昆蟲白嘅《瞬間》及聲子蟲嘅《真面目》，係去年我聽得最多其中兩張專輯。聽嘅時候曾有諗，聲子蟲嘅Live應該會很精彩；至於昆蟲白，唔知道我仲有無機會再睇佢現場玩Live呢。那時候，所謂嘅Covid-19疫情仍未退去。
估唔到，以上事情喺2023年夏天便成真；Covid-19亦突然間好似喺世界上消失。6月30日，聲子蟲訪港作專場演出，邀請昆蟲白擔任嘉賓，仲會玩奏甜梅號作品，簡直係Kinder出奇蛋一次過滿足三個願望！無論如何，一定要去！
我對上一次無戴口罩睇Live係幾時？起碼係3年或更早之前吧，的確仿如隔世。無睇Live Gigs多年，心情有啲緊張，專登喺開場前半小時左右到達，發現場內只得寥寥唔夠30人，莫非香港已無乜樂迷聽Post-Rock？好在其後人流漸漸見多，最終我估計大約有250人進場。衷心感謝主辦單位Neon Lit Music今次邀請聲子蟲及昆蟲白來港演出。
大約8時15分左右，聲子蟲正式出場，玩奏樂隊為今次巡迴演出而寫嘅新作《Radiotherapy》，一首帶有Motorik節奏嘅樂曲，風馳電掣下，出現一波又一波嘅後搖滾爆炸位，很容易帶動觀眾投入其中，全部人都輕輕地搖頭擺腦，動作唔會過份張揚，有時會合上雙眼感受，呢啲都係聆聽後搖滾Live常見嘅現場畫面。
我非常期待嘅《燃燒的字》，其後好快後登場。前奏一響起，唔少觀眾歡呼，睇嚟呢首作品已成為聲子蟲飲歌。現場版無令我失望，就跟聽碟一樣充滿架勢，鼓同低音非常突出，但又唔會搶去電結他風頭。《燃燒的字》聲子蟲已玩奏了多年，期間不斷演變，而家呢個版本，相信係佢最完美嘅終極形態吧。
聲子蟲玩Live，表現得非常冷靜，佢哋全場無講過一句話；當玩奏樂隊另一經典《時雨》時，柯志明更索性坐底彈結他，但完全無損音樂張力，配合雨水聲效及燈光效果，帶出樂曲喺沉穩背後嘅千言萬語情緒。
《時雨》完結後，昆蟲白便靜靜地登場，先嚟一首《瞬間》—— 亦係全場Live唯一有主唱嘅歌曲，但《瞬間》本身有著長長音樂演奏，亦係好Typical嘅後搖滾風格。然後係一連三首甜梅號作品《一個人的水道》、《敲響的鐘》（香港專場獨有曲目）及《黃昏鹿場》。《一個人的水道》一開始我幾乎認唔到，編曲有所改變，但結他爆炸位一出，20多年前種種老舊回憶，再次湧現上心頭。
昆蟲白／甜梅號嘅作品，明顯同聲子蟲有啲唔同，雖然大家都係玩Post-Rock，但昆蟲白有一份跳脫、躁動感覺，連帶令聲子蟲為佢伴奏時，亦多添一份衝勁。呢啲先係真正嘅Crossover合作。
聽Post-Rock咁多年，我一直都問一個問題：點解我會鍾意Post-Rock？聽完呢一晚聲子蟲同昆蟲白演出後，我終於明白喇。原來我一直問錯問題，我應該問：點解我唔可以鍾意Post-Rock？就算呢種音樂，注定唔會有太多人鍾意，無問題吁㗎，只要我能投入其中就可以。而我相信，呢一晚在場所有樂迷，都有同一想法。
最後聲子蟲奏出明亮嘅《印象派》，安歌時段再玩多首早期作品《津梅棧橋》作結，一切已非常滿足。雖然呢一晚樂隊缺少成員盧律銘，佢哋也無玩《真面目》內我好鍾意嘅《大地的繼承》，但我已無任何投訴了。如果真係貪心啲，我希望，昆蟲白好快可以再來香港作專場演出啦！
