由cehryl主唱嘅變奏有啲刻意突兀，但藍奕邦解釋背後係有Message，而《竇》要表達嘅Message，已同歌曲融為一體，低調得嚟已講得好清晰，再加埋英文歌名叫《Niche》，一切盡在不言中。「時代大力壓下／雲霧內墮進溫存／私竇內跟你回歸極樂」。再一次強調，呢首歌只可以用耳筒聽，唔適合喺舞池公開播放。

藍奕邦 featuring cehryl《竇》Official MV

藍奕邦 featuring cehryl《竇》

作曲：藍奕邦、cehryl
填詞：小克
英文歌詞：cehryl
編曲：勳 Steffunn（Sensi Lion / 大頭佛）、Alok（Pillow / Slow Tech Riddim / A Roller Control / Gravity Alterstra）
監製：勳 Steffunn、何山（PixelToy / 永遠懷念塔可夫斯基）、藍奕邦

如果時間返番去10年前，《竇》就適合喺舞池公開播放。10年前，藍奕邦推出迷你專輯《好風光》，我認為好啱連埋《竇》一齊聽，尤其係碟入面2首作品《晚晚禮拜六》同《青春於舞池流逝》。《晚晚禮拜六》節拍同樣非常好跳非常「Un」，但大鳴大放招搖得多，有住非常搶耳嘅電結他同流麗鍵琴過門彈奏，音樂上同《竇》形成一高一低（調）強烈對比，十分有趣。

《青春於舞池流逝》開宗名義大玩80年代的士高舞曲，旋律Catchy流暢易上口，再加點點Synth-Pop元素，比《晚晚禮拜六》多一份矯柔氣息，即係Camp Camp哋。「如果青春於這舞池流逝 / 關燈的一天別嘆喟 / 窮盡最後氣力向天一揮 / 總算謝世」。《青春》一曲由周耀輝填詞，佢係達明一派其中一位御用填詞人；呢首歌亦令我諗起達明經典《今夜星光燦爛》，兩者同屬預言書，同樣估中個結局，但結局之後又點呢？《今夜星光燦爛》同《青春於舞池流逝》無再提及，所以今天藍奕邦同cehryl、小克寫咗《竇》呢一首歌。