呢篇係一篇遲嚟嘅《正義迴廊》影評。文章出街時候，相信唔少人已二刷，甚至三刷。如果你真係好鍾意好鍾意呢齣電影，我強烈建議你搵返是枝裕和嘅《第三度殺人》嚟睇。
真實奇案 推理真相
容我穿鑿附會，《正義迴廊》同《第三度殺人》，兩齣電影同屬社會派推理嘅故事格局。社會派推理係乜？源自日本推理小說派別，藉著推理謎題犯案，細意描繪人性種種，從而帶出並批判社會上唔同問題。
狹義嚟睇，《正義迴廊》唔算係傳統推理，電影改編自真實發生嘅香港弒父母奇案，疑犯亦一早存在，似乎失去猜度「誰是兇手」嘅懸念。
不過，推理小說經多年發展，早已玩出唔少新格局，例如東野圭吾名作《嫌疑犯X的獻身》，一開場已講明邊個係兇手；繼後情節，就搵出犯案動機及證據，揭露最後真相。從呢個角度去睇，《正義迴廊》同樣係推理，嘗試推敲首名被告張顯宗（楊偉倫飾）殺害自己父母嘅動機，以及第二被告唐文奇（麥沛東飾）係咪同謀？
密集訊息 挑戰局限
當然，《正義迴廊》電影要講嘅Message，絕對唔止家庭倫理同人格分裂；電影另一重點係透過法庭及陪審團戲份，探討司法制度（電影Tagline係「定斷公義」）。其他涉及嘅社會題材仲有傳媒道德、警權、世代之爭，甚至政見、宗教……等等。我將《正》片歸納為社會派推理，就係呢個原因。
不過，要拍一齣出色嘅社會派推理電影，一啲都唔容易。全因Feature Film受時間限制，就算《正義迴廊》已全長137分鐘，但要喺短短2個多小時入面探討咁多社會問題，如何避免蜻蜓點水，難度極高。例子如日本電影《所羅門的偽證》已分成上下兩Part合共超過4小時，仍難以將宮部美幸原著小說合共90萬字內容轉化成影像，仍有唔少精彩內容慘被刪去，或輕輕帶過就算，十分可惜。
技巧盡現 搏盡無悔
但既然《正義迴廊》選擇以電影去呈現，可以睇得出導演何爵天及台前幕後團隊，已出盡九牛二虎之力，將佢哋好想講嘅Message，一次過拍晒出嚟；並努力用盡唔同拍攝、燈光及呈現手法，例如希特勒場口、大狀／警察／陪審團成員進入兩名被告回憶／案發現場，同二人對話……凡此種種，皆希望能跳出法庭片／奇案片嘅框框，惟究竟一切係戲情所需、藝術表達，定還是整色整水？
對此，坊間已有唔少評論，我無謂加把口；但作為一齣社會派推理電影，何爵天有如此宏大野心及視野係正常不過。眼見港產片市場早已低迷多年，何導接受訪問時亦講過，今次感恩獲監製翁子光全力支持開戲，但自己都擔心日後仲有無機會再開戲，所以要把握今次機會，晒冷一次過講晒佢好想好想講嘅說話。呢一點，我絕對明白並體諒。
不過針無兩頭利，就電影片長所限，《正義迴廊》最大問題係提出太多問題，卻稍欠深入及批判。例如主線張顯宗嘅犯案動機及人性探討，往往被希特拉場口搶去風頭；但其實佢同父母、阿哥同表姐嘅戲份更好睇，亦更重要。另一主線唐文奇究竟有無犯案殺人，相對落墨較多，亦能引導觀眾思考，但一切僅此。反而片中批判傳媒道德呢條支線，篇幅精簡，卻拍得非常有力，尤其欣賞柯驛誼（盤菜瑩子）全程苦瓜乾演出；今時今日嘅傳媒，正是如此無力及無可奈何。
同《第三度殺人》比較
文首之所以提及是枝裕和嘅《第三度殺人》，因為《正義迴廊》嘅唐文奇，同《第三度殺人》嘅殺人疑犯主角役所廣司有類近之處 —— 2人同樣曾改口供，由此「還原」多個唔同嘅殺人「真相」，究竟邊一個先係真嘅﹖2人一個扮儍、一個扮演上帝，效果卻迴異 —— 前者麥沛東「白卡保平安」嘅投入演出，的確夠晒搶戲，但主要仍是服膺電影情節同角色設定；後者役所廣司不停改口供玩謝律師福山雅治，最後更「以身試法」，藉此控訴日本司法制度嘅荒謬。《第三度殺人》亦同《正義迴廊》一樣「貪心」，電影涉及家庭性暴力、黑心食品工業、傳媒，以及是枝裕和擅長嘅家庭兩代溝通；但《第三度殺人》成功在透過兩位男主角做主軸，批判以上種種；相反《正義迴廊》算係群戲，導致批判力度缺乏重心，一次過拋好多問題出嚟，但其實彼此並無太大連貫。
喺我心目中，《第三度殺人》係非常出色、亦係少數成功嘅社會派推理電影。批判以外，電影更令我深深明白到，呢個世上從來沒有真正嘅真相；所謂真相，只係由過去嘅人同事東拼西湊而成，當中包括大量謊言。我哋唯一可以做嘅，係問一問自己個心。你嘅答案，你嘅良知，就喺裡面。而《正義迴廊》俾我嘅感覺，就係片中案件仍未真正水落石出，僅此而已。
延伸拍成劇集，點睇？
既然《正義迴廊》涉獵咁多題旨，加上角色眾多（全部演員都演得好好好好），大可延伸拍成劇集或迷你劇集，咁樣何爵天同編劇可以更圓滿講出佢哋想講嘅嘢，每個角色亦可以描寫得更深入 —— 我想知多啲張顯宗點解會當表姐邵佩瓊（莊韻澄飾）係女神﹖點解唐文奇前女友Mika（鄧月平飾）當日會睇上佢﹖三位大狀周文健、蘇玉華及林海峰約去餐廳食飯，飯局上傾咗啲乜﹖盤菜瑩子飾演嘅記者Kate，最後點解被告上法庭﹖「流浮山刀手」王雍泰飾演嘅O仔，點解唔做警察轉做社工﹖（順帶一提，阿泰有份參與嘅Youtube Channel「香城映画」，短片水準奇高，日後有機會一定要寫寫。）
李英愛．她
最後，因為我鍾意聽歌，電影完場後Roller Credit播出主題曲《活誰的命》（作曲：馮之行；填詞：冬誠𤍤；編曲：馮之行、黃力勤；主唱：洪嘉豪），我有聽到及睇到最尾才離場。歌曲有一份浮游捉摸不住嘅感覺，同電影氛圍好相襯，我諗起黃耀明嘅電子流行曲風格。另全片最令我驚喜一幕，就係前Crazy Lion / Sensi Lion主音MouseFX阿鼠客串演出！你要製造這個嘅騙局趁我去放鬆／製造我最脆弱時候好讓你去拆了那鐘／ 還拆我帳篷／拆我帳篷。如果電影票房最後破4,000萬港元，慶功宴一於請阿鼠同朱凌凌上台Jam歌啦！
