一開始，的確係俾假日貞操嘅樂隊名吸引過去，不禁令人好奇幻想佢哋係玩咩類型嘅音樂。樂隊啱啱公佈嘅single《Acid Rain》，搵嚟佢哋好友、著名漫畫家黎達達榮為樂曲MV製作動畫，自然係吸引傳媒同大眾注意嘅賣點。
不過，一切都要返番去音樂本身感受。長超過7分鐘嘅《Acid Rain》，係一首純音樂作品，亦係一次好trippy嘅旅程。一開始延綿嘅低音結他彈奏，貫穿成首樂曲，再漸漸引入凌散冰冷嘅節拍，同埋充滿空間感嘅電子音效，我諗起英倫電音廠牌Warp Records上世紀九十年代嘅作品，即係Aphex Twin、 µ-Ziq嗰種。到電結他一出，帶嚟濃濃迷幻感覺，後段更彈到好似70年代Progressive Rock嗰類迷幻Organ演奏咁，合埋雙眼已可以令聽嘅人浮游喺天空中，毋需大麻亦可getting high。
至於由樂隊結他手Wing執導、黎達達榮主理嘅《Acid Rain》動畫MV，比樂曲本身更迷幻，充滿耐人尋味嘅畫像，亦係好有趣嘅視覺體驗。
好難界定《Acid Rain》屬於邊一類型音樂，基本上呢首作品係由好多pattern組成，無乜高潮起伏位，所有樂器、節拍、聲效都係好organic咁演奏進行，重覆又重覆，重疊又重疊，呢方面的確令人聯想起Post-Rock。聽聽《Acid Rain》現場演出，同錄音室版本一樣高水準，更能睇到樂隊成員嘅合拍無間。
我已喺心入面Mark底「假日貞操」呢個新名字，未來會繼續關注佢哋嘅音樂新發展。
（原文2020年6月23日喺「紳吟」Facebook上載）
