諸君，除咗音樂同足球，我仲喜愛推理小說。
提起香港推理小說，好多人馬上想到陳浩基《13．67》，呢本確係經典。而我認為，冒業嘅《千禧黑夜》，可能係繼《13．67》後，香港史上最重要嘅推理小說。
《千禧黑夜》總體可歸類為社會派推理，而且小說涉及嘅「社會」光譜非常廣闊，由香港延伸到日英國及美國；年份由1999年跨越至2020年，合共由5個短篇組成，每篇可再細分為唔同派別推理，互相連接起來，組成一個長篇。
一直認為，推理小說書評十分難寫，首先一定唔可以穿橋，所以相對之下，社會派推理書評比較易寫 —— 全因小說中嘅兇案謎題詭計唔係最重點，最重點係兇案背後所道出嘅種種社會問題。我認為《千禧黑夜》呢方面呈現得相當唔錯，而且可能太過豐富 —— 當中牽涉到極端恐怖主義、九一一、日本311大地震、資訊科技犯罪、美軍駐守日本、我城……好似未讀過一本社會派推理小說，包羅有如此唔同層面取材，但讀完又唔太覺資訊Overload，我自己就非常欣賞冒業搜集資料上做得充足，令讀者閱讀時彷如置身現場一樣（簡單嚟講，即係好有電影感）。
《千禧黑夜》提及嘅犯案，不少涉及恐怖主義，正如另一小說作家「理想很遠」所言，起初或令人聯想到書中主旨關乎「仇恨」、「恐懼」，但到最後，其實係講「理想」。而喺閱讀過程中，睇住一眾角色隨時間成長而老去，我更漸漸感受到佢哋對過去種種嘅「悔恨」。有時候，真係好難斷定自己所做嘅，最終係啱定錯。呢個世界，如果只得黑同白、正義與邪惡二元對立，呢個世界就簡單得多。
而我最喜愛《千禧黑夜》嘅地方，就係佢由香港出發，越洋去到美國、英國、日本，最後回到香港作結。最後一章香港故事，基本上已唔太涉及推理，but It really doesn’t matter；太多太多意難平，內裡包含著種種對與錯、暴烈與溫柔、黑暗與光明……非常複雜嘅一種感情，難以一言難盡（但偏偏太多人太懶惰，仍舊沿用二元對立去闡述）。固然，小說創作總離唔開Fantasy，但無論如何，我仍要感謝作者，選擇留一份「希望」俾讀者。
而最後，因為呢度係樂評網站，我想提及《千禧黑夜》中嘅音樂元素 —— 小說其中一位主角係Beyond樂迷，故事中亦出現《打不死》、《抗戰二十年》、《再見理想》呢幾首歌曲。如果要我揀一首Beyond作品嚟概括整本《千禧黑夜》，我會揀《霧》︰
「輕舟早已過 / 才目送人間那煙火
將彼此蓋過 / 還沒有時間問為何
日月便過」
