曾有一段長時間，大概係Dylan Art突然消失同False Alarm解散之後，我一度好抗拒香港本地獨立音樂，覺得好多樂隊 / 音樂人都唔夠班但又扮晒勁；而家諗返，自己都幾以偏蓋全，情況就好似最初聽外國歌時因鍾情英倫音樂而排斥美國搖滾一樣，自以為品味高尚，其實只係爬上咗一半嘅井底之蛙之見。
2年前，情況出現180度轉變 ── 2020年，當聽到南洋派對同假日貞操而大為驚艷之後，我宣佈自己正式重新關注本地獨立音樂圈，當然關注之餘，仲要時刻緊記一個大原則 ── 撐香港音樂，必需音樂先於香港，只要玩得出色，就值得更多人關注同支持，唔關係咪香港事。
因為關注本地獨立音樂圈，好自然留意到「搶耳音樂」 ── 近年一個致力推廣香港新音樂、提攜新晉樂隊音樂人嘅組織。翻查資料，原來我好鍾意嘅假日貞操、Charming Way、WHIZZ同蛋撻頭，全部都曾參與「搶耳音樂」學員計劃，然後喺學成後表現更進一步。適逢舊年年尾，「搶耳」公布2021/22新一屆學員成績表 ── 一餅集本地12個音樂單位新作嘅卡式帶合輯《EUM001: ups and downs》，亦好自然令我期待入面會唔會搵到另一隊啱我Channel嘅樂隊或音樂人。
聽完後，發現唔止一隊，而係三隊︰）
Kowloon K︰All That Jazz
隊名同劉以達早年樂隊DLLM有異工同工之妙嘅Kolwoon K，佢哋一首《明天世界或到末日》，無疑喺合輯入面嘅搶耳注目作。編曲繽紛熱鬧，5位成員（主音Charlie、結他手Justin、低音結他手Ho、鍵琴手水金、鼓手David）緊守崗位各司其職，玩得Groovy又帶點爵士味，有令人一聽便留下印象嘅潛質。有趣係歌詞巧合地同早排熱門Netflix電影《Don't Look Up》講彗星 / 殞石撞地球「撞橋」︰「遙望那，殞石天邊照，那刻到，歷史不過繁囂」。
《明天世界或到末日》全曲表現突出，聽多幾次後略嫌有啲計算雕琢，但我鍾意歌曲背後嘅流行爵士底蘊。搵返佢哋之前嘅作品，數量唔多但每首都各有味道，音樂感亦隨意得多，曲風元素有Indie-Pop有City-Pop有Soul當然仲有Jazz，有時會幾樣溝埋一齊，聽落係幾過癮好玩，尤其鍾意編曲中加入唔少Solo位俾樂隊成員逐一表現。聽聽佢哋翻玩台灣歌手9m88嘅《Aim High》 ，原版已無懈可擊；Kowloon K嘅版本無意超越，卻展現一份即興懶洋洋爵士氣息，亦係我期待佢哋日後主力玩奏嘅風格。
豆腐王國︰Last Night I Dreamt that Somebody Played Noisy Dream-Pop
一見到「豆腐王國」（Tofu Kingdom）嘅樂隊名，馬上聯想到自己最喜愛嘅樂隊「草莓救星」，同樣有啲低能但又有啲自大。豆腐王國自稱玩Shogazing / Dream-Pop，佢哋收錄喺《ups and downs》嘅一曲《Pensieve》，頭半段係正正常常、帶少少Dreamy氣氛嘅Indie-Pop，2位女成員Rita Whatever同豆豆嘅雙主唱，會唔會令你聯想成女版Ride？結他手Sam嘅Noisy Guitar一直匿喺背後蠢蠢欲動，到差唔多最後先轟炸小小一段，好唔夠喉啊如果玩多起碼1分鐘就更正啦。
