（原文刊登喺2004年《mcb》，現版本稍作修改。主相為波希米亞樂隊，由小白兔橘子唱片提供）
我一直都好想寫一次《mcb》嘅「一張影響你畢生的專輯」專欄；又或者，一種影響你畢生嘅音樂。
係Post-Rock。
或者未致於影響畢咁嚴重。但，Post-Rock嗰種打破一般搖滾音樂格局、唔受任何既定模式或規範所約束嘅本質，完全改變我對音樂嘅固有概念。
更有趣係，直至而家，我仍然未了解Post-Rock係一種點樣嘅音樂？我又點解會鍾意Post-Rock？
從Godspeed You! Black Emperor、到甜梅號、到Explosions In The Sky、到草莓救星，我仍然繼續不倦去搵答案。
呢一次，我嚟到錫盤街，我遇到波希米亞。
波希米亞：「即興係搖滾樂嘅最高形式」
將台灣4人樂隊波希米亞（Bohemia）歸納為後搖滾，似乎唔太準確。或者，「即興搖滾」會係更貼近嘅形容詞。
佢哋都咁認為。成團已3年幾嘅波希米亞，可以講係台灣其中一隊最奇特嘅樂隊。能彈結他同低音結他嘅3位成員陳俊安、黃宏駿同李常磊，加上鼓手莊弼涵，4人一直堅持只玩現場、唔玩重覆嘅樂曲；樂曲亦無歌詞，因為佢哋認為「有些事情是無法用話語來描述」，惟有透過最原始、最直接嘅音樂，先可以表達自己。
佢哋選擇咗搖滾樂。但係，係無經過事前採排、一上台就即場演奏嘅搖滾樂。就好似Free-Jazz。
樂隊組成初期，4位波希米亞堅持每星期夾Band一次，由半夜練到天光，佢哋之間心靈相通嘅無言默契，就係咁一點一滴累積起嚟。
2001年，樂隊自資推出咗一張同名Live專輯之後，部份隊員被徵召當兵。不過，當兵都有休假時候，期間佢哋仍斷斷續續維持演出，舊年都有參加春天吶喊音樂節；當日嘅表演，便錄製成為波希米亞第2張Live專輯《The Invisible Door》。
聽波希米亞嘅唱片，你必須先撇取錄音質素呢點考慮。可能礙於成本同器材等問題，《The Invisible Door》嘅錄音水準實在粗糙，但起碼比上張同名專輯好得多。
或者，從另一個角度去睇，波希米亞喺先天性殘缺嘅差勁錄音質素底下，仍然可以喺唱片入面清楚感受到佢哋強大無比嘅即興搖滾能量。你就知道，波希米亞係一隊幾唔簡單嘅樂隊。
喺《The Invisible Door》長約32分鐘嘅5首純音樂曲目入面，波希米亞玩奏出一種藥味非常濃烈嘅迷幻搖滾，即興得來充滿張力。從開首《This Is A Gift, Wait A Minute!》嘅山雨欲來，轉折到《The Sky Line》以動人嘅噪音結他勾劃出茫茫蒼白景象。點題曲《The Invisible Door》個人覺得係最接近Goodspeed You! Black Emperor嘅歌曲，由沉寂漸漸推演至中後段大量失真、失序嘅電結他演奏，無止境嘅狂飆狂亂，然後……
然後仲有啲乜？仲有兩首，但我已分唔清楚喇。究竟係邊首曲目已唔再重要喇。聽波希米亞，無論係樂者定係聽者，都會不約而同進入佢哋那扇無形之門，門後就係一片失控境界。
好在，呢張專輯只係唱片錄音。實在唔敢想像，如果一天有機會睇佢哋嘅現場演出，我會點樣。
錫盤街 進入另一個世界
喺唱片架搵返昔日台灣女子樂隊瓢蟲嘅唱片重溫。由《Ladybug 1997》嘅Punk，到1998年最後一張《讓太空人跳舞》嘅Post-Rock；然後，樂隊主音結他手琬婷前往美國芝加哥修讀錄音工程學。
芝加哥係美國Post-Rock重要大本營。好自然想像到，琬婷喺異鄉仍會繼續佢嘅後搖滾創作。進修期間，佢曾經同當地2位音樂同好組成橘子空間，發表過一張同名迷你專輯。另外佢亦以個人名義推出2張習作式嘅CDR專輯《I'm Listening…》同《Sedaris》。
舊年，琬婷終於學成歸來，好快就組成新樂隊錫盤街（Tin Pan Alley），隊名嚟自紐約一條著名街道。成員除咗琬婷，仲包括鼓手吳迪、色士風手吳貞儀，以及甜梅號嘅小白（昆蟲白），不過今次佢唔係彈結他，而係負責彈低音。
雖然組成日子唔算長，但憑住琬婷同小白喺台灣獨立樂圈嘅名氣，錫盤街好快獲得唔少知音。佢哋亦決定快刀斬亂麻，喺舊年年尾小白當兵入伍前，錄好樂隊處女專輯《進入另一個隧道》，趕喺今年1月農曆新年前發行。
據琬婷說，喺錄製專輯嘅過程中，曾遇上好多不愉快事情。她尤其唔滿意台灣錄音室嘅器材水平，如今聽住呢張《進入另一個隧道》，發覺錄音的確不如人意，但若以有限資源嘅獨立製作嘅衡量，都算可以接受啦。
基本上，錫盤街係琬婷嘅一人樂隊。專輯12首純音樂全由佢創作，各位可盡情聽到佢一手隨心所欲嘅電結他彈奏，時而急激、時而簡約、時而流麗，只可惜無機會聽到佢同小白嘅雙結他演奏。
唔想喺度逐一品評碟入面每首作品，正如琬婷講，錫盤街嘅歌名其實都無乜原因意思，只係為咗喺演出Live前、列出表演樂曲清單而起。但，《進入另一個隧道》大碟名稱改得真係好。
錫盤街引領我進入另一個隧道，通往另一個世界，身處呢度，令我回想起瓢蟲、甜梅號、Contriva、Do Make Say Think嘅美妙感覺。呢份感覺好好，如果我可以永遠匿埋喺呢度，咁就更好喇。
