今個4月，當我正熱切期待本地純音樂樂隊「假日貞操」處女專輯《Dapple Patterns》正式面世之際，偶然之下發現兩首新歌 —— 張國穎主唱嘅《Moon Song (Into The Night) 》及《角色》—— 可以令我暫時止渴 。兩曲同由假日貞操鼓手Step Ip負責編曲，非常有趣嘅Crossover組合！
上文及標題無打錯字，本文主角確係張國穎（Margaret Cheung），唔係張國榮。Margaret係著名舞台劇／音樂劇演員，因為名字同張國榮讀音好相似，從小已獲得「哥哥」外號。Margaret曾演出多套本地劇作，亦有擔任演唱會和音歌手。今次佢由哥哥變成歌姬，喺「香港Cherry Red」New Century Workshop旗下推出處女專輯《Directions》。而因為Margaret早已認識Step，便邀請對方參與其中。
《Moon Song》及《角色》，有無令我聯想起假日貞操？前者深沉不見底電音編排，張國穎嘅演繹亦帶點鬼魅，俾我第一個感覺反而係「無咗炒豆聲及電結他嘅Portishead」。後者Intro嘅Electronics噪音由遠至近，接入蠢蠢蠢欲動節拍，貫穿全曲；Margret卻刻意唱得冷靜抽離，更顯歌曲嗰份躁動不安。但如果抽起Vocal，背後音樂亦非常豐富多嘢聽，絕對會成為一首上乘Instrumental，就如假日貞操一直做緊嘅音樂。
《Moon Song》及《角色》，兩首異常出色Electro作品，但原來皆非張國穎原創。前者翻玩電影《情遇曼哈頓》插曲，後者為莫文蔚原唱。綜觀《Directions》一碟九成以翻唱歌曲為主，加上New Century擺明以Hi-Fi碟宣傳包裝，相信購買此作嘅樂迷，好多都係Hi-Fi發燒友。
我唔係Hi-Fi發燒友，唔識分乜嘢高音甜中音準低音勁；但聽畢整張《Directions》，卻十分肯定Margaret嘅Vocal演繹，可以屌打大部份本地所謂Hi-Fi歌手，不過呢一點並非本文討論之列，《Directions》亦絕非只係一張Hi-Fi碟咁簡單，由搵嚟假日貞操Step Ip編曲，已肯定呢隻碟確係「有啲嘢」。
固然碟內選唱盧業瑂《泥路上》及林憶蓮《破曉》，同屬大熱穩陣嘅Hi-Fi碟選曲，你就當呢兩首係派台主打歌；其餘選曲／編曲卻甚有心思，例如許美靜嘅《生活》，只用上Handpan伴奏，帶出非常獨特嘅空靈Soundcape。
《Children Will Listen》及《永遠的新歌》分別來自百老匯音樂劇《魔法黑森林》（Into The Woods）及香港話劇團劇作《時間列車00:00》，代表Margaret嘅藝術根源。好喜歡《永遠的新歌》嘅動聽旋律，歌詞亦寫得出色，教我知道除流行曲以外，本地舞台劇／音樂劇一直孕育唔少高水準Cantopop，值得讓更多人認識。
全碟唯一一首原創作品、由Margaret音樂好拍檔陳杳然（Max Chan）創作嘅《留下半點溫柔贈我》，亦係一首非常動聽、兼無Chrous嘅奇特廣東歌。歌詞寫得平實，沒有一般Cantopop嘩眾取寵但其實不倫不類嘅比喻，意境卻非常漂亮但神傷：「侯鳥飛奔天際遷徙到來生／留下我於汪洋被困／前路再多昏暗險阻／留下半點溫柔贈我」。
從《留下半點溫柔贈我》到整張《Directions》，據張國穎表示，代表著佢之前幾年Covid-19時候嘅種種反思；所以CD封面並非一般HiFi碟用上靚靚歌姬大頭照，卻見Margaret戴上「口罩」嘅濛瀧造型。雖然係翻唱碟，但《Directions》應該係本地首張回應Covid-19嘅概念大碟，好比電影《窄路微塵》，同樣成功觸動我。
張國穎受訪時亦提到，灌錄這張專輯期間錄得最開心係《Moon Song》及《角色》，兩曲展現出自己另一面，玩得非常開心。既然如此，不如下張專輯全部搵Step Ip，甚至假日貞操操刀，相信一定會好好玩！不過記得留一首Qouta俾好拍檔Max，期待另一首如《留下半點溫柔贈我》般令我動容嘅鋼琴靚歌！
