會睇《填詞L》，因為讀書時候我同電影主角羅穎詩（及導演黃綺琳）一樣，好鍾意改歌詞。後嚟亦曾嘗試跟音樂人合作佢曲我詞，又參加過填詞比賽。唔少人都認為自己嘅人生獨一無二，但彼此總有共鳴交集點。
《填詞L》其實透過乍似冷門嘅「我要做填詞人」題材，呈現Cantopop主流樂壇生態，尤其係多年積集落嚟嘅「詞大於曲」現象，相信大多廣東歌歌迷傾向留意歌詞多於旋律編曲，旋律只需去到Chrous要易記易唱便可，編曲更係近乎完全無視，《填詞L》集中只講歌詞，確係聰明之舉，唔通而家呢個世代仲有人會拍「我要做歌手」如此老土題材咩。
《填詞L》唔難睇，亦處處感受到黃綺琳踎低起身填詞魂嗰份執著，直到今天心仍未冷，所以佢決意自資拍呢套電影，唔單止係行為藝術，直情係玩命藝術，讓生命衝開一切。
自問都鍾意研究歌詞，以往人生亦經歷過《填詞L》某些情節；但奇怪地，我未能完全投入電影其中，睇完之後更有點納悶 —— 明明電影係關注小眾志趣志業，但主角不斷努力想成為主流填詞人，填嘅亦係大路Cantopop流行曲歌詞，兩者加起來總覺怪怪咁，我唔知點形容，或者好似你好Niche咁講緊一啲好Popular嘅嘢，對我嚟講充滿違和感。
當然呢個係我個人問題，唔關《填詞L》事，但可能關達明一派事。以歌詞做例子，記得當年第一次聽到達明嘅《愛煞》，實令我耳界大開 —— 全曲歌詞只得四四一十六個字，點解可以咁短？仲要不停Loop住唱？後來聽歌聽得越多，我漸漸明白到：點解唔可以咁短？流行曲，一樣可以充滿變化玩味，唔一定只得來來去去嗰幾種Formula。而Band Sound，就係最鍾意打破呢啲Formula。
《填詞L》主角好鍾意填詞，但唔一定要做填詞人，佢可以去夾Band。電影中我認為最有趣一幕，係羅穎詩同三位女同學偷偷走入音樂室，玩奏佢哋原創歌曲《家常便飯》，有人作曲有人填詞有人彈琴有人主唱，各司其職。大家Jam吓Jam吓，會俾意見改歌詞改旋律改唱法，其實就係夾Band雛形，如果佢哋搵埋學校結他男神，以及後來成為唱作歌手嘅寸友合組六人樂隊，應該會幾好玩（事實上電影刪剪片段亦真係有拍主角幻想男神隊Band搵佢填詞）。
不過呢，喺香港夾Band，更難搵食，所以當我無講過啦。
P.S. 我個人較喜歡Ansonbean唱嘅Demo版主題曲《填詞魂》，編曲只得一支結他一把Vocal，好有簡約Acoustic風，更能帶出歌詞嗰份誰能明白我嘅堅持同無力感。我想點香港獨立樂隊粉紅A一首《潮濕》，送俾電影結局之後嘅羅穎詩：
「無需講理由，
最重要是你仍然能夠。」
（Need no reason,
The key is, you’re still ready, willing and able.）
