草莓救星嚟自台灣台中，1998年組成。成員包括腊筆（主音）、啟泰（結他）、ARNY（結他）、昱人（鼓）、 DJ Tom（Turn Table與聲音效果）同Tony（低音）。
草莓救星係台灣獨立樂圈公認寫歌超慢嘅樂隊（佢哋自己都咁講）．初出道創作嘅《自在》，一唱就唱咗四五年，但佢哋仍樂此不疲。經過多次現場表演，2001年草莓救星開始灌錄處女專輯《太陽系》，期間樂隊原來低音結他手兼創團團長Du Du要做大頭兵，佢位置由專輯監製Tony頂上，成為草莓正式成員。
草莓救星唔單止自嘲寫歌好慢，連錄音都要慢工出細貨。佢哋會先喺Band房商量同排練，精雕細琢好歌曲起承轉合、點樣唱點樣彈，一切綵排好之後，先入錄音室錄音。專輯製作左1年時間，碟入面有8首曲目，不過當中有3首組成《Bad Dream》三部曲。所以嚴格嚟講，只有6首歌。當然《自在》有包括在內。
草莓救星主音腊筆擁有一把甜美少女聲線，從佢口中唱出《自在》有關女士「姨媽到」嘅歌詞，實在非常夾：「我不自在，這種感覺你們男人怎會明白？」哈，我當然唔明白，但每次聽，都會發出會心微笑，然後跟住一齊唱；歌曲後段嗰啲海浪聲效，更係神來之筆，非常抵死！
草莓救星亦被樂評歸納為Post-Rock音樂類別。純音樂開場曲《尖嘴》正正係從寧靜漸漸推演到爆炸，再回歸寧靜嘅後搖滾編曲格局，但佢哋喺電結他處理上比一般Post-Rock再花多啲心思，帶有英倫Shoegazing / Noise Rock味道。《香煙》同《Bad Dream》三部曲都係好有架勢嘅Progressive作品，後者長逾15分鐘，前後鋪排層次分明，由緊湊搖滾轉折到最後Acoustic曲式，過程一氣呵成，凸顯成員之間合拍無間。實在好難想像一隊樂隊嘅處女作，已經有咁成熟、咁有大將風範嘅表現。
點題作《太陽系》嘅編曲更係完美無瑕，以混沌初開電子音效做前奏，然後漸引入簡潔嘅電結他同木結他彈奏。全曲只用咗2個和弦，卻能夠喺簡單之中表達深遠意境。到小提琴同手風琴一出，更係非常煽情傷感。呢首係一首完美無瑕、一啲都唔sad嘅Sad-Core作品。完場曲《寂寞小公路》回歸平和古典民謠曲調，又係另一種完美。
草莓救星嘅《太陽系》，處處充滿住精雕細雕琢氣息，卻又無從挑剔，係一張無懈可擊嘅滿分專輯。
時間，就好似地球自轉一樣，不斷打圈、流逝。如果地球有一面鏡，佢睇見自己原地打轉，會有咩感受？
地球有自己嘅軌跡，人類有自己嘅生活規律。放眼宇宙太陽系，其實我哋同蜜蜂螻蟻差別唔大，一樣咁渺小。
去年喺台北聖界Live House睇過台中樂隊草莓救星嘅現場演出，而家諗返，我嘅印象已模糊。嗰次我係專程為美國後搖滾樂隊Explosions In The Sky而嚟，暖場表演嘅草莓救星只係額外點綴。我只係模糊記得佢哋嗰日唱咗《Bad Dream》三部曲。咁《自在》、《寂寞小公路》同《太陽系》呢？
唔記得喇。其實我真係好想記得返，咁我同草莓救星嘅記憶，可以早一啲開始，回憶亦可以長一啲。
原來真係有一個地方叫寂寞小公路，喺台中嘅，草莓救星嘅主音腊筆話我知。「真的有那個地方喔。對我來說充滿回憶，意義重大。（《寂寞小公路》）前面的蟲鳴、風聲跟吉他、Vocal，也是到寂寞小公路同步收音。」我都好想親身去一次寂寞小公路，雖然嗰度冇沒任何我嘅回憶，但，可以由而家開始擁有啊。
由而家開始，擁有並珍惜屬於我嘅回憶。「閉上我的眼睛，聲音越來越清晰。讓我們一起製造一個太陽系，循著它走自己的軌跡。」地球喺自轉之中，同時亦喺度公轉，循住太陽公轉，並非只係原地踏步。
我都想擁有一個自己嘅太陽系，然後好似地球一樣圍住佢走，一步一步咁行，輕輕嘅，好似好堅強咁。漸漸，所有嘢再唔係咁茫然。喺無垠宇宙之中，望見我自己，就喺呢度，keep busy living，努力活著。
