2022/23年球季，隨著英超冠軍曼城喺歐聯決賽有驚無險1:0小勝國際米蘭後，終告完結。觀乎藍月亮今季超高水準表現，能成為繼曼聯後英超第2隊3冠王，自然毫不令人意外。我諗起Radiohead一曲《No Surprises》，單睇歌名已說明一切，惟口裡說不感驚訝，心裡卻有萬般滋味在心頭……
講到No Surprises，其實自曼城喺歐聯決賽前一星期嘅英格蘭足總盃決賽擊敗曼聯後，當時筆者幾可肯定藍月亮會「食住個勢」贏埋歐聯。我估中個結局，但估唔中個過程。論決賽表現，國際米蘭為球迷帶來驚喜，Surprise地不落下風，相反曼城卻踢得有點患得患失，可能壓力太大。但成王敗寇，贏波就係贏波，懶理你贏得漂亮或醜陋。
說到更深層次嘅No Surprises，筆者作為曼聯終身球迷，自從眼見阿聯酋富豪蒙蘇昔日入主曼城，以及英超史上最偉大領隊費格遜宣告退休後，呢十幾年嚟，親歷紅魔盛世衰落，愛隊浮浮沉沉一直無復當年勇。相反「嘈吵鄰居」已取代曼聯成為英超班霸，哥迪奧拿上任後更見強勢，就算今季佢哋贏唔到歐聯，但單計英超3連冠，已完全追上費Sir年代曼聯嘅成就。此消彼長下，一開始的確感到不是味兒，但當漸漸習慣曼聯和曼城之間實力分野後，一切已No Surprises。
「You look so tired and unhappy……I'll take a quiet life……No alarms and no surprises （let me out of here）」《No Surprises》就係描寫當一個人習慣之後，一切已變得無驚訝、亦無所謂。曼聯領隊坦夏，會係引領紅魔及一眾球迷離開呢個混噩境界嘅「Chosen One」嗎？
(原文2023年6月14日於Now Sports網站上載，現稍作修訂，並改成粵文版本)
