（原文喺2004年《mcb》刊登，現改為粵文版本，並稍作修改）
我應該點樣去解讀拜金小姐（陳珊妮、李端嫻）呢張同名專輯、佢哋呢次同台灣插畫家 / 小說家可樂王嘅Crossover合作？
以麥當娜（Madonna）名曲《Material Girl(s)》命名，將物質（拜金）主義放諸廿一世紀嘅超後現代全新論述？以潮流偶像人物做類比象徵，並透過新世代互聯網符號文化同科幻拼貼剪裁手法，表達出對現世殘缺、霸道嘅資本主義嘅無聲抗議？
好似好高深、好犀利，我怕寫完後連自己都睇唔明。算啦，我決定放棄，乾脆乜都唔諗，只係純粹地聽同睇。
以卡通 / 漫畫人物做樂隊形象包裝，外國有Gorillaz，香港都有My Funfair。不過拜金小姐特別之處在，佢哋嘅同名專輯仲連同圖文小說《拜金小姐大戰惡魔黨》推出，同樣由可樂王執筆 ── 一次音樂、圖像與小說嘅跨媒體創作。小說內容有啲無聊，講述創造世界嘅2位拜金小姐，點樣抵抗壞人惡魔黨侵佔地球嘅計劃。但只讀文字似乎唔夠過癮，如果將佢拍成科幻卡通片，相信會更有睇頭。唔講其他，單係睇封套上2位拜金小姐造型，已經十分有趣正斗。
聽完唱片後，更發覺，好耐未聽過咁直接、無聊，又有趣正斗嘅流行曲啦！
可樂王嘅歌詞應記首功。當聽到開首嘅《波麗露露》已忍唆不禁：「女生的胸部也是圓圓的地球 / 男生的屁股也是圓圓的地球」。台灣嗰邊嘅主打歌《小鳥探戈》，歌詞以鳥喻人：「我的個性很機車 / 我的手段很陰險 / 鳥們說我太像人類」，背後好似有深層意思，但一切仍以趣味性為大前提。編曲上明顯向80年代奧地利的士高歌手Falco嘅Tango The Night致敬，更神來之筆加入Banjo彈奏，同後段嘅Old Synth獨奏互Jam，屬高水準Electro-Pop示範！
2年多前拜金小姐首度曝光嘅歌曲《黑妞馬子》，如今就成為專輯完場曲，大量動聽嘅吵耳電結他彈奏，正如歌詞所形容，佢係一首溫柔嘅Punk-Rock：「她們甚至很怪很怪 / 可是她們很溫柔 / 超未來感 / 內心是貓」。其實我有時都會咁諗︰鍾意聽古怪音樂 / 流行曲嘅人，大多擁有一顆善良溫柔嘅心（包括我自己哈哈哈）。
碟入面好幾首慢板作品同樣非常溫柔，三拍子嘅《清晨音樂》，編曲甜美可愛，珊妮同Veegay嘅和聲合唱都幾合拍；《一種簡單的輝煌》算係比較「正常」嘅情歌，但有趣係客串嘅黃貫中唱得異常溫柔，唔睇Credit都聽唔出係佢嚟！
擁有New Order式低音同千奇百怪電子音效嘅《人生歌王》，相信大部份人聽後都會發出會心微笑：「就躺在澡盆裡面唱歌 / 雖然唱得很爛 / 但我也要唱得很爽」，試問有邊個未試過一邊沖涼一邊唱歌？呢個就係我最欣賞拜金小姐同可樂王嘅地方，以口語化文筆，道盡我哋日常生活中瑣碎事；雖然無聊頂透，但聽著讀著，卻十分有親切感、認同感。
因為，我哋嘅生活都一樣無聊頂透啊！
整張專輯，我最鍾意《哈啦全年無休》，因為佢可能係史上最佳華語Synth-Pop作品（中段Synth Solo正到爆，更明顯向OMD《Enola Gay》致敬）；因為佢同時讚美人生嘅無聊：「我們說哈啦全年無休 / 全年無休 / 打屁哈啦樂無窮」。我哋每個人都想振作、想努力，心裡有無數願望想達成。最好做有用嘅人、做偉人，做哲古華拉，改變社會、改變世界。你話幾有意義。
不過，當哲古華拉聽見強勁的士高節奏，佢點忍住唔Un Un腳跳舞？
聽拜金小姐、瞓個靚晏覺、同老友吹水傾偈、睇第N次周星馳嘅《整蠱專家》、郊野燒烤樂……真箇樂無窮！
