世界盃8強開戰，首兩場比賽都要踢至加時兼互射12碼先分到勝負。既辛苦了球員，亦辛苦捱夜捧場嘅球迷。不過「Too Long」嘅球賽，的確有佢嘅魅力所在，亦係考驗球員心智嘅時候。呢方面，「老油條」克羅地亞明顯比「老牌熱門」巴西優勝，兩隊差距就係只差一點點，導致巴西大熱倒灶出局。
話克羅地亞「老油條」，其實唔算太準確。單計球員年齡，年屆37歲嘅靈魂人物摩迪固然「年事已高」（但越老越勁），其他主力老將就只有同屬33歲嘅佩利錫同路夫蘭。嚴格而言，克羅地亞陣容集齊老中青三代，係一隊既有經驗又有活力嘅黑馬。
對巴西呢場比賽，無疑計埋門機會係巴西完勝，亦喺加時階段靠尼馬嘅靚入楔先開紀錄。但克羅地亞全場俾我嘅感覺係從容不迫，論搓波控波傳波走位，佢哋甚至比森巴兵團更流暢。更驚人係佢哋嘅專注力同耐力，就算比數落後，仍能保持淡定，耐心尋求追平機會。上場對日本如是，今場對巴西亦如是。
作為英格蘭球迷，我對克羅地亞十分尊敬。上屆準決賽，佢哋就係用實力同耐力擊敗英軍，我哋輸得心服口服。我要送一首法國著名電子樂隊Daft Punk嘅《Too Long》向佢哋致意：「It's been much too long / I feel it coming on / The feeling's getting strong」。比賽時間越長，克羅地亞越強 ── 格仔軍團應該係呢兩屆世界盃中比賽時間最長佢哋球隊 ── 2018年，佢哋由16強到4強連續3場都要踢加時；頭兩場更同今屆一樣，同樣靠12碼贏波晉級。如今，歷史彷佛重演，阿根廷真係要小心。就睇吓美斯佢哋球隊，能否報返上屆分組賽慘敗予克軍佢哋仇。
（原文2022年12月10日於Now Sports網站上載）
