（原文刊登於2004年《mcb》，現稍作修改，並改成粵文版本）
因為陳綺貞兩款獨立發行嘅名符其實「單曲」細碟《Sentimental Kills》同《旅行的意義》，令我認識風和日麗唱片行呢個新嘅台灣獨立廠牌。最近，風和日麗又為台灣新進二人樂隊「自然捲」推出處女專輯《C'est La Vie》，繼續貫徹廠牌一貫嘅清新音樂路線，亦懶免令人將樂隊同陳綺貞比較。
不過，我又唔太覺得自然捲似陳綺貞。樂隊由一男（奇哥）一女（娃娃，當然唔係以前嗰位滾石旗下同名女歌手）組成，奇哥負責絕大部份曲詞創作、編曲及樂器彈奏，娃娃就專心演唱。要介紹自然捲，最老土形容係：某個悠閒星期日下午聆聽嘅音樂。雖然呢句有夠陳腔濫調，但一寫出嚟，大家都馬上聯想到嘅音樂風格：輕輕鬆鬆啦、舒舒服服啦、有點Bossa Nova、有點清新味道。
本來應該就此收筆算數，不過再諗深一層，當睇見奇哥一副男子漢模樣，卻竟能寫出如此女性化歌曲，確實「人不可貌相」；再交由非常溫柔嘅娃娃演繹，更凸顯自然捲嗰份不濃不淡嘅輕柔音樂味道。
好似《99滴眼淚》傷感得嚟不失優雅；《坐在巷口的那對男女》輕鬆得嚟仍帶有矜持。擁有Brass Section演奏嘅《老處女》，恰如其分地熱鬧繽紛，沒有過猶不及嘅浮誇。點題曲《C'est La Vie》嘅奇特曲式配以輕盈爵士味編曲，相信會成為樂隊Live演出必玩歌曲；亦好鍾意奇哥親自主唱嘅《Beatuiful》，一派悠然自得風範。
基本上，《C'est La Vie》專輯就係是如此：某個悠閒星期日下午聆聽嘅音樂。唯一例外係碟末《Queen Of The World》之後嘅Hidden Track，電子＋森巴＋爵士的隨手拈來嘅即興演奏，雖然同自然捲正常一面恍如兩個世界，反而更得我歡心！
