（原文刊登喺2004年《mcb》，現版本稍作修改。當日前往欣賞Kraftwerk演出嘅場地Zepp Tokyo，早前宣布將於2022年1月結業，Nothing lasts forver，唯有音樂長存。）
台場位於東京東南部，係個精心規劃嘅填海地區，毗鄰著名東京彩虹橋，景觀一流。呢度設有多個購物娛樂中心、各式展覽館，同埋一個大型溫泉等等，就連富士電視台總部都係喺呢度。遊客嚟到台場玩，絕對唔擔心無節目。
不過，今次我嚟台場，目的只有一個：Kraftwerk。
2月28日，Kraftwerk嚟到台場Zepp Tokyo，展開佢哋World Tour嘅東京站首場演出。之前，佢哋已喺大阪同名古屋舉行過3場Live；喺東京再表演多5場之後，佢哋就會飛返歐洲，繼續On Tour。
日本係Kraftwerk今次世界巡迴表演中，唯一「途經」嘅亞洲區國家，亦係同我哋距離最近一站。
機會可一不可再，既然咁啱呢段時間身處東京，無論如何，都要睇到佢哋嘅Live先至心足，如果唔係我會後悔一世。天知道佢哋下次World Tour會係幾時？
其實出發前，自己曾嘗試網上預訂門票，可惜日本銷售網站只受當地人玩，不得要領下，惟有嚟到東京先見步行步，大不了買黃牛飛。表演前一日，致電當地主辦單位查詢，對方用英文禮貌回答我，聽日開Show前仲有部份門票即場發售，立刻放下心頭大石。
2月28日，由新宿坐JR去台場，大概半小時左右就到達。馬上衝往表演場地Zepp Tokyo，一手交錢，一手交貨。門票7,500日圓，唔算貴，但位置係最最最後排，無辦法，靚位一早已售罄。不過無所謂啦，能夠睇到Kraftwerk，我已經好開心喇。
素聞喺日本看Live，保安十分嚴密。今次睇Krafterk，入場前所有觀眾必須將背囊手袋之類寄放儲物櫃內；必要時，保安人員仲會搜你身，檢查有否帶相機或攝錄機等「違禁物品」入去。人在異地，我唔敢冒險以身試法，惟有乖乖攞出所有隨身物品，然後手空空、無一物進場。
場內首先睇到樂隊紀念品攤位，可惜大部份都係舊款貨式，如《Tour de France》單車衫、《The Robot》風褸，同埋幾款Tee等等，呢啲都可以喺Kraftwerk官方網站訂購得到，無乜特別。唯一新貨係新細碟《Aero Dynamik》嘅黑白Tee，亦係我唯一斬獲，盛惠3,500日圓，都幾貴。
Zepp Tokyo嘅場地環境，有啲似我哋嘅九龍灣展貿，地下一層屬清一色企位，可容納嘅觀眾都幾多，加上二樓仲有超等座位，我估計當日入場人數超過2,000人，非常墟冚。環顧四周，搵唔到任何澀谷後生美少女蹤影，相反絕大部份觀眾都係中年男女，有啲甚至一身西裝打扮前嚟。畢竟Kraftwerk已係成立33年嘅「老餅」樂隊，嚟睇佢哋表演嘅，年紀當然有返咁上下，唉，今次唔認老都唔得喇。
我嘅位置雖然喺最後排，好在場地本身唔大，仍可清楚睇到成個舞台。開場前一刻，心情不禁緊張起嚟：究竟Kraftwerk嘅開場曲會係邊首呢？
然後，《The Man Machine》響起，全場鼓舞。舞台幕簾拉開，Ralf Hutter、Henning Schmitz、Fritz Hilpert同Florian Schneider，由左至右，一字排開企喺度，著住當年嘅紅黑西裝，一邊㩒Notebook，一邊彈Keyboard，主唱部份由Vocoder負責，背後嘅Video Wall就播放住《The Man Machine》嘅Flash字體動畫。
一切非常簡潔，亦係我哋非常熟悉嘅Kraftwerk模樣。我就同其他觀眾一樣，興奮投入跟住唱。
只係輕輕嘅興奮，唔算激動。始終Kraftwerk玩嘅係電子音樂，唔係熱血搖滾，你睇負責主唱嘅Ralf一派斯文、從容不迫唸唱住《Expo 2000》同《Tour de France 2003》就知道，雖然呢兩首有啲沉悶。不過《Vitamin》一響起，全場又振奮過嚟，好鍾意Video Wall嗰段維他命丸動畫，令我諗起New Order細碟《Fine Time》嘅封面，但當然拍得非常健康，一啲都唔得Ecstasy！
然後，就係懷舊金曲時間。Kraftwerk接連送上《Tour de France》原版、《Autobahn》、《The Model》、《Neonlight》、《Trans Europe Express / Metal On Metal》、《Radioactivity》一大堆經典作品。音樂上偏向《The Mix》時期嘅Techno-Pop風格，旋律清晰簡潔，編曲乾淨利落，一啲都唔拖泥帶水，亦係一直以來我最鍾意Kraftwerk嘅地方。
《Radioactivity》完結後，表演第一部份告一段落。待幕簾再拉開，Ralf四人領呔上多咗粒不停閃爍嘅紅色燈仔，據知曾喺《The Robot》嘅Music Video中出現過。不過，呢部份玩奏嘅，全部都係《Computer World》嘅歌曲，佢哋最具前瞻性嘅專輯。先嚟《Numbers / Computer World》熱身，繼後嘅《Pocket Calculator / Dentaku》先係高潮。呢個當然，當Ralf用日文唱住《Dentaku》時候，簡直全場哄動，情況就如David Bowie喺香港演唱會中唱「剎那天地」一樣！ 最後以《Home Computer》完結「電腦時代」部份。
第三部份只玩奏咗一首歌，卻獲得成場演出最多歡呼聲，全因樂隊眾人落場休息，由《The Mix》時期4位機械人頂上，唱《The Robot》！睇住「佢哋」嗰啲生硬動作，真頂癮！
不經不覺，已嚟到表演最後一部份，Kraftwerk換上《Expo 2000》嘅螢光線條衣著登場，玩咗2首新作《Elektro Kardiogramm》同《Aero Dynamik》後，就係大家心知肚明嘅完場曲《Music Non Stop》。《Music Non Stop》唔算係我特別鍾意嘅Kraftwerk歌曲，但用佢嚟做結尾，真係再適合不過。
Music non stop, techno-pop。
Kraftwerk只用咗寥寥幾個字詞，就概括出樂隊33年嚟嘅音樂歷程。
或有停滯，但仍舊繼續向前走。
講真，對好多人嚟講，Kraftwerk嘅Live只係睇4個阿伯喺台上一碌木彈Keyboard，音樂又一早Programme好，慳水慳力。究竟有乜吸引力？
我會將佢哋嘅表演睇成係Performance。但如果你一定要將佢當做Live，我會話，Kraftwerk係顛覆緊一般人對Live嘅定義。
真正嘅搖滾精神。
音樂嘅存在意義，亦都一樣。Just let the music play，non stop！
