向來唔鍾意社交平台大數據派歌俾我聽，通常10次有9次都唔啱聽；不過凡事總有第10次例外，今次我要向Agroiriam講聲Arigatou，多謝佢推張天穎（Jaime）俾我聽。
《低調》係大數據第一首為我推介嘅Jaime歌曲，初聽唔算太驚艷，一般K-Pop風格，Vibe有啲似BLACKPINK《Crazy Over You》；有趣在加入琵琶Solo，以及五五開嘅粵語溝英語歌詞，頗能活現昔日香港中英夾雜獨特Style。
當中最抵死係加入一段《論語》金句：「三人行必有我師焉／知之為知之，不知為不知，是知也」。印象中以往無乜Cantopop用文言文入詞，而且Jaime並非為Gimmick而加文言文，或有任何嘲笑貶意；從訪問中得知佢係受爸爸影響，真心認同孔孟之言，果然有Taste！
《低調》之後，演算法陸陸續續派更多Jaime歌曲俾我聽，有好幾首的確唔錯，例如充滿R&B味道嘅《 Fallen 4 U》、非常青春甜蜜嘅《1 Step At A Time》；還有歌名話OK但歌詞其實講我一啲都唔OK嘅《OK Sure》，都係本人心水選擇。
然後，我主動Click入串流平台，聽晒Jaime所有歌曲及Remix。暫時最新一首作品係《Study With (J)Me》，亦給我最大驚喜，全因佢係純音樂 —— 每當發現有歌手樂隊願意玩純音樂，我都會首先加分 —— 不過《Study With (J)Me》本身都係一首相當不俗嘅Instrumental，以沉實電子節拍襯底，配上零落而帶點Jazzy嘅琴音，以及Jaime飄浮不定捉摸不住嘅和音，全部加起來，或者有點試驗習作Feel，但呢份習作及嘗試，我相當受落。
再然後，我上網Google更多有關Jaime資訊，發現佢嚟自女團Beanies，之前曾參加陳輝陽女聲合唱團及英皇娛樂嘅冤枉新秀訓練營。小妮子亦係唱作歌手，大部份曲詞，以致編曲都由自己一手包辦，少數例外係《OK Sure》（求其啦Version）混音版，請嚟音樂人葉崇恩（Patrick Yip）重新編曲，加入色士風做主角；唔好講笑，聽完成首歌，堅令我聯想起Everything But The Girl九十年初嘅中產流行爵士風格，浪漫之餘又Sad Sad地，堅係正！
睇返近年香港主流及Indie音樂圈，的確湧現多個新名字。單計主流界別，唔少歌手都同Jaime一樣自行創作；當然寫得唱得，唔代表一定寫得好唱得好；不過Jaime嘅音樂，我個人而言係滿意收貨。
除咗寫歌俾自己，Jaime亦有幫其他歌手寫歌。歸綽嶢（Nancy Kwai）去年Hit歌《You Took My Breath Away》（Youtube View數過百萬），就係由Jaime同GooChan聯合作曲，一首上乘流行Ballad，Chrous毫不呼天唱地，卻令人聽得心痛，屬高水準情歌例子示範。
除咗寫歌俾其他歌手，Jaime甚至幫所有人寫歌。Jaime IG有一個 #本故事不純屬虛構 #BASEDONTRUESTORIES 系列，街訪路人／邀請圈中朋友（最新一集係Jaime屋企兩頭貓！）請大家講一個主題，再哼幾粒音，佢就根據以上素材寫成一首Jingle短歌。成件事非常反潮流而行 —— 現今A.I.當道，Jaime以上所做一切，其實A.I.／ChatGPT已完全做得到，而且做得更快（及更好？）
不過呢，如果要我呢個老派揀，我一定揀張天穎。你一定唔夠A.I.運算快，但你一定比A.I.更有Heart。期待你繼續進步，寫多啲好歌，編曲靈感源源不絕，Music Non-Stop Cantopop！
