1998年，草莓救星喺台中成團。
2002年，佢哋出版處女專輯《太陽系》。我喺台北「聖界」Live House，睇佢哋為美國後搖滾樂隊Explosions In The Sky暖場演出。
2023年10月20日，佢哋推出繼2014年《德古拉城市》後嘅久休復出EP《失敗的我們》。
要寫草莓救星，的確有好多好多說話可以講，我以往已寫過唔少。或者真係有所謂「言靈」存在，我一直講啊講寫唔寫，念念不忘佢哋，原來真係有迴響。
其實2018年時候，草莓救星曾喺台北「簡單生活節」復出表演，後嚟佢哋亦有練團寫歌，不過一直未孵出蛋來。再後嚟，新冠疫情來襲呢幾年，或者打亂佢哋步伐，眾成員亦各有各忙 —— 結他手ARNY同啟泰另組嘅「康士坦的變化球」喺台灣很活躣、低音結他手海棻參與多張唱片／多齣電影電視劇嘅錄音／混音工作、鼓手滾滾另一樂隊「薄荷葉」近年亦告復出。
草莓救星嘅創作靈魂、主音腊筆呢？《失敗的我們》EP內3首歌曲，可會係佢呢幾年嘅心情寫照？
單看碟名，今次會唔會係草莓最悲觀一次？先前佢哋喺台北女巫店復出Live時候，已率先玩奏過新歌《親愛的》，歌名同《失敗的我們》來個反差，但聽到最後，原來係一首傷心嘅歌︰「我日日夜夜祈禱，有人陪伴我渡過無助的每一秒。有沒有一班火車，可以載我到惡夢的盡頭？你是否會在終點對我揮揮手？」
EP開場曲《夢裡什麼都有》亦係同一脈絡，歌詞講夢裡什麼都有，同時什麼都沒有，只剩下歌者一人。「夢降落在彩虹的邊緣，夢墜落在彩紅的背面。」我哋要繼續睡？定係要醒來？如此程度嘅無助，好似唔似我哋一貫認識嘅草莓救星？
不過，早喺《德古拉城市》一碟，草莓已有好幾首歌曲如《時間說》、《如果你忘了》、《深夜兩點十分》，令人聽後十分神傷。人隨著年紀漸長，漸漸發現歲月好似箭一樣匆匆而過，卻永遠總射唔中紅心，好可怕。
可幸，我哋仲有《失敗的我們》。EP點題曲《失敗的我們》，應該係腊筆寫過歌詞最長嘅一首歌。第一次聽，仲以為係草莓史上最絕望嘅歌曲，原來唔係。最起碼，失敗嘅，唔止我一人，而係「我們」。記得小時候睇《叮噹》（多啦A夢），有一集，班上嚟咗一個成績運動也比大雄仲要差嘅插班生，二人馬上成為好朋友。「讓奄奄一息、失敗的我們，一起緩慢散步前行。」呢首係一首送給所有唔快樂嘅人嘅歌曲。雖然嗰位插班生，唔想自己永遠失敗、永遠唔快樂。
音樂上，過咗咁多年，草莓救星或者唔再係我哋最初認識嘅模樣，後搖滾氣息漸已減退，唔再轟爆我哋耳朵；但嗰啲細緻嘅電結他彈奏、無比溫暖嘅旋律及音樂編排，依然別來無恙。而腊筆嘅歌聲，亦一如以往，就喺我哋耳邊溫柔地唱著，「昨天，去年，早已消逝如煙……」
咁未來呢？「明天，明年，是另一章詩篇。」未來係永遠無人知道嘅一個秘密，而家就由我哋一齊繼續走下去，令寂寞小公路亦唔再寂寞。過程中，或有人離開，或有人加入；好似啟泰因照顧家庭而離開草莓（同康士坦的變化球），但我相信佢日後會回來；起碼之前女巫店演出，佢亦有上台同眾人一起玩奏《自在》（仲有創隊成員Dudu喺台下默默玩Shaker）；第二代低音結他手Tony亦喺社交平台開心分享草莓新歌。草莓眾人，一直就好似一家人親密；而我哋歌迷，就係佢哋鄰居。「隔離嗰班友，玩嘅音樂好好聽噃。」
早年嘅草莓救星，如此形容自己︰「我們沒有性別、沒有年齡差距、沒有廉恥、沒有時間觀念、沒有曖昧關係、沒有錢、沒有情婦、沒有養兔子、沒有穿裙子、沒有不吸煙、沒有私人噴射機、很多都沒有，我們還是草莓救星，草莓救星一直會是草莓救星。」今天如此形容佢哋，大部份內容仍然成立。據知寂寞小公路今日已發展成熱鬧大公路；但草莓救星，一直都會係草莓救星。草莓歌迷，一直都會係草莓歌迷。
「請你不要感到寂寞，
亦不懂得快樂，有我。
～黃耀明《祝福你快樂》」
