（原文刊登喺2002年《mcb》，現版本稍作修改）
我相信，呢個世上真有一班人，佢哋係注定永遠孤獨。佢哋唔信奉任何神明或信念，佢哋就連自己嘅存在也懷疑，仲講乜嘢信念？
但，人類係群體動物，除非你完全遠離社會，唔係嘅話，總要同其他個體接觸。問題就出喺呢度，因為人同人之間嘅無形交通，無論點樣孤獨嘅人都好，世上總會有人願意走近你、上前了解你。遇到咁嘅情形，你會點做？繼續帶上假面具，定係重新開放內心？
仲記得Jack嘛？嗰隊初出道時一行六人、人才濟濟嘅Jack，曾被傳媒形容為（又一）英倫樂隊新希望。1995至96年間，樂隊推出咗《Kid Stardust》、《Wintercomessummer》、《White Jazz》同《Biography Of A First Son》呢4張風格鮮明細碟作品。相比起同期一大堆「三腳貓功夫」嘅後Britpop樂隊，Jack無疑優秀得多。因為喺主音Anthony Reynolds同結他手Matthew Scott呢兩位樂隊創作大腦背後，仲有一班出色隊友支持，能完全了解佢哋嘅音樂概念，再透過樂器完美搬演出嚟。
當以為一切發展順利，背後已隱藏危機。Jack稍後發表嘅《Pioneer Soundtracks》，確係一張出色嘅處男專輯。Jack以英倫結他音樂做主軸，但玩嘅唔係令人聽得開開心心嘅爽勁Britpop，相反係走細緻編曲嘅長篇Ballad曲目，配上煽情弦樂襯托，處處可見到匠氣嘅心思編排段落，雖然嚟得有啲刻意求表現，但卻令人重新認識何謂真正用心創作嘅英倫結他流行曲。
《Pionner Soundtrack》得到樂評一致讚揚，但得唔到樂迷歡心，因為Jack嘅音樂內容，永遠係有關沉倫、卑微、孤絕嘅黑暗世界，試問有幾多人會感同身受，特別係喺嗰個高歌人生快樂萬歲嘅Britpop年代？無被普羅大眾認同，就係Jack嘅宿命。佢哋唔係Oasis，最終有負眾人眼中嘅英倫樂壇新希望，但起碼，Jack無辜負真正鍾意佢哋嘅樂迷。
《Pioneer Soundtracks》推出後，Jack嘅成員有所變動，Anthony亦趁樂隊呢段停滯時期以Jacques名義，同佢偶像Momus合作灌錄專輯《How To Make Love Volume 1》。1998年Jack再度回歸，《The Jazz Age》係佢哋更圓渾成熟嘅第二張專輯，但反應比上一張更差。繼後一段日子，惡運仍然未脫離Jack，先係樂隊經理人退休，後嚟佢哋亦因銷量問題離開唱片公司Too Pure，期間隊友走嘅都走，最後，只剩低Anthony同Matthew兩個。
由當初集萬千寵愛，到而家嘅沉寂孤零，Jack喺短短數年嘗盡人情冷暖。或者，Anthony同Matthew筆下嘅沉倫樂章，係一切問題嘅罪魁禍首。如果唔係受受切膚之痛嘅人，又點會明白《Biography of a First Son》同《3 O' Clock In The Morning》中嘅自閉人沉溺自白、《Filthy Names》嘅卑微情侶逃亡故事、《I Didn't Mean It Marie》嘅血淋淋情殺劇目、《Saturday's Plan》對虛度光陰嘅讚美？畢竟喺呢個世界，自命快樂樂觀嘅人佔大多數，但Jack竭力描繪人性陰暗面，咁樣注定唔會有太多人有勇氣面對佢哋嘅音樂，除非，你都係其中一份子。
無唱片公司支持、隊友走哂，但Jack仍然要繼續走落去，好似苟延殘喘嘅生命，仍然要繼續存活落去。2年前，Anthony同Matthew喺西班牙廠牌Acuarela推出過一張風格粗糙嘅E.P.專輯《La Belle et la Discotheque》，不過據佢哋講，嗰次係一次唔愉快嘅合作經驗。同年Anthony嘅Jacques亦帶嚟第二張專輯《To Stars》。最後，Jack喺Disques du Crepuscule呢間法國小型唱片公司落腳，第三張專輯《The End Of The Way It's Always Been》終於面世。唱片封套更少有地以Anthony同Matthew二人做主角，不過佢哋嘅容貌，比7年前蒼白得多。
