2021年，終於開咗呢個樂評網頁。開唔算難，堅持落去先係最難。不過明日嘅事都係留待明日分曉，再去想不必要，就趁年尾回顧一下今年喜愛嘅專輯作品才是正經事！
（以下名單除頭兩張外，其餘排名不分先後忠間無大無細超）
1. Charming Way《Charming Way》 / 當代電影大師《告訴我他們都在本來的什麼地方》
一隊嚟自香港，一隊嚟自台灣；一隊玩好Classic嘅英倫結他流行曲，一隊玩美式Hardcore搖滾，2021年最大發現同驚喜，呢兩隊樂隊，日後都會成為經典！
「你說你想要那種聲音，
你聽過那種聲音，
你想要知道世上還有人年輕，
不只我和你。
～當代電影大師《年輕民謠》」
Masha Qrella《Woanders》
我嘅後搖滾女神，相隔5年後再有新專輯推出，一切別來無恙，依然係佢最擅長、充滿質感嘅電氣化流行曲，冷靜之餘同時感覺溫暖，女神地位至今依然屹立不變。
風籟坊《Demo丙》
同樣別來無恙，風籟坊俾我嘅感覺，同2009年佢哋推出《Demo乙》時幾乎無變。身處今天，呢一份堅持尤其重要。好想飛去台灣同Chris、戴子同泰元親口講聲：多謝你哋。
Godspeed You! Black Emperor《G_d's Pee At State's End!》
後搖滾之神，由1999年聽到而家，睇過佢哋嚟香港玩Live兩次。一路走來，GY!BE嘅音樂，始終圍繞末世；而家終於正式末世喇，有無機會重生？咪住，仲要經歷涅槃先。
Saint Etienne《I've Been Trying To Tell You》
原來呢張碟剛好係Saint Etienne第10張專輯，風格上以Sample-based / 純音樂為主，驟耳聽好似有啲唔慣，但其實佢哋第一張碟《Foxbase Alpha》已用上唔少Sample，呢個係佢哋音樂取向根源之一；而我作為盲目聖伊天Fans，自然有理無理都滿意收貨！
WHIZZ《之所以我們都在歇斯》
個人最欣賞WHIZZ專心做音樂，勤力創作，出道短短日子已推出處女專輯，表現絕對唔失禮，預期未來佢哋會繼續進步。WHIZZ用實際行動表現出正能量嘅力量，亦係當下我哋最需要做嘅事情。
假日貞操《Virgin Vacation》
舊年聽到假日貞操處男作《Acid Rain》時已驚為天人，本人仲創作咗「Organic Post-Rock」呢個Term嚟標籤佢哋！今年樂隊推出同名E.P.，更能體現到佢哋嘅光怪陸離、耐人尋味氣息。假日貞操應該係現今本地最佳Instrumental樂隊，期待佢哋嘅Full-Length Album！
【假日貞操．重覆又Organic推進嘅《Acid Rain》】
荷爾蒙少年《美好年代：2000》
荷爾蒙少年，可能係近年改得最好嘅樂隊名字，一聽已知佢哋充滿年輕（搖滾）能量。呢張《美好年代：2000》大玩懷舊風，唔計第一首純音樂Intro，碟內其餘3首歌都非常正斗，處處高潮迭起充滿驚喜，唯一不滿係只得3首歌曲，非常唔夠喉！
Stomp Talk Modstone《Linger In Someone's Memory With A Lurid Glow》
近年好多新進獨立樂隊鍾情玩Noise-Pop / Shoegazing，嚟自日本嘅Stomp Talk Modstone肯定係當中最Top水準嗰批。佢哋呢張處男專輯更一口氣送上20首作品，要音牆有音牆，要旋律有旋律，一次過滿足哂Noise-Pop迷所有願望！
馬念先《Mama Jeans and Daddy Shoes》
台灣其中一隊經典樂隊糯米糰，樂隊主音馬念先喺2021年姍姍來遲推出佢首張個人專輯，處處瀰漫住上世紀八十年尾、九十年代初嘅音樂風格，亦即係佢昔日成長嘅年代。點樣喺一張專輯入面同時令人諗起Prince同伍思凱？相信只有馬天才先做到！
Kings Elliot《Chaos In My Court》
遲啲有機會再寫Kings Elliot，而家先點佢一首歌俾大家聽：
