過去幾年，一切來得太快。從2019年6月我第一次聽到粉紅A《香港香港》，到上星期六2024年8月24日樂隊舉行「今天一切正常」音樂會，才不過五年時間。
過去五年，我重頭開始細聽粉紅A所有歌曲、PM樂隊告訴我有幾鍾意佢咃、開設個人樂評網站、愛上了粉紅A偶像「楊將軍之苦茶」，然後到今天呢篇Live Review。
因為以前錯過了粉紅A太多太多，今晚我決定乜都唔影乜都唔理，由第一首《如平常渡過每天》，全程投入佢哋嘅音樂之中。
粉紅A+1
Tim嘅電結他果然名不虛傳，幾乎每首歌Solo都展現出佢嘅重金屬魂。Rodney全晚甘願做副手，但由佢負責嘅《體育》末段結他獨奏，仍然非常動聽，非常Timeless。主音Hayden一舉手一投足充滿魅力，有點似Jarvis Cocker；Yvette專心彈Bass及和唱，低調中仍見搶鏡（萬綠叢中一點紅）。還有客席女Keyboard手Suzie助陣，同樣上鏡搶Fo。
音樂會全長近2小時，以獨立樂隊Live Gigs而言屬偏長，好多我喜愛嘅粉紅A歌曲都有出現，當然仍然有遺珠。不過能現場聽到《這個炎熱的夏日早上》、《如平常渡過每天》、《潮濕》、《再見》已非常開心，還有全場大合唱嘅《香港香港》、《若世界在明日結束》及《粉紅色的心》。不過今天再聽《若世界》，卻感覺有點不是味兒，呢首歌已經一去不回頭，屬於過去式了。
粉紅A當晚發表兩首新歌。眾成員換上白袍玩奏《心形寶鑑》（或身形寶鑑？），末段有一段長長音樂演奏，Synth琴音彷佛呼應樂隊早期作品《不日公映》，期待稍後推出錄音室版本細心再聽。
關勁松
另一首新歌《容我送上最後的》，成為當晚音樂會兩大感動位之一，那是獻給已故AMK成員關勁松嘅悼念曲。阿松一直係粉紅A忠心樂迷，當年已喺《mcb》力推，可惜年少無知嘅我錯過了。歌詞中出現「不設劃位」已教人觸動（註一），Hayden唱到末段一句「我的一個偶像／為他是甘願」終於忍唔住喊出嚟。粉紅A，何嘗也不是AMK嘅忠心樂迷呢。
楊將軍之苦茶
第二個感動位，當晚未必好多觀眾知道，但粉紅A及現場兩位觀眾一定感受到。當Hayden講佢地準備第一次現場唱Cover，仲要係唱英文，我已開始已雞皮。果不其然，粉紅A隨即翻玩了佢哋偶像「楊將軍之苦茶」一曲《Coming Home》。音樂響起嗰一刻，你可知道我心情有幾激動？
過去幾年，我不但成為粉紅A忠心樂迷，更成為楊將軍之苦茶True Fans。2022年，楊將軍復刻樂隊第二張EP《Contempt 輕蔑》，一年後再推出實體盒帶，將絕版30多年嘅音樂重見天日。此前我從未聽過楊將軍，但一聽便完全愛上。佢哋神奇地將所有我喜愛嘅80年英美獨立音樂元素融和一起，提煉成樂隊獨一無二風格。據知Yvette當年會寫信俾楊將軍，我呢幾年就不斷寫楊將軍樂評；雖然遲了30多年，最終我同粉紅A一樣，瘋狂迷上同一隊樂隊。
不可以沒有你在場
如此出色音樂，何解得咁少人聽過？楊將軍曾表示移民限制佢哋發展，當年錄製及發表音樂並唔容易，資訊流通亦唔發達（註二），種種原因導致樂隊成為滄海遺珠。但我從來認為，出色嘅音樂，唔一定同唱片銷量或Spotify聆聽次數掛勾。
2024年8月24日這一晚，粉紅A選擇Cover《Coming Home》，場內大部份觀眾未必認識呢首歌，但起碼有兩位例外 —— 楊將軍之苦茶Patrick及Annie，當晚也在現場，聆聽佢哋嘅忠心樂迷，玩奏自己嘅作品。這一刻，全世界突然停頓下來，眾人回頭望一望，發現楊將軍之苦茶存在，十分閃耀，The darkest light will always shine。
衷心感謝粉紅A，讓我親歷呢個Magic & Touching Moment。我哋從來相信，楊將軍之苦茶，值得讓更多人知道，粉紅A作為最忠心嘅樂迷，這一晚做到了。
我不能同意今天一切不正常
音樂會完場曲是《今天一切正常》。《今天一切正常》其實係《不能同意更多》嘅兩生花，兩首歌必需一次過聽，才感受到粉紅A用意。還記得1988年達明一派描寫移民潮嘅《今天應該很高興》，填詞人潘源良特別加上「應該」一詞，代表我哋大家其實唔高興。不過來到今天，已毋須再用這種修辭手法，只要直白高呼今天一切正常，今天很高興，大家已心神領會，不能同意更多。寫到最後，我不厭其煩直白講多一次：多謝粉紅A仝人，Hayden、Yvette、Rodney、Tim，多謝你哋。
註一：《不設劃位》乃阿松當年跟另一同已離世嘅Minimal成員亞里安主持嘅商台音樂節目。
註二：楊將軍之苦茶2位成員Patrick和Eric曾經同劉以達組成DLLM，後來樂隊解散，二人移民加拿大，同Annie合組楊將軍，1988年自資推出首張EP《Heatwave》；1990年加入色士風手Franco，發表《Contempt 輕蔑》。兩張作品當年曾在港發行，但數量極少，認識佢哋嘅樂迷唔多，但有聽過嘅都讚不絕口，令楊將軍成為謎一樣傳奇樂隊。
