喺樂評已死嘅今日，大家係點樣接觸新音樂？單純靠Youtube、串流平台嘅大數據「猜你喜歡」推薦？咁樣好似太懶惰。我比較守舊，主要都係靠身邊音樂朋友推介，又或嘗試聆聽同自己喜愛樂隊 / 歌手有關聯嘅單位，我覺得咁樣會較易搵到「猜我喜歡」嘅音樂。
3年多前，因為自己好鍾意嘅台灣樂隊風籟坊復出，不時留意佢哋嘅社交平台，從中發現「淺堤」（Shallow Levée）樂隊。淺堤同風籟坊低音結他手戴子一樣，同樣嚟自高雄，三男一女嘅四人編組（主音兼結他手依玲、結他手紅茶、低音結他手方博及鼓手堂軒），屬典型搖滾樂隊編排。佢哋亦同風籟坊一樣，同時以國語及台語寫歌。
記得第一首聽淺堤嘅歌曲係《永和》，單睇歌名以為講永和豆漿，當然我只係從一個香港樂迷去睇，呢個亦係我嘅認知局限。後來先知道，呢首歌係主音依玲描寫「北漂族」（從台灣其他省份前往台北打拼），據知台北永和區就係好多「北漂族」落腳嘅地方；淺堤四位成員中，方博同堂軒已搬去台北，所以《永和》同樣係樂隊寫俾自己嘅心情記錄。
身為台灣局外人，我當然未能完全明白並了解「北漂族」嘅心情，就如當日聽林強《向前走》一樣；但單純從音樂角度欣賞，《永和》以話係淺堤嘅標誌作品，擁有鮮明嘅低音同節奏，電結他彈奏搶耳但唔會過猶，依玲嘅聲線好溫柔，但又唔會太過文青。或者咁樣講，淺堤本可安於本份做一隊小清新樂隊，但佢哋唔想只係咁樣。呢方面令我想起香港嘅WHIZZ。
後來重聽返淺堤早期EP《湯與海》，更引證我嘅睇法。好鍾意碟內兩首作品《魯冰花》同《叨位是你的厝》，仲有佢哋處女作《Demo. 1》內一曲《怪手》，末段同樣擁有長長音樂演奏，隨心所欲地Jam，呢種曲式，來都點中我嘅音樂死穴（正面比喻），萬試萬靈。
淺堤喺過去3年嘅Covid-19大封閉時代，推出過兩張錄音室專輯《不完整的村莊》及《婚禮之途》。疫情可能有所阻礙，但唔能夠阻止佢哋進化成長。2021年嘅《婚禮之途》，係樂隊成熟之作，亦係佢哋三十而立嘅反思。音樂上的確比以往Mellow，但唔係為遷就商業市場而改變（事實上《婚禮之途》係樂隊獨立眾籌而錄製完成），而係樂隊眾人成長後嘅自然轉化。
《婚禮之途》一碟，我最鍾意低音結他手方博創作嘅《西邊》，歌詞可以話概括咗整張專輯嘅自省取向。「我忘了我，我忘了我／是為什麼而活／活，活在空蕩的地球」；當然，亦因為歌曲末段都有一段精彩嘅音樂演奏。早前淺堤亦推出方博主唱嘅版本，編曲較Raw較Rock，唔知佢哋來港演出時，會由邊個演唱呢首歌呢？
無錯，淺堤會喺今個星期五（8月4日）來港演出。喺樂評已死、串流音樂平台主導嘅今日，發掘自己喜歡嘅音樂，實在比以往方便、直接得多，最重要係靠你自己嘅耳朵同感覺。所以呢篇文章其實無乜意思，最重要係俾未聽過「淺堤」嘅你，知道佢哋存在而已；其他內容，你可能不盡同意，甚至不值一晒，甚至嗤之以鼻OK Alright無問題。不過我一直相信，Live Gigs對樂隊／音樂人嚟講好重要。如果喺串流平台聽過淺堤嘅音樂覺得唔錯，不妨入場睇佢哋嘅Live，睇完後，可能你會更鍾意佢哋呢。
