時間返番去1990年世界盃，英格蘭跌跌撞撞打入四強。晉級過程中，一對新晉中場拍檔加斯居尼同柏列滿場飛，我偶像華度踢自由人，為球隊帶嚟巴西式魔法傳球及進攻；前鋒連尼加被人勾跌幾多次都會重新站起來，繼續喺前線竄擾；後防有我另一偶像皮雅斯殺波夠準兼不時助攻，迪斯獲加擔任當年最流行嘅清道夫角色，一夫當關。
90世界盃嘅英格蘭，係充滿希望嘅。已故領隊卜比笠臣，之前我對佢嘅印象係極度保守，更無揀當年我最愛球員荷杜，本應我係憤怒嘅；但嚟到決賽周，笠臣終肯放下身段，大膽起用一眾年輕球員、改踢清道夫陣式，並重用華度。
可惜，90世界盃嘅英格蘭，最後係傷感嘅，四強對後來嘅冠軍西德，雙方勢均力敵，120分鐘一比一平手，到互射十二碼，我兩位偶像輪流射失，導致球隊出局，對我嚟講更憬雙重打擊。
不過，我會永遠記得90世界盃嘅英格蘭。呢一屆佢哋同曼徹斯特傳奇樂隊New Order合作，以England New Order名義發表官方打氣歌《World In Motion》，多位球員參與副歌大合唱，仲有「門口狗」班尼斯一段Rap︰「We ain't no hooligans / This ain't a football song」。
無錯，嚟到32年後今天，《World In Motion》已唔單止係一首足球打氣歌咁簡單，而係同英格蘭國家連成一體。你問問當地Engerland Fans，每到世界盃，佢哋一定記得呢首歌。
「We're playing for England / We're playing the song」。我哋一齊贏，我哋一齊輸。無論英格蘭踢得幾屎，我哋都無條件瞓身支持。上屆佢哋喺不被看好情況下，再次殺入四強，我哋已經滿意收貨。今屆有乜期望﹖沒有期望，就不言失望，大家只需繼續唱著《World In Motion》，繼續撐英格蘭就得喇。
（原文刊登喺2022年10月24日NowSports網站）
