當初會留意台灣獨立樂隊康士坦的變化球，最大原因係樂隊2名成員ARNY同啟泰都嚟自草莓救星。康士坦一開始由Thrash Metal樂隊Infernal Chao主將CIG發起，再加入草莓2人、小米同SION組成。佢哋4年前推出處女專輯《擱淺的人》，彷如Post-Rock加Math Rock嘅長篇樂章演奏模式，編曲高低起伏有序，出嚟感覺張力十足，係我喜歡嘅後搖滾模式；碟內唯一一首有主唱嘅Emo點題作《擱淺的人》，音樂爽快歌詞自傷自憐：「擱淺的人早習慣啦，就這樣吧算了啊」。副歌全隊大合唱的氣勢，彷佛話俾世上所有中二病知：你唔係一個人！
4年以嚟，《擱淺的人》一曲Youtube點擊率已破200萬，成就絕對唔簡單，亦代表時代已唔同：獨立音樂唔一定要透過主流公司同傳媒支持，只要透過網絡及口碑，一樣能獲得主流群眾認同及喜愛。4年後今天，康士坦帶嚟佢哋第2張專輯《更迭》，CIG嘅結他手位置現由Creed代替。新碟碟名同樂隊英文名稱Constant & Change「變幻才是永恆」概念十分切合；用嚟為呢個令我哋意料之外、難以忘懷平伏嘅2020年作結，實在非常切合。
主打歌曲《美好的事可不可以發生在我身上》嘅MV喺污水處理廠地下室拍攝，黑暗無光無希望嘅氣氛，的確同2020年很相似。歌詞彷佛係《擱淺的人》下集，嗰個對一切無所謂嘅主人翁，麻木過後終於發覺唔對路，嘗試尋找出路：「我們半推半就的人生，怎麼過啊？」但MV最後一幕話俾大家知，無論我哋做乜，都係徒勞無功嘅。
新碟入面，康士坦嘅創作曲式同上隻碟有啲唔同，今次以有旋律歌詞主唱嘅歌曲做主導，純音樂為次。《對不起我做不到答應了你的事》同《美好的事可不可以發生在我身上》一樣選用長長歌名，呢方面好自然令我聯想起The Smiths。佢哋嘅音樂世界，又確實同The Smiths宣揚嘅其中一個主題好類同，就係Miserable。《擱淺的人》、《美好的事可不可以發生在我身上》講Miserable嘅人生、《對不起我做不到答應了你的事》係Miserable嘅愛情。點題作《更迭》結尾嘅金句「籌出了生活，籌不出自由」，係唔係同The Smiths《Heaven Knows I'm Miserable Now》一句「I was looking for a job and then I found a job, and heaven knows I'm miserable now」心有靈犀？呢堆歌曲繼續採用Emo激烈方式呈現，聽落確係感覺痛快淋漓，彷彿將聽眾埋藏心入面所有不快，一次過釋放出嚟。
不過，如果話康士坦只識一味暴烈一味發泄，又完全唔係。佢哋新碟嘅歌詞觀，亦開拓出冷竣、抽離另一面，好似《Hi There》（逝去的不是青春，是當初你青澀的樣子）、《理所當然》（理所當然的愛，自然的被隨手丟下了，埋在看不見的角落），同樣好有存在主義色彩，呢種Miserable十分冷靜，亦十分殘酷。音樂上，以上幾首歌亦越見康士坦識得點樣收放自如，《Hi There》由小米唸白同主唱，好有詩意嘅沉鬱，到中段先轉入佢哋拿手嘅激昂大合唱，然後再回歸冷靜，起承轉合配合得好好。《理所當然》應該算係佢哋第一首Rock Ballad，ARNY嘅聲線竟有啲似張洪量（！），成首歌感覺好抑壓，似乎同樂隊一貫風格有別，但佢哋係康士坦嘛，既有Constant，當然仲要有Change，我相信呢啲都係佢哋想做嘅音樂風格。就算係幾有忍耐力嘅靈魂，都會有過嘗試脫軌出走一刻，然後恍如完場Reprise曲《安靜的美好》一樣，重回安靜地運轉。
（原文2020年12月29日喺「紳吟」Facebook上載）
