20年前嘅我，何解會鍾意《林一峰的床頭歌》？確實原因已唔太記得喇；但清楚記得當年真係放喺床頭聽，陪伴我入眠或失眠。
20年後今天，毫無預警之下，一峰推出《林一峰的床頭歌～失眠二十年》，重玩一次碟內所有歌曲。專輯早已登陸串流平台多時，亦有推出實體版CD。何解佢有呢個決定？
今年2月份，一峰曾舉辦兩場迷你發表會，分享專輯背後嘅意義；下周末佢亦會返香港，連開五場「林一峰失眠二十年音樂會」，相信到時候，佢會再講多次《床頭歌》一碟對佢嘅意義。
對我而言，《林一峰的床頭歌～失眠二十年》又有甚麼意義？音樂製作上，喜見一峰嘅認真 —— 香港好多Reissue專輯都係主打Hi-Fi友市場，標榜重新靚聲混音乜乜乜；外國嘅Reissue一般會加多一大堆Side-Track同Demo，其實都係炒冷飯之舉。所以我好欣賞一峰選擇第三種Reissue方式 —— 將20年前嘅《床頭歌》作品，重新編曲及演繹多一次。
改變．不改變
自己翻玩自己歌曲，香港樂壇好似比較少見，印象中有謝安琪早期精選《The First Day》；我好鍾意嘅日本樂隊Clammbon亦經常咁做，所以今次也樂見一峰此舉。但可能因為《床頭歌》實在太經典，《失眠二十年》內好幾首新版如《雪糕車》、《鞦韆》、《青草地 溪水旁》、《The Best Is Yet To Come》等都選擇唔做太大改動，仍然保留原曲綠油油Folky氣息。開場曲《突然獨身》新版主要改動在Vocal處理，加入更大量和聲和唱，一峰嘅演繹亦奔放得多，更強調「I'm happy and single」一句歌詞，將舊版嘅自憐傷感完全減退，變成一首開心失戀正能量歌曲。
編曲明顯唔同嘅作品，包括有《1 & 2》、《我的日記》及《19》。《1 & 2》加入點點Bossa Nova元素，令全曲更加懶洋洋；《我的日記》就多了一份遊樂園色彩，感覺更熱鬧，也更溫暖。《19》改動最大，除歌名變成《19 Forever》，更由結他轉為鋼琴主導，一峰亦唱得異常沉重，20年前嗰份青蔥歲月成長傷感，20年過後，演變成一份茫然，同無力感。
相同感覺亦出現喺《追憶》一曲，20年前版本，我曾如此形容：「喺簡約結他和弦下，原本濃得化不開嘅傷感歌詞，現已沖淡成薄霧一片嘅淡淡哀愁，多咗一份冷靜過後嘅勇敢面對想法。」20年後，一峰選擇還原歌曲原有情感，同原作者林子祥差唔多40年前嘅原版相呼應；我相信呢個亦係一峰20年後選擇重新演繹《床頭歌》多一次嘅原因，從歲月成長，回望過去，更加了解今天嘅自己。
和你在一起
所以一不離二，一峰上月中亦推出「新碟」《在一起》，內裡重玩多首20多年前佢同少爺占／林二汶／3P合作嘅歌曲，大部份歌曲原版可以喺《少爺占廣播劇音樂全集》搵到（串流平台有）。當年我無追少爺占廣播劇，亦只喺電台輕輕聽過3P嘅歌，先天上自己對《在一起》大部份選曲沒有年輕時回憶，但相信不少一峰／少爺占Fans，會對呢批重新演繹歌曲有千頭萬緒感覺。
有趣係一峰日前公開同少爺嘅Whatsapp對話，原來少爺占都唔記得自己有份填詞（記憶海綿禮出錯）。不過唔記得／未聽過都唔緊要啦，當新歌聽也無妨。而家串流平台當道，大家可以學我一樣，將新舊版本集合埋同一個Playlist聆聽，感覺會幾有趣。
19 Forever Sleepless With You
我發現，無論係《床頭歌》同《在一起》嘅新版舊版，都不約而同收錄《19》；換言之呢一首歌前後共有4個錄音室版本之多。記得當年聽《床頭歌》時候，我最鍾意就係《19》，覺得佢同The Smiths嘅《Hand In Glove》有異曲同工之妙。20年後重聽，彷如預言書一樣，看見今天嘅自己。
我仲記得，20年前曾「拆巨資」買下Apple第三代iPod，40GB容量足夠我將家中所有CD轉化成MP3 / AAC，讓我可無時無刻隨時隨地聽歌，包括臨瞓前放喺床頭聽。我更會自製Playlist，喺《林一峰的床頭歌》原有10首曲目後加入第11首《Sleepless With You》，即係一峰翻玩At 17《陪你失眠》英文版。
一直認為，《Sleepless With You》先係《林一峰的床頭歌》真正完場曲，只不過無收錄其中而已。而《床頭歌》專輯嘅意義，就係陪伴每一個失眠嘅一峰樂迷。一峰亦有提及，重錄《失眠二十年》時曾打算加入此作，但最終抽起，我覺得都係好事。「永遠有一個吻未嘗，有些燭光未燃亮」。一峰，多謝你咁多年嚟，陪我哋失眠。
