仍然清楚記得第一次聽劉以達嘅創作，係1987年達明一派派台歌《石頭記》及《馬路天使》；然後我儲了大概一個月零用錢，買了達明《石頭記》盒帶，盒帶轉出來第一首作品，係純音樂《離》。
作為追隨劉以達多年嘅Fans，由達明一派到個人發展，一直感受到達哥對純音樂嘅堅持，不時會在專輯中加入純音樂；當年佢第一隊樂隊DLLM，就係一隊堅持只玩純音樂嘅Art Rock樂隊，只可惜生不逢時。
近年，達哥憑個人傳記《方丈尋根記》系列重獲大眾注視，至今已推出兩集，第一集更隨書附送一張純音樂CD，彷如傳記Soundtrack，印證著達哥早年創作音樂嘅奮鬥史，亦係達哥第一張個人純音樂大碟。
去年年尾，達哥發表多年來新作《明日之舞》，出碟前已預告新EP會包括「充滿情境想像嘅純音樂」；因為呢一句說話，啟發我開始寫呢個【尋找香港純音樂系列】。待終於收到EP一刻，發現碟內5首曲目包括兩首純音樂，分別為第2首《無眠之夜》及第4首《重啟通道》，兩曲在碟中起有重要橋樑作用，用作連接3首有主唱作品《無名哀歌》、《本地製造》及《明日之舞》，從而帶出整張EP概念主題。
開場曲《無名哀歌》歌如其名，係一首關於我城嘅哀歌；緊接嘅《無眠之夜》，延續著呢份莫名而來、卻不知何時離去嘅傷感，尤其喜歡一開始荒涼電結他和弦，令我想起達明《愛彌留》。至中段幾下電結他Feedback，彷佛代表心中種種意難平，總要找一個缺口去發泄。
來到《本地製造》，襯底嘅Noisy電結他彈奏，似是回應著《無眠之夜》嘅電結他Feedback，亦標誌著EP放下哀傷、走向堅強嘅轉接點。然後《重啟通道》更開宗明義地重振人心，開首以美妙琴音及破碎電音節拍主導，成功營造出一份迷離中漸見方向嘅氣氛。至中後段加入鼓舞弦樂，讓聽者投入其中，聞歌起動；結尾再以動人鍵琴彈奏作結，完美接上完場曲《明日之舞》電結他掃撥，歌曲由Lariane Chan主唱，末段聯同達哥、戴偉、監製Seasons Lee眾人，合唱出這首全碟重心作品。
就如達哥所言，《明日之舞》係達明一派《今天應該很高興》及《今天世上所有地方》後第三部曲，加入了達哥嘅信仰及想法 —— 無論世界如何破爛，全屬上天給予世人嘅考驗，就看我們如何去面對。你會選擇留下還是離開？躺平、無視或恥笑？還是盡己所能，全力去起舞吧？一切就看我們每個人嘅選擇。
當初主要因為純音樂而對達哥新作產生興趣。但當我最後聽完整張《明日之舞》，發現無論係純音樂、抑或有曲詞主唱歌曲都好，最重要係透過音樂，成功傳遞我思我想。感謝達哥、感謝Seasons Lee、感謝主唱嘅Laraine Chan，眾人合力製作了《明日之舞》，一張送給世界上所有香港人嘅作品。