咁啱，豆腐王國上星期推出新作《Summer Ride (With No Brakes) 》，一聽之下，更令我完全入迷著了魔。成首歌並唔Noisy，但有流麗嘅Jangle電結他彈奏；漫不經意嘅Vocal令我想起Camera Obscura，再加上一層佢哋獨有嘅Dreamy氣氛，中段結他音牆同樣以氣氛化處理，我開始大概捉摸到豆腐王國想走嘅音樂風格。早排睇咗樂隊接受「蛋女子」訪問嘅短片，佢哋話創作過程中會搵唔同Reference攞靈感，新舊樂隊都有。喺度我想俾多一隊Reference佢哋參詳︰Exlovers，同時熱切期待Tofu嘅處女專輯。
Bedroom Party︰電子音樂建築師
Bedroom Party可能係近年本地改得最好嘅樂隊隊名，一聽個名，再聽埋2位成員Lilong同Tommy主理嘅Chillwave / Synthwave風格音樂，兩者的確非常相襯，幻想到毒男（或宅女）獨自一人喺睡房播歌跳舞，同自己開派對。而佢哋喺合輯入面嘅《Night Time》，電音處理既舒服亦夠Chilled；當聽到末段長近2分鐘純音樂演奏，充滿層次遞進嘅編排，硬係令我覺得有啲熟悉，但又一時諗唔到係乜。
直到我發現Bedroom Party原來舊年7月靜靜推出處男E.P.《Cube》，聽完之後，我終於諗到喇︰原來係似Sahsa！
唔係講笑，我嘗試將Sasha名曲《Xpander》轉至0.75速度播放，感覺頓然同睡房派對E.P.內開場曲《Addiction》同細碟作《Drift Away》近似 ── Synth音效同樣一層一層咁砌上去，十分乾淨俐落，節拍亦同Trance一樣工整分明，當然呢個只係我個人感覺，如果覺得穿鑿附會咗還請多多包涵。另外2首《Club》同《Breeze》加入電結他彈奏，都係令人聽舒舒服服、但又會蠢蠢欲舞嘅輕盈舞曲。完場曲《Dream》歌如其名，恍如置身夢境中飄浮，係一首靚到暈嘅電子慢歌。《Cube》全碟5首作品，全屬我喜愛嘅電子音樂類型，如果早一個月聽到呢隻碟，Bedroom Party肯定會列入本人2021名單！
以上三隊，就係我聽《ups and downs》合輯嘅開心最大發現。當然碟入面其餘單位亦同樣值得大家試試細聽 ── Yuki Lovey嘅《Falling Upwards》、DAWN嘅《駝鳥》同樣係滿帶Dreamy氣息嘅電音流行曲；鍾楚翹嘅《渡澗》亦屬同一風格但處理上屬Ambient靜態。仲有爽勁結他Indie-Pop嘅神經系統《Summer Bicycle》、輕盈R&B風格嘅Lester Lam《Fluid Love》（Featuring Daniel Toh）、帶點神秘Upbeat舞池節奏嘅Higgo Raj《Elio》、將Rap同Rock溝埋一齊嘅RAM《Creater》、走Metal風嘅Fiester《發洩》、緊湊Instrumental Rock嘅宇宙幽靈《Phantom V.Z.》，只要願意用心細聽，大家應該都會同我一樣搵到心頭好，然後睇住佢哋繼續成長壯大，呢樣正係聆聽音樂其中一件美妙嘅事。
可惜嘅係，原本上周末舉辦嘅「搶耳音樂節2022」因為疫情而要延期，一眾樂隊音樂人未能喺台上演出佢哋嘅「成績表」。不過唔緊要，我從來相信They can ban playing music, but they can't ban MUSIC！玩音樂從來唔容易，尤其身處艱難時候。「在喧鬧中純粹創作，在狹縫中尋求突破」，努力保持初心，繼續自我提升，就係我哋而家要做嘅事。Please wait, don't lose faith, I know it's gonna happen someday！
