《填詞L》未能完全感動我，電影原聲大碟卻十分有趣，令我情難自制再寫一篇文章分享感想。配樂王建威，以及負責全碟歌詞嘅導演黃綺琳，的確做咗一張好出色嘅O.S.T.，曲風詞風非常多元，襯托出電影不同段落情境，獨立聆聽亦非常不俗，聽著聽著，竟令我想起John Carney兩套好好睇嘅音樂電影《初戀無限Jam》、《Flora & Son》入面好好聽嘅電影配樂，同時連結多首昔日Cantopop，正！
《家常便飯》
全片我覺得最有趣一幕嘅「背景歌曲」，音樂底係Classical（電影刪剪片段有講），好比麥兜一系列古典改編粵語作品，歌詞同樣搞笑抵死。主角羅穎詩身兼填詞人同指揮，七情上面監督同學唱Vocal。最正係歌曲尾段保留電影中部份對白，一眾角色相討點樣改歌詞改旋律改唱法。填詞，真係唔一定要填滿晒旋律每一粒音先得，填詞人應該叫自己做作詞人，同作曲人、主唱者一起Brainstorm點樣修改，這就是Jam歌嘅樂趣。
《聖愛的海洋》
細個讀書時候，已發現好多宗教聖詩，以至校歌歌詞都唔啱音，但大家仍要扮無事天天唱著，呢份親切嘅違和感，王建威同黃綺琳直接寫一全新首詩歌，無傷大雅戲謔一下。歌名《聖愛的海洋》已大玩食字，歌詞加入名句「主撚九」更是一絕；其實歌詞填得有少少唔啱音都OK嘅，周耀輝當年初次為達明一派填嘅《忘記他是她》、《天花亂墜》，都有唔少用字唔啱音，但無礙整首歌詞嘅高水平！
《我們敬師吧》
羅穎詩暗戀男神（周漢寧飾）嘅Band Sound創作，Power-Pop搖滾快歌風格固然醒神，歌詞亦相當過癮，同時用上廣東話、國語及英文入詞。記得當年陳百強一首《南北一家親》（同由周耀輝填詞）已玩過「兩文三語」，羅穎詩覺得男神亂填一通，填唔啱音就轉Channel，但偶一為之都幾過癮，亦活用香港獨有中英夾雜Style！
《髮菜歌》
電影主題曲《填詞魂》第一版Demo，亦係羅穎詩人生第一次收到Demo，但佢填嘅時候苦無靈感，覺得自己俾旋律牽著走，最後亂填一通，只求塞啱啲音填出《髮菜歌》。不過如果旋律夠搶耳夠Catchy，我倒認為填詞人毋需太介意歌詞純為旋律服務，最緊要唱起來聽起來順耳，就算部份歌詞意思亂嚟都無所謂，例子如Depeche Mode《Speak and Spell》專輯時嘅創作，以及香港音樂人蛋撻頭《寂寞的雪糕》，大家一齊Sing-along跟住唱就可以。
《秘密情人》／《毒蘑菇》
非常正！無論係中日國三語Demo版定「出街」版本都好正，旋律曲式完完全全屬於90年代台灣芭樂流行曲，難怪最後成功賣埠寶島，負責作曲嘅Chris Lee（胡子彤飾）夢想成真一定好高興，唔知佢之後會唔會再有歌曲被錄用，甚或成為唱作歌手？
突然諗到，如果《毒蘑菇》由電影中客串台灣唱片公司高層嘅馬念先親自主唱，一定更正！3年前，馬尿推出個人專輯《Mama Jeans and Daddy Shoes》，不少歌曲正正向台灣流行音樂致敬！
《Hk Free Rider》
電影中羅穎詩為公司填嘅廣告歌，又的確做到廣告歌應有嘅洗腦Hookline同推銷元素，Uber或Lalamove大可買下版權自用！歌詞中一句「上車開心晒」，唔知有無Double meaning呢？其實廣告歌唔易填，此作證明主角填詞功架唔失禮，只係太黑仔而已。
《夢想太貴》／《唔緊要啦》
《夢想太貴》係電影主題曲《填詞魂》Demo版本，由ANSONBEAN主唱，佢同時飾演片中男主角「肥乜」。《夢想太貴》全長2分鐘不夠，但充滿想像空間及餘韻。簡簡單單一支結他一把Vocal，ANSONBEAN唱出主角／男主角嗰份茫然面對每次挫敗、但心裡仍有點點不甘心嘅複雜心情。歌詞只用上Full Version前半Part，刪走有關填詞部份，反而更能帶出電影主題，就係不斷追求夢想，然後不斷失敗。
《夢想太貴》歌名亦實在起得太好，可套用在唔同年代唔同人唔同志業，甚至愛情，令歌曲更長青。我哋以為自己嘅人生獨一無二，但彼此只不過係平凡人；不過平凡人嘅夢想／夢想破滅，已足夠令自己一生銘記。緊接嘅《唔緊要啦》純音樂，彷似Reprise迴響，讓羅穎詩及肥乜繼續沉澱喺挫敗失落之中，待樂曲完結後，就要抖擻重新出發啦。
《唔緊要啦》歌名係男主角電影中對白，即使被羅穎詩一個戇居決定累及，佢只輕輕用一句「唔緊要啦」帶過，可見佢係重情義之人。試問誰人沒差錯？又或者，肥乜以往創作路途上，亦可能做過類似戇居決定。
聆聽《填詞L》電影原聲大碟過程，實令我非常滿足，可說彌補電影嘅不足。詞大於曲，一直係主流Cantopop生態，電影亦貼題地只談歌詞而未有太著墨作曲編曲；但《填詞L》OST樂風非常多變，展現Cantopop音樂上不同可能性，負責配樂嘅王建威應記一大功，相信佢做呢套戲音樂時候，一定非常滿足過癮。
而黃綺琳為整張OST歌曲創作歌詞，此舉更將電影其中一段情節付諸現實達成；所以我一早有講，《填詞L》根本就係一套行為藝術電影！唯一可惜係除主題曲外，其他歌曲未有從字裡行間中，表達羅穎詩嘅心情起伏；不過咁又好難怪，香港主流樂壇填詞人主要為歌者服務，而非詞人本人情感。唯二可惜係OST未有收錄羅穎詩哥哥（ERN9飾）為女友丸丸（麗英飾）填嘅敬師歌，嗰首都好好聽㗎！
