Youtube嘅興起，無疑造就咗好多所謂大師網上9up，其實講來講去去三幅被，唔少更係持老賣老，作風令人非常反感；聽完之後，唔使點分析，都知係廢話。但近日有一位真正大師，佢一段新嘅訪問片段，喺恆河沙數嘅Youtube短片入面，寧寧捨捨彈咗出嚟。睇完之後，你會知道，乜嘢係至理名言，值得一睇再睇。如果大家上Youtube都係睇呢啲咁有營養嘅片，個世界應該唔會咁反智。
講咗咁耐開場白，有睇過嗰段訪問片嘅朋友，應該知道我講乜。唔知我講乜嘅話，請立即馬上去睇：《鏗鏘說：登「峯」造極》，由蘇玉華訪問杜琪峯。
訪問入面，杜Sir同我哋分享咗好多佢對香港電影嘅睇法。好多內容，杜Sir都曾經喺2013年《無涯：杜琪峯的電影世界》紀錄片度，講過差唔多同樣說話。呢條片之所以咁Hit，其中一個原因，正正係杜Sir不點名回應早排有明燈一口咬死「香港電影已死」，呢方面好多Page都有評論，甚至Cap圖瘋傳。事實上，呢段訪問的確金句連連，好值得大家Cap圖留底，作為鼓勵自己嘅人生左右銘。
無錯，杜Sir喺訪問度講嘅嘢非常正能量。本人本來對正能量啊、充滿熱血嗰類東西有啲抗拒，因為好多時都係講埋啲好虛浮、毫不實在嘅行貨對白，好聽啲叫心靈雞湯，其實只係「阿媽係女人」、「希望在明天」之類嘅扮劉青雲語錄。不過杜Sir叫香港（從事電影拍攝嘅）年輕人唔好放棄，簡簡單單一句鼓勵說話，背後係有實實在在嘅論據同經驗去支持：佢話佢40歲先創立銀河映像、邵逸夫50歲先創立邵氏；佢廿幾年前已聽人講「香港電影已死」聽到而家……年輕人，又或者所有人，只要我哋願意的起心肝去做，未來仍然有好多時間，俾我哋付諸實行。如果一日唔開始做，就一日都嫌太長。對平凡眾生嚟講，會特別受落杜Sir臨尾再包多一句：就算目標達成唔到，至少你對自己有交代。
但，請記住，杜Sir嘅前設係：你一定要好努力、好有信念地去做先得。千祈唔好自欺欺人，做咗少少就話好難，然後放棄算數。
無錯，而家嘅（香港）電影，的確好難，好多人決定放棄算數。但杜Sir話你知，留低嘅仍然有好多嘢可以做。佢喺訪問中後段，講咗好多practical方法，用佢以往拍合拍片嘅過來人經驗，話俾大家知，唔好硬碰，而要靈活變通。好多人成日話自己好嬲，又話唔知可以做啲咩……一切都係藉口嚟啫，又或者懶，無去認真思考未來條路點行。訪問入面嘅杜Sir，就好似阿媽教仔咁，你唔識唔緊要，我捉住你隻手仔，一步一步教你可以點做。
杜Sir嘅方法，真係好簡單，你可以話知易行難，但我見唔少年輕人都做緊，唔止電影，其他範疇都有人做緊（試當真）。所以，請各位廢中廢老唔好再俾藉口自己喇。訪問結尾，蘇玉華毫不意外將話題由電影拉去香港，杜Sir亦俾到一個好有智慧同啟發嘅答案我哋；其實成段訪問，杜Sir嘅對答，都係回應緊香港，甚至可以再拉遠多一啲，係講緊我哋應該點做人，點樣做一個忠於自己嘅人。
杜Sir同拍檔韋家輝好多電影作品都談及宿命，大部份都寫得幾灰，睇到令人非常沮喪，咁當然有例外。所以佢揀咗《柔道龍虎榜》，送俾今日嘅香港人：「柔道最重要係企得起身，撻咗落地，企返起身咪得囉。就係不停咁去戰鬥。」
最後，睇完呢段訪問，強烈建議大家立即馬上睇返（或重溫）《無涯：杜琪峯的電影世界》，以下係呢套紀錄片入面部份金句：
「嗰個靈感，係嚟自一種迫力（壓迫感），好緊要。」
「我哋係要經歷咗，我哋先至有一個solution（解法方法）。」
「其實我哋應該讓年青一代去尋找未來。我哋應該支持呢一代人，去創出佢哋嘅（電影）路線。」
～《無涯：杜琪峯的電影世界》
（原文2021年3月15日喺「紳吟」Facebook上載）