就算無人再願意上前了解，佢哋仍然係嗰隊Jack。新專輯入面，樂隊昔日嘅華麗弦樂同編曲已減退，開場曲兼主題曲《The End Of The Way It's Always Been》，Matthew近乎暴戾嘅橫行電結他彈奏，配上冷冰冰死亡讀白，感覺好似驚慄電影配樂；嚟到結尾，連串狂亂鼓擊同Anthony反覆唱道「This is the end of the way it's always been」。全曲完美展現Jack嘅全新音樂風格：暴戾、乖張，比以往嚟得更直接、更赤裸裸，更令人不安。
緊接嘅細碟作《The Emperor Of New London》似係開場曲嘅續集：「I'm so fucking high. Death wouldn't dare interrupt me now」。當生同死都無所謂時候，尋死既無意義，倒不如選擇漫目無的存活，透過自虐嚟換取些微快感吧。喺《La Belle et la Discotheque》E.P.出現過嘅《Disco-Cafe-Society》，全新版本依舊保留原曲嘅粗糙電結他Riff、簡陋電子節拍同低能琴音，係Jack有史以來最Lo-Fi一次，但歌曲易上口嘅Sing-a-long旋律，同碟入面另一首同樣流暢嘅《Sleepin' Makes Me Thirsty》，令人諗起以前Jack嘅美好結他流行曲例如《White Jazz》、《Cinematic》等。軀體入面嘅靈魂，一直無變過。
《That's The Way We Make It》、《Maybe My Love Doesn't Answer Anything In You Anymore》同《Sometimes》呢3首Ballad仍然保留Jack一貫弦樂或銅管樂編排，舊隊友小提琴手Ruth Gottlieb亦有幫手，不過器材同混音當然唔及以往壯麗。歌詞仲係舊模樣，好似《Sometimes》描寫一段不能自拔嘅愛情關係：「I loved you like the dark, knows the pain beside the joy. Yes I loved you in some car broken on a motorway」，同講飛車嘅Cult電影《Crash》情節係咪有啲相像？10分幾鐘嘅長篇完場曲《No North Left》，Anthony再次同我哋講一對戀人末路狂奔嘅公路故事，好似觸電嘅電子鼓同取樣音效穿插其中，由緩慢到激昂，Matthew嘅電結他彈奏好似呼應緊開場曲，呢條係一條逃走唔到嘅末路，直到永遠。
我哋一生中，總試過有人願意走近你、上前了解你，但性格係每個人嘅宿命，譽如Jack，無論過程中發生乜嘢事都好，最終仍然係Anthony同Matthew兩個人獨自行落去。未來佢哋會點，無人會估到，或者有新成員加入，或者有意外轉機都唔定，邊個知道？不過Jack早已喺《Pioneer Soundtracks》一曲《Hope Is A Liar》提醒我哋，希望係世上最美好、亦係最奢侈嘅事情，有希望，先會有幻滅，請唔好對未來存有任何幻想。
我相信，世界上真有一班人，同Jack一樣，每晚都行緊一條最漆黑嘅路返屋企，曾希望會碰到任何人或任何事，同樣跟住呢條路一齊行。但我擰轉頭，見唔到任何人，唯有回家，帶住一個神經質嘅笑容入睡。
