教授坂本龍一逝世消息傳出，社交網絡被完全洗板，佢嘅影響力的確無遠弗屆，無論主流／非主流、流行界／古典界／配樂界，甚至無聽開音樂嘅朋友，都為佢送上悼念，當中包括無數曾同教授合作嘅音樂人，其中一位，就係Japan嘅David Sylvian。
David Sylvian喺社交平台張貼一張教授側面背影相片，沒有任何文字留言；但熟悉教授嘅樂迷，一定知道二人係惺惺相惜好朋友；一張相片，足以感受到大衛對教授離去嘅沉重心情。去年面世嘅教授致敬大碟《A Tribute to Ryuichi Sakamoto – To The Moon And Back》，大衛亦負責一曲《Grains (Sweet Paulownia Wood)》，係佢對教授最後致意。
生平第一次聽坂本龍一嘅音樂，無記錯應該係Japan一首《Talking Islands In Africa》—— 由大衛與教授合寫，收錄喺1980年Japan專輯《Gentlemen Take Polaroids》，一首奇特Electro-Pop；基本上整張《Gentlemen Take Polaroids》已非常奇特，而《Talking Islands In Africa》又跟碟內風格明顯唔同，所以放喺碟末非常正確 —— 每張Japan專輯最後一曲，都會預視樂隊之後嘅音樂轉變；而《Talking Islands In Africa》嘅電子編排非常YMO之餘，隱約帶點點東方味道，彷佛預告Japan下一張、亦係最後一張專輯《Tin Drum》嘅中國／日本風Art Rock取向。
1982年，David Sylvian以個人名義同坂本龍一發表《Bamboo Houses / Bamboo Music》Double A Side細碟，齋聽更以為係《Tin Drum》專輯抽出嚟嘅細碟，不過電子味道更重而已。細聽兩首曲目，意外地以旋律歌詞較短嘅《Bamboo Houses》更搶耳，教授拿手嘅Synth Riff及層層疊疊電音處理，配以Japan嘅Pattern式編曲演奏，產生絕妙化學作用，當然有份參與Percussion嘅Japan鼓手Steve Jansen應記一功。
然之後，就係大家最耳熟能詳、亦係教授同大衛合作最著名嘅金曲《Forbidden Colours》。呢首歌唔需要再多介紹，你會比我更熟悉，只要「燈燈燈凳凳」琴音一出，你同我都會不禁投入其中，腦裡回想起《戰場上的快樂聖誕》一幕幕畫面。《Forbidden Colours》其後有一個重錄版本，個人覺得更圓滿動聽。此作（加埋Japan《Nightporter》）亦成為後來達明一派名作《禁色》嘅Reference。
坦言自己唔係坂本龍一嘅忠實樂迷，我對佢嘅認識，主要嚟自Japan同David Sylvian。已故Japan低音結他手Mick Karn談及當日樂隊同教授嘅合作，佢大讚教授可以一隻手彈緊琴錄音，另一隻手同時打電話、拎嘢食！大衛當日喺錄音室內，亦親睹教授一人砌好《Talking Islands In Africa》原形，佢當晚即刻寫上旋律歌詞；第二日便做好成首歌。
因為呢首歌，Japan眾成員同教授結下長長嘅音樂緣份，尤其David Sylvian。佢兩個嘅Collaboration不計其數，你會比我更熟悉；但希望大家唔好遺漏Virginia Astley八十年代一張古意盎然嘅《Hope In A Darkened Heart》，由教授擔任監製，全碟盡展佢嘅古典根源。大衛獲邀同Virginia合唱碟內一曲《Some Small Hope》，成為不少英倫Indie樂迷（包括我）心目中經典。（後嚟蔡立兒竟有翻唱此曲成《小小希望》！）
坂本龍一離世，社交網絡已出現無數教授悼文，促成我寫呢一篇，主要想補充返教授同Japan合作嘅少少歷史背景，so far我唔見太多人提及呢方面，唯有膽粗粗自己試寫，如有任何錯漏，還望多多包涵指正。我一直認為，教授同Japan嘅合作關係，對日後佢哋各自音樂發展起有重要影響。如今教授在天之靈，終可再同Mick Karn重逢，請佢為《Talking Islands In Africa》加一段Fretless Bass獨奏，相信會好精彩。
