上一篇寫台灣「聲子蟲」新碟，佢哋的確教我回想起昔日沉迷Post-Rock自憐但美好嘅日子。通常，美好嘅事物總有好幾個面向，嚟自香港嘅4人樂隊「浮森」（Fusen），佢哋最近推出同名處男純音樂作品《浮森》，就令我連結到Post-Rock嘅另一面。
網上有關浮森嘅資料唔多，樂隊嘅Instagram至今只有7個Post；上Youtube搜尋，發現佢哋2019年曾參加「香港亞太區青年樂隊大賽」香港區選拔賽，現場玩奏過一首純音樂《醺酣》。撇取錄音質素問題，單憑呢首2年前嘅作品，已大致聽得出浮森嘅風格，係屬於清新後搖滾。
清新後搖滾，其實係我自創嘅音樂類別（一笑）；代表樂隊有當年自己十分沉迷嘅Contriva，好鍾意佢哋嗰啲清爽、乾澀嘅簡約結他和弦彈奏；仲有The Sea And The Cake、Pullman……以及早期嘅Toe（日本）。尤其難忘Toe喺處理鼓同低音Rhythm部份嘅準繩同計算，喺Post-Rock以外滲出點點Math Rock氣息。
《浮森》一曲，真係好似早期嘅Toe。全曲流麗而明亮嘅雙結他彈奏，搶耳之餘，中間幾個轉折位都編排得好好，有一份隨心所欲、捉摸不住嘅Fusion味道，同時感受到4位成員Herbert、Rightkin、Kwan、Onion之間嘅合拍同默契；樂曲到後段亦漸鋪排一段高潮位，然後回歸寧靜，感覺一氣呵成，一切盡在計算之內，精彩。佢哋仲為呢首作品配上一首詩，透過文字（及文字砌成嘅圖像），表達一份浮游不定、亦走不出困局嘅感覺，同樂曲本身好相襯。
處男作嚟講，《浮森》同名作，絕對係驚艷之作。就算係無主唱、無歌詞嘅純音樂，一樣可以十分旋律化，能牽動聽者思緒。期待浮森日後會有一張完整專輯，更全面地展現佢哋嘅音樂才華。喺香港，純音樂一直唔算普及，但觀乎近年多咗Indie樂隊行呢條路，好似Room307最近就聯同Matt Force及Akira Mimasu發表純音樂專輯《涼風有信》，前輩劉以達亦表示希望多加推廣Instrumental。努力繼續行落去，總會遇到更多同行，同知音人。
