點解事隔足足11年後，昆蟲白先發表佢第二張個人專輯《瞬間》？
熟悉台灣獨立音樂嘅朋友，相信一定聽過昆蟲白。當年佢同葉子及柚子組成經典後搖滾樂隊「甜梅號」，影響後來無數樂團同音樂人。佢亦都係「錫盤街」嘅低音結他手、「絲襪小姐」嘅結他手，其他參與嘅樂隊仲有「法蘭黛」、「銀巴士」……以及更多數之不盡嘅客席演奏。個人名義嘅作品，最為人知係同陳建騏及張見宇擔任電影《刺青》配樂，入圍金馬獎；2011年，昆蟲白推出處男個人專輯《自然人》。2022年7月28日，《瞬間》面世。點解會揀喺呢一日出？
因為呢一日，係昆蟲白嘅生日；《瞬間》就係佢送俾自己嘅46歲生日禮物。
其實早喺5年前，昆蟲白已萌生製作第二張專輯嘅念頭，但音樂人身份以外，佢仲係一名丈夫／爸爸。2018年細女誕生，佢笑稱「完全回到育兒狀態裡」；其後又受到全球疫情影響，令計劃一再延後。直到去年9月，昆蟲白把握時間，以及創作動力，將這些年累積落嚟嘅新歌重新編排整理，聯同好拍檔Dudu（低音結他）、包子（結他）及小光（鼓），短短2個月火速完成樂器錄音，亦促成專輯名稱由來，「抓住瞬間的火花，呈現出即時的最佳狀態」。
喺音樂圈打滾超過20年，人到中年嘅昆蟲白，面容仍然保持年輕，音樂上已去到得心應手、隨心所欲嘅高手境界。高手嘅作品，從來毋須自稱係咪偉大，而係由別人嘉許於你。《瞬間》內9首新作，大多係有旋律歌詞嘅歌曲，亦穿插數首後搖滾純音樂，十分照顧Post-Rock老樂迷。
第一首派台歌曲《天使的塵埃》，昆蟲白表示係向90年代台灣著名黑幫電影《少年吔，安啦！》致敬，末段特別安排一段吵耳而動聽的音樂演奏，卻嫌只得分多鐘，唔係咁夠喉。第二首主打、專輯同名作《瞬間》相對地更加Post-Rock，旋律短短，只係配菜，更多時候由長長嘅Instrumental主導，自甜梅號年代開始追隨佢嘅Fans，聽到一定好感動。
我就係自甜梅號年代開始，已追隨昆蟲白嘅Fans。專輯推出短短個零星期，已反覆不斷聽過好多好多次。對我嚟講，呢張唱片當然唔可以簡單只用「感動」兩字嚟概括，但亦好難喺呢度毫無保留表達自己所有感覺，真係有好多嘢想講，卻唔知點樣一一講出口。只可以講，《瞬間》坦誠地記綠昆蟲白過去一段日子以嚟嘅經歷，有高有低，就好似箭一樣匆匆而過嘅光陰，總帶住射唔中紅心嘅遺憾。佢筆下嘅歌詞內斂而抽象，卻又非常忠實咁反映人生。
唔想喺呢度逐一解構每首歌曲，但就算你唔熟悉昆蟲白嘅音樂，只要你願意細心聆聽，再讀讀佢喺「StreetVoice街聲」入面撰寫嘅歌曲簡介，以及最近佢嘅新碟訪問文章，一定感受到歌詞背後嘅意涵，全部都係佢對生活種種嘅情感抒發／發泄，無論係喜係悲係無奈，都象徵住繼續活下去嘅勇氣。
唯一我想特別提及嘅，係《城堡》一曲。曲式係我哋熟悉嘅有主唱嘅後搖滾。「還有甚麼讓我更痛／翅膀斷落墜地之後／謊言悄悄肆虐／我不能等待著被救援／別想在沉默的背後甚麼都不做」。歌詞無明言時代背景，即係放喺任何時代、任何國家、任何人都適合，只要你對昆蟲白唱嘅內容有觸動。
別想在沉默的背後甚麼都不做。昆蟲白選擇排除萬難、相隔11年後再出個人專輯。21年前夏天，某一日早上，我喺台北公館誠品音樂遇見昆蟲白，買咗甜梅號處男專輯《是不是少了什麼》，真係一張偉大嘅作品。當晚，我前往一間叫「地下社會」的酒吧，睇佢哋嘅Live；返香港後，寫咗一篇甜梅號樂評，投搞去《mcb》獲刊登，後嚟感恩獲主編袁智聰賞識，成為雜誌嘅固定作者。
今天，公館誠品音樂、地下社會同《mcb》全部都結業。舊年，我決定寫返樂評，開咗呢個網站。希望我能繼續寫下去。
