自去年年初開始，「達哥」劉以達每星期透過社交平台發佈自傳《方丈尋根記》，寫得生動鬼馬，詳盡記錄佢初出道時音樂奮鬥史，同時側寫80年代香港歷史。文章換來大量好評迴響，其後達哥亦宣佈推出《方丈尋根記．前傳》實體版本＋CD；等候多時，直至年尾終告面世。
收到自傳至今已三個多月。書中大部份內容之前已喺網絡發表，我主力睇末段未曾公佈嘅內容，主要講及達明一派組成初期經歷；附帶嘅純音樂CD亦有聽過好幾次，然後便放埋一邊。
直至早前，突然心血來潮，決定從頭到尾再讀多一遍《方丈尋根記．前傳》，同時播放純音樂CD，換嚟截然不同嘅閱讀＋聆聽體驗。
或者咁講，《方丈尋根記．前傳》好比一齣達哥傳記電影，而CD就係電影嘅Soundtrack。
由第一章「White Light 一道白光」／第一曲《White Light 白光》開始讀起／聽起，再次回到達哥由出生、童年、到年青成長夾Band嘅青蔥歲月，CD曲目名字同書中部份章節如出一轍，但建議大家唔需要刻意為意，只需要一邊播住、一邊閱讀便可以。
重讀《方丈尋根記．前傳》，比之前每周追看佢Update新文嘅感覺唔一樣；之前會期待達哥下一星期會寫乜呢？DLLM？Beyond？OEO？陳少琪同黃耀明又幾時先登場？如今一氣呵成讀回，更能感受到達哥對音樂嘅投入、堅持。書中人生道理好簡單，就係成功需苦幹，不斷鍛練鍛練再鍛練。
好似太陳腔濫調？但做人從來知易行難。談夢想之前，請先將夢想好好實行吧。所以達哥喺自傳中加入唔少樂器彈奏調校、編曲處理執行嘅「技術文」內容，外行人讀時未必完全明白，但看似沉悶嘅篇幅，一點一滴累積落嚟，就係成就方丈成為音樂「達」人嘅不二之法。
CD前半部份樂曲以電結他主導，可見達哥嘅搖滾音樂根源，亦令我輩樂迷聽得淋漓痛快 —— 達哥終於推出純音樂專輯喇。《Band 樂隊》一曲對應書中內容，應該係指達哥第一隊樂隊DLLM；但音樂上全無DLLM嘅低調Art Rock / Post-Punk味道，反而加入頗電氣化及二胡彈奏。《Lost 迷失》同《Drift 漂浮》接連兩曲所營造出嘅滄涼氛圍，的確好切合DLLM解散後、達哥頓然迷茫不知去向嘅心情。
當然，以上提及曲目，仍然係由達哥最愛嘅電結他做主角。直到《Fusion 融合》一曲，換上彷如Giorgio Moroder風馳電掣式Sequencer節拍＋Vocoder人聲，正正回應書中同一章節，達哥回憶當年遇上Synthesizer同MIDI嘅驚喜，改變佢對「樂隊」嘅定義 —— 原來唔一定要Full Band叫齊鼓手Bass手第二結他手，只要有我，劉以達一個人，加多部Synth，已能夠玩奏到好豐滿嘅音樂，亦由此奠下日後達明一派電子＋結他嘅音樂取向。
專輯內有多首曲目加入人聲，但通常化成樂器演奏一部份，唯獨兩首作品《Partner 拍檔》同《Mother 母親》有啲特別，達哥嘅人聲更似在唱旋律，不過你係聽唔清楚佢唱乜嘢，介乎中文、英文同喃喃自語之間，而專輯亦未附送「歌詞」，相信係達哥刻意為之，這兩曲用意何在，就由一眾樂迷自行解讀。
我自己認為，媽咪同黃耀明，應該係達哥一生中（除太太之外）最重要嘅兩個人，既然佢哋兩個未有 / 未能參與呢張專輯，達哥便唯有將佢想表達嘅情感抹去部份；但相信Anthony，以及在天之靈嘅達媽，一定會完全接收得到。
專輯以《Harvest 收成》一曲作結，一首意氣高揚嘅Upbeat樂章。Intro完結、達哥一聲「Let's Go」之後，再次奏出佢最拿手嘅Guitar Solo。樂曲呈現出達哥在達明一派發表首張E.P.後嘅興奮 / 振奮心情，既為《方丈尋根記．前傳》寫下完美句號，同時開啟新一章 —— 踏入2023年，正式「登六」嘅達哥，再度喺社交平台發表《方丈尋根記之II》新文章，以1990年達明一派第一次演唱會作開場，再倒敍回達明初出道作為「錄音室組合」，點樣處理出騷玩Live嘅問題，藉此解釋陳少琪成為達明影子成員嘅由來。達哥亦開設「方丈尋根」Youtube頻道，以影像記載佢未完嘅尋根之旅。
作為由1987年《石頭記》開始便追隨達明一派嘅我，期待達哥喺《方丈尋根記之II》新一章分享更多技術文；佢同明哥、陳少琪、周耀輝、潘源良、方心美、邁克、進念、何秀萍、Beyond、浮世繪、Do姐、陳慧嫻……合作嘅有趣逸事；樂隊同兩位監製黃祖輝、陳永明喺錄音室嘅工作關係又係點？繼續期待，繼續追尋，Music Dreams Never End。
