《窄路微塵》女主角袁澧林講過，《窄路》唔係一齣一開始就火力全開、劇力萬鈞嘅電影；但電影嘅開場，我認為極具Powerful感染力 —— 由黃衍仁負責、孤獨但溫柔嘅主題音樂《微塵》襯托底下，男主角張繼聰飾演嘅窄哥Full Gear出場 —— 搞清潔。張並無任何對白，只聽到佢嘅喘氣聲，有過一刻融入《微塵》內，成為樂曲節拍一部份。工作完畢除下裝備，佢終於可以唞一啖氣，飲好多啖水，抽一口煙。
電影開場一幕，表達出大部份香港人幾年嚟嘅心聲 —— 我哋都被壓到唞唔到氣，我哋只想唞一啖氣。
活在口罩下
《窄路微塵》上映之際，香港終於對疫情解封，但口罩令仍未解除。疫情呢三年以嚟，越到後嚟，每次當我睇任何影視作品，以至Youtube劇情短片時候，片中主角配角都無戴口罩，見到晒眾人靚樣或衰樣（唔係講岑珈其）。我當然明白係拍攝需要，但同時有一份既懷念又有點疏離嘅感覺。全因現實生活中，我哋香港人已戴足三年口罩，而且仲要戴落去。
而《窄路微塵》，可能係呢三年嚟，第一齣男女主角大部份時間戴口罩拍攝嘅港產Feature Film。
三年疫情反照
《窄路微塵》嘅好，真係好似女主角Candy一句對白：可以有一千粒星星咁多，我嘗試盡量一一寫下來。坊間早已有不少評論大讚男女主角、童星董安娜及區嘉雯演得自然，兩段母子情（窄哥與老媽）及母女情（Candy與細朱）亦描寫得深入細緻，在此不贅。片中頻繁出現香港呢幾年嚟面對疫情嘅種種情景：滿街吉舗、健身室封場、炒口罩蒸口罩、小朋友用Zoom上堂、仲有少不免一定要觸及嘅移民潮……身為香港人，定必感同身受。
《窄路微塵》對白精簡，好多時點到即止，餘下就用畫面、配樂去交代。導演林森深明多未必佳，擅長用留白手法講故事，令電影充滿餘韻，好多地方都令人細味回味。當然，片中仍然避免不了需要金句：「個世界閪，唔代表你要做個閪人！」但窄哥對住Candy爆出呢句Soundbite前，劇本對白係有漸次推進，並非為爆而爆，屬可接受範圍嘅經營。
配樂呼應
《窄路微塵》配樂同樣出色，早前更贏得台灣金馬獎，呢方面同樣已有唔少評論提及；黃衍仁同林森一段多年情誼，自然亦有被傳媒放大。個人而言，我十分欣賞片中配樂就同對白一樣點到即止，沒有過多及過火，安份地服膺於電影情節所需。音樂上，亦係多年嚟獨立樂迷認識嘅黃衍仁Style，簡潔但有力量，多添一份溫暖，同《窄路》非常匹配。主題曲《在路上》翻玩十多年前Wilson Tsang作品，由獨唱變成黃衍仁跟611男女合唱，「在路上有一暗淡的出口 / 每一小步仍在努力尋求 / 生活裡百般的荒謬 / 哭訴的眼眸 / 仍在雨夜殘留」。歌者二人化身電影男女主角，藉著旋律歌詞，呼應緊佢哋卑微嘅生活。
生活很苦，但你要甜
《窄路微塵》中窄哥同Candy嘅卑微生活，就如窄哥一句自嘲金句：連微塵都不如。記憶中，《天下無雙》入面嘅梁朝偉，亦講過差唔多同樣對白。雖然卑微，但兩位主角喺林森同編劇鍾柱鋒努力營造下，一直嘗試去努力生活。電影唔少場景發生喺夜晚 —— 亦即清潔工人嘅工作時間；不過仍會出現陽光普照、香港海景（現實中 / 畫作中）、雀鳥飛翔、窄巷盡頭有一扇窗……甚至連溫馨老土吹泡泡場面都有包括在內（雖然係用抹窗刮吹）。凡此種種，會唔會過份美化卑微貧窮？
我相信，呢個係導演林森嘅選擇，無話一定啱定錯，最重要係點樣呈現拿捏同平衡。其實，《窄路微塵》仍有唔少陰暗慘情篇幅 —— 清潔工人，本身已係厭惡性工作；仲有劏房、高買、獨居老人……亦經常聽到張繼聰唉聲嘆氣，更試過我是憤怒Rock Star上身掟爛所有嘢。如果以足球比賽比喻，電影全場115分鐘「善良」同「悲慘」兩隊控球率大概為六四比，都唔算一面倒啦。
《窄路微塵》如此定調，相信能令觀眾感受到苦中一點甜嘅重要道理。阿媽當然係女人，惟現實要做到並唔容易，唯用電影去實現。所以片中袁澧林每一場都換一個Look，著到花枝招展，有晒Dressing Style，驟眼睇好似唔太現實：窮人邊會著成咁？我會反問：窮人點解唔可以著成咁？中產文青既然成日感恩乜乜物物小確幸，唔通基層窮人就唔可以？
歡迎光臨土瓜灣
最後，我十分感謝林森，《窄路微塵》將我記憶中嘅土瓜灣帶回來。以往唔少港產片都有嚟土瓜灣取景，但論出鏡率《窄路》一定最多。呢度唔會有荔枝窩大澳下白泥咁美麗動人嘅隱世美景，但一直充滿地踎活力。十三街、舊機場隧道入口條窄窄天橋、仍然未執但無乜人打卡嘅永香冰室、紅蘋果街市後面嘅舊街內衣小店……當睇到一幕幕熟悉不過畫面，心入面不期然地說：我記得呢度、我細個成日經過呢度架。
當然，今日嘅土瓜灣，同我童年時候已有好大轉變。Candy企喺十三街舊樓天台望過去嘅舊啟德機場海景，已變成郵輪碼頭。好多工程正在進行中，代表昔日嘅土瓜灣，以至香港，已返唔到轉頭了。土瓜灣算唔算最窮地區之一？同電影中同樣有出現嘅深水埗石硤尾相比又如何？《窄路微塵》兩位主角算唔算社會上最窮一群？起碼窄哥唔係，佢叫做有層公屋有瓦遮頭，亦可以請細朱食西餐慶祝生日。細個時候記得屋企每逢過時過節都會斬料加餸，星期日爺爺或爸爸亦會帶我坐5號巴士去尖沙咀海港城Peter Pan玩具店睇玩具。呢啲幸福回憶，就同連接海洋中心及海港城之間嗰條長長穿梭大道一樣，至今我仍然清楚記得。
感謝林森。《窄路微塵》令我聯想起唔少名導嘅作品風格，就如堅盧治鏡頭下嘅低下階層、是枝裕和嘅日本、楊德昌嘅台灣、Mike Leigh嘅英國、John Carney嘅《一奏傾情》，同樣走入城市，呈現人性，觸動情感。請林森唔好介意我將你同幾位大師、名導放在一起。「我相信你可以的。」
