時間真係夾都無咁啱。今年1月，劉以達開始喺Facebook撰寫官方回憶錄《方丈尋根記》系列，大家都睇得好開心，好似返番去以前追翡翠劇場咁；早排達哥寫到佢第一隊樂隊DLLM組成經歷時，反應尤其熱烈（DLLM呢個樂隊名真係無得輸）。
同樣係今年1月，DLLM另外2位成員Eric Tam同Patrick Chan後嚟返加拿大夾嘅另一隊樂隊「楊將軍之苦茶」（Bitter Tea Of General Yeng），事隔逾30年後終於將佢哋昔日經典作品放上串流音樂平台（多謝粉紅A同袁智聰出Post公告於世，咁大件事當然值得有人講）。
記得當時年紀小，由Eric、Patrick、Patrick家姐Annie喺上世紀80年代末組成嘅楊將軍之苦茶，當時我係完完全全錯過咗，只隱約記得《年青人周報》有作者寫過樂評。對我嚟講，楊將軍係迷一樣嘅樂隊，只聽其名不聞其聲，一直好想搵返嚟聽。但佢哋當年只出Cassette，數量亦唔多，窒礙咗保存流通（我好憎Cassette成日食帶）。網上有關佢哋嘅資訊同樣匱乏，令樂隊更添神秘傳奇性。
網絡科技從來係雙面刃，只要好好利用，的確有助資訊保存流通。2022年今天，能夠透過串流音樂平台聽到楊將軍之苦茶1989年推出嘅《Contempt 輕蔑》E.P.，感覺好比Bucket List完成一件未了事一樣興奮。佢哋嘅音樂亦無令我失望，比我想像中更出色。
我應該點樣去形容楊將軍之苦茶嘅音樂好呢？Patrick嘅唱腔令我想起Llyod Cole / Bryan Ferry？佢嘅低調電結他彈奏令我想起80年代英倫Post-Punk樂隊？Annie嘅氣氛化鍵琴彈奏常有點石成金之妙，令我想起Japan時期嘅Richard Barbieri？Eric將真鼓電子鼓混合處理，令歌曲多添一份電氣色彩？《Contempt 輕蔑》碟內加入第4位成員Franco吹色士風，令歌曲多添一份神秘藝術氣息，可媲美Tuxedomoon，甚至Paul Quinn & The Independent Group？
其後，發現自己寫咁多都係口水多過茶，遠遠唔及達哥四字形容咁精簡到位：「獨立創新」—— 呢四個字本來係達哥回憶錄中提及DLLM嘅音樂路向，但用喺楊將軍之苦茶同樣適合，佢哋將好多唔同音樂元素兼收並蓄，形成樂隊自己嘅個性風格。
不過，楊將軍未有跟從DLLM另一音樂路向選擇：「堅持原創純音樂」，改為玩奏有旋律歌詞主唱嘅歌曲。Partrick筆下旋律，唔係瑯瑯易上口嘅Catchy流行曲Style，但聽多幾次，你會好自然跟住唱，有一份靜靜雞Hook住你嘅魅力，同佢哋低調唯美嘅風格好相襯；而我認為《Contempt 輕蔑》入面Franco嘅色士風演奏亦十分重要，提升咗樂隊嘅音樂層次。第一首《Two Or Three Things I know About Her》感覺浪漫，同時又係一首令人陷入沉思嘅作品，色士風一出，呢份感覺尤其強烈。
《Long Hazy Summer》開場恍如占士邦電影配樂，電結他、Keyboard、色士風同鼓各守其位，合力營造出呢份耐人尋味氛圍。歌曲中後段嘅低調電結他彈奏唔算複雜，但堅係十萬個有型，百聽不厭。《Blue Period》同樣擁有令人難忘嘅結他Solo及一段長長音樂過門，充滿思潮起伏，感染力極強。最後一首《Coming Home》，Intro非常中式唯美，成首歌低調得嚟更帶點點迷幻氣息，全靠Annie嘅Organ彈奏貫穿全曲；最後副歌更出動Bah Bah Bah大合唱，將歌曲推上最高潮頂點，毅然結尾，感覺十分圓滿，但又意猶未盡，決定馬上按「Repeat」制，再聽《Contempt 輕蔑》多一次、兩次、三次……
楊將軍之苦茶，30多年後今天終能一償所願飲得到，完完全全係我杯茶，恨不得時光倒流回到80年代，叫當年嘅我無論如何一定要買到佢哋嘅Cassette。楊將軍之苦茶明顯同達哥後嚟組成嘅達明一派有所分別，從一開始，楊將軍已決定走另一條路，佢哋注定唔會打入主流，亦無呢個需要。楊將軍嘅音樂，係想話俾大家知，流行曲Pop Song並非來來去去只得一兩種公式；達明一派已係主流中嘅另類選擇，楊將軍更加偏鋒，正因為無任何商業流行包袱，佢哋創作嘅流行音樂，同主流相比，明顯別樹一格。當然無話誰比誰高尚，不過只想話你知，流行音樂，可以咁玩都得。多一個選擇，多一個可能性，比起只得一兩個你揀，唔係更好咩﹖
網上翻查資料，《Contempt 輕蔑》理應仲有2首曲目《Technicolour》及《3 Minutes》，但唔知點解今次「Reissue」只得4首歌。另外楊將軍之苦茶之前已有自己Bandcamp網頁，Patrick亦有佢嘅Youtube Channel，並已將樂隊處女專輯《Heatwave》內2首歌放上網供諸大家欣賞（好有Jangle-Pop / C86風格）。期望Patrick日後會將餘下作品公開，楊將軍之苦茶嘅音樂，絕對值得更多人認識、聆聽、欣賞。
