自從開設【字裡知音人】網站以後，我不時思考一條問題︰純音樂，喺香港，以至全世界，從來無乜市場，何解一直以來，仍然有一班樂隊／音樂人，好似本文主角「假日貞操」（ Virgin Vacation），願意「挺而走險」，走上創作純音樂呢條不歸路？
何解有感而發？最近讀罷劉以達《方丈尋根記．中傳》，對以下一段文字特別深刻︰「點解唔繼續做純音樂？現在諗深一層，要做大事，亦需要有強大經濟後盾；有財力，先可以做到一D比較理想化嘅事，商業唔係藝術，但商業可以支持同發展藝術。」
讀完呢一段，我馬上想到達明一派，仲有Radiohead。仲有無呢？
一定有，但數目肯定唔多；玩純音樂嘅更加少，甚至可能無？你千祈唔好喺我面前提Kenny G之流。
假日貞操，2018年組成，活躍於彷如隔世嘅新冠疫情年代。2000年當我第一次聽到樂隊處女作《Acid Rain》 —— 長達7分半鐘嘅Trippy旅程，樂隊四人Wing、Step、James同Chin Ho嘅演奏功力，已教我認定要繼續留意佢哋日後發展。
假日貞操亦從來無令我失望，由《Acid Rain》到處男同名EP《Virgin Vacation》，再到去年兩首精彩細碟《RED》與《Forest》，以及《Virgin Vacation Remix》混音專輯，一路走來，已教我十分肯定，佢哋係全港最佳Instrumental Band！
2004年4月，假日貞操終於迎來首張錄音室專輯《Dapple Patterns》。單看碟名，確實頗能形容樂隊風格 —— 當年聽到《Acid Rain》，已形容此曲由不同Patterns造成，再Organic走埋一齊，形成一首超水準樂曲。
記得浮世繪樂隊主音梁翹柏曾分享昔日初聽Japan《Gentlemen Take Polaroids》一碟時，感到非常震撼；佢發現碟內歌曲非由Chords、而係由Patterns組成，由此深深影響佢嘅音樂創作。同樣擅玩Patterns嘅樂隊，我仲諗到Post-Rock班霸Tortoise，今天就有假日貞操。
簡單而言，大家的確可將假日貞操納入後搖滾範疇，但佢哋又不止於此；一路走來，樂隊嘗試涉獵多種音樂元素，Post-Rock、Krautrock、Minimalism、Ambient、Jazz、Free-Jazz……去年兩張細碟，《Forest》喺後搖滾基礎上，加入羅曼四重奏嘅弦樂，更請來本地Hip-Hop樂手Gold Mountain負責Rapping，擦出不少音樂火花。《RED》就加入銅管樂演奏，極有技術搖滾架勢。
當日推出《RED》時候，假日貞操成員Wing已預告，樂隊專輯將會繼續出現Brass Section。事隔一年，《Dapple Patterns》終告面世，銅管樂亦成為新碟其一個重要Pattern，貫穿開首結尾多首樂曲。《Yellow Scissors》完美演繹純音樂專輯開場曲一切所需 —— 鼓、低音、電子合成器、銅管樂與充滿金屬味嘅電結他，交織出暴風雨即將來臨嘅氣勢，結尾更出動埋Acid聲效，然後毅然停止，再完美地緊接第二首《Ghost》。
《Ghost》同去年一首《RED》彷如雙生兒。之前形容《RED》嘅詞彙：狂野奔放，毫無冷場，同樣適用於《Ghost》。唯一不同在《Ghost》中段有轉折位，讓一眾客席銅管樂手有抖氣位，然後與樂隊一齊互Jam進入最後高潮位。記得當年自己好鍾意Trans Am呢隊後搖滾樂隊，而Trans Am後期作品不時加入色士風演奏，同假日貞操異曲同工，同樣令我沉迷其中。
一連三首刺激樂曲之後，《Jupiter》稍為放緩，但背後蠢蠢欲動嘅節奏同聲效，配上可能係假日貞操有史以來最Melodic結他獨奏，所有嘢加起來，令人覺得首歌遲早「有啲嘢」會發生，但當聽到末段以為爆炸位來臨之際，樂隊卻硬生生收回一切，接上專輯點題作《Dapple Patterns Prelude》與《Dapple Patterns II》，換來完完全全不同樂風，重覆又重覆嘅Patterns演奏，鐘片琴一出無疑令人想起Tortoise，但《Dapple Patterns》係屬於假日貞操自己風格嘅器樂後搖滾樂章；之所以提及Tortoise，只想大家有個聯想切入點，有興趣認識並欣賞佢哋嘅音樂世界。
從《Dapple Patterns II》到《Forest》，鐘片琴成為兩曲之間連繫，引領聽者感受樂隊充滿搖滾味道一面嘅後搖滾世界，還意猶未盡加多一段《Forest Reprise》作完結。最後一首《Dapple Patterns I》，幾乎將全碟所有音樂元素重現，以全新Patterns編排演奏，近乎沒有起伏，非常實驗，好有總結意味嘅完美完場曲。
假日貞操嘅《Dapple Patterns》，果然無令我失望，尤其欣賞樂隊製作及編排樂曲之間嘅心思，全碟9首曲目互有連結及推進，展現佢哋不同音樂面貌，係一張需要由頭聽到尾嘅真正專輯作品；但個別抽出自己喜愛曲目獨立聆聽也無不可，我就最鍾意《Dapple Patterns II》。如果我哋活著嘅世界，係一個以Post-Rock／純音樂主導樂壇嘅世界，《Dapple Patterns II》將會抽出嚟做細碟，並打上吒叱流行榜冠軍。
當然，現實世界，係一個以流行曲主導樂壇嘅世界。回應文首一條自設問題，無論有無市場價值，純音樂總有佢嘅價值。做大事，固然要財力。但歷史告訴我，實在太多太多人獲得財力後，忘記自己初衷，更自欺欺人用一大堆理由，合理化自己行徑。
諗通呢一點，就解釋到何解世上總會有一班樂隊／音樂人，全情投入做一啲市場認為戇居無價值嘅音樂。呢個世界唔會有太多隊達明一派或Radiohead，更多係Kenny G及Oasis之流；就算做唔到所謂大事，起碼能做到自己認為有價值嘅理想化嘅事，只要做得出色，總會感動到一班人和你同行，彼此可以老土地唱返首Beyond《無悔這一生》共勉之！
不過呢，假日貞操係Instrumental Band，應該會改為玩奏純音樂版吧！
