（原文於2004年《mcb》刊登，現改成粵文版本，並稍作修改）
2002年暑假，嚟自高雄嘅樂隊壞女兒，推出處女專輯《沒有毛的熊》，為佢哋製作及發行嘅小白兔橘子唱片，就同壞女兒一樣年輕而充滿幹勁，專輯歌曲俾人一份原始、簡單、好玩嘅感覺，而且十分動聽。無論旋律歌詞，一啲都唔矯揉造作，好輕易就能打動人心。
碟內除《天使》、《飄》呢類慢板作，亦有佻皮可愛嘅Cutie-Pop如《Cm Dream》、《登登等」；一靜一動，組成我所鍾情嘅壞女兒 —— 青春無敵，有時會做啲小奸小惡事情（所以佢哋叫自己做壞女兒），但其實全部都係笨笨嘅好人，仲會寫出令人動容嘅歌曲！
灌錄《沒有毛的熊》期間，壞女兒陣容仍未固定，當時就靠樂隊4位核心成員，包括負責填詞、主唱及結他嘅香菇、彈結他嘅小倩、彈低音嘅戴子，以及彈鍵琴嘅蘑菇，聯同友情演出嘅前甜梅號鼓手柚子，一同完成樂隊處女專輯。
專輯推出後，因為要四出玩Live宣傳，壞女兒終於招攬到Losie擔任長期鼓手，並加入一位新結他手小姚。而因為當年暑假過後，小倩要前往美國諗書，必須暫時離隊；小姚正好填上佢走後嘅空缺。
時間過得好快，去年年尾，壞女兒「失驚無神」推出第二張專輯《小太陽》。有過製作唱片經驗，今次壞女兒只用咗約3個月便做好新專輯，小倩亦趁暑假回台灣參與灌錄過程，然後又趕返美國開學；錄音錄到一半時候，小姚因私人原因離隊，新女生結他手DoDo加入，組成現時兩男三女陣容。
當看見《小太陽》封套及內頁低能手繪圖畫及字款，感覺就同我一直認識嘅壞女兒無分別。封底出現六個星球人，原來正正係壞女兒一眾成員（包括小倩及小姚）。佢哋仲自喻為「來自笨蛋星球的使者」，因為壞女兒經常俾人傻傻哋感覺。
不過，同上張專輯相比，《小太陽》今次製作明顯落足本錢，單係專輯精美紙套設計，已知成本不輕，入面仲附送壞女兒貼紙一張，特別版再多一張VCD，收錄2首曲目《農夫好辛苦》同《我有我的小太陽》嘅Music Video、壞女兒團員介紹及訪問，以及錄音製作花絮等等。
好明顯，呢張《小太陽》係壞女兒及小白兔不容有失之作。畢竟今次已係樂隊第二張、小白兔第五張製作嘅專輯，斷不能再單純用以前嗰種簡單好玩嘅心態去做音樂。
換句話講，《小太陽》嘅壞女兒，比起以往成熟了，音樂唔再咁單一化。專輯第一首傳出來嘅《第一個願望》，便以跳脫鼓機及低頻Sequencer帶嚟先聲奪人之效，再轉入爽朗Guitar-Pop曲風，單刀直入得來又不失心思。
另外2首類同風格嘅《不明亮的心情》及《對就是對，錯就是錯，沒有什麼對與錯》（好長嘅歌名），仍舊充滿壞女兒嘅陽光青春氣息；但細聽之下，你會發現佢哋喺編曲及彈奏上更見合拍、更得心應手。佢哋開始懂得點去「雕琢」，令歌曲變得更圓滑、更流暢。
新專輯內，感性慢板作依然佔較大比重，《我有我的小太陽》及《一個人的啤酒》依然係佢哋拿手嘅民謠Sadcore，但感覺上較以往變得間接、內歛，必須聽多幾次先有味道。《芭芭拉的小花》只用上木結他、低音與Vocal，粒粒清嘅和弦勾線，係樂隊少有Acoustic一面。將呢首歌放喺最後一首，更令專輯有一個漂亮結尾。
據戴子話，上一張專輯都係佢哋高中時代寫嘅歌；嚟到《小太陽》，就係大學時期新作，感覺上一定變得更成熟：「因為我哋年紀都大咗啊！」而且佢哋聽過更多唱片後，想做更多唔同嘅音樂。好似我最鍾意嘅《酸菇》，末段長長音樂演奏，便好有德國Post-Rock嘅冷靜氣氛，係樂隊一次成功新嘗試；《Cherry Bomb》係小倩個人騷，刺激嘅搖滾電結他Solo，毋忘佢哋嘅Grunge音樂根源。
曾收錄喺《蘿蔔一代》合輯內嘅《農夫之歌》，因為佢哋想新專輯中帶嚟另一種更直接、更簡單嘅感覺，便走去陽明山直接用MD錄。「我哋直接喺路邊彈起結他，只不過山上好凍，大家嘅手都凍到不得了，所以《農夫之歌》喺呢張專輯就變成《農夫好辛苦》，因為錄得好玩但係同樣好辛苦！」 戴子說。
這就是壞女兒。雖然佢哋長大了、成熟了，但本性仍無乜點改變，仍然咁鍾意玩。我完全可以想像到佢哋喺路邊彈結他唱歌嘅畫面，好似一班傻瓜，但傻得可愛。不過待《小太陽》推出後，稍後時間一眾壞女兒便要面對畢業、搵工、當兵等問題。從前只懂得快樂嘅佢哋，亦要開始煩惱。不過請放心，戴子表示佢哋會設法繼續玩音樂：「夾Band已經變成我們生活一部份，而且音樂操控我嘅生死啊！」
講得真好。如果要我羨慕邊一個，我會羨慕壞女兒。其實佢哋同普通人一樣，都有開心同唔開心時候，佢哋都會煩惱，但唔會諗得太多、太認真，以至鑽牛角尖。人生於世上已經有太多事去煩，應快樂時，就要快樂。雖然未來嘅事，無人會知道。但呢一刻，我決定相信佢哋！唔好偷懶，馬上為第三張專輯寫歌！
