（原文刊登喺2002年《mcb》，現改成粵文版本，並稍作修改）
每個城市都需要獨立音樂。廣義嚟講，可以令樂迷喺主流樂壇以外有另一種選擇，並作為反動抗衡主流嘅力量。狹義嚟講，每個人鍾情Indie Music嘅原因同感受都可以不同，包括獨立樂隊 / 樂手本人。你哋點解要夾Band玩音樂？
仍然記得喺《mcb》100期演唱會，曾請嚟台灣全女班樂隊瓢蟲嗎？可惜繼後日子，香港好少引入台灣Indie Music，但其實當地獨立音樂圈子比香港更蓬勃，可能因為演出嘅Live酒吧場地較多，令佢哋有更多機會出Show練習。加上現時夾Band嘅多數係大學生，佢哋經濟能力較強，有條件購買、聆聽唔同外國進口唱片，從而影響音樂風格更趨多元化。好似近數年大行其道嘅Post-Rock / Slowcore / Sad-Core，喺台灣都有唔少屬於此類型音樂嘅獨立樂隊，有啲更玩得相當唔錯，絕對可媲美外國水準，真係令筆者大開眼界。
再睇返台灣嘅獨立唱片公司，最著名當屬魔岩唱片，但嚴格嚟講佢哋係隸屬滾石旗下分支；已有16年歷史（1987年成立）嘅水晶唱片，最近決定交由新力發行。要數真正DIY創作、製作與發行，今天台灣有一家喚作「小白兔橘子」（White Wabbit Records，現稱「小白兔唱片」）嘅獨立廠牌。
由台灣獨立樂隊Nipples（後組成阿飛西雅）喺2年前成立嘅小白兔橘子，原先只係唱片店，進口一啲佢哋鍾意嘅外國唱片，亦寄賣台灣本土樂隊 / 樂手嘅Demo作品（筆者便曾喺度買到前甜梅號鼓手柚子嘅自製CDR專輯），並自行印製《小白兔音樂通訊刊物》，簡陋嘅排版、手寫嘅文章、近乎小孩子塗鴉嘅插圖，好有真正DIY精神。連佢哋嘅網站亦隨處可見蠻低能可愛嘅公仔Icon，充份顯示出小白兔橘子仝人對音樂抱有年輕、有趣、好玩嘅正面態度！
可愛嘅小白兔終有一天亦會成長。2002年4月，小白兔橘子正式成立獨立唱片廠牌，建設自己嘅錄音室，並喺短短半年間，為兩隊台灣獨立樂團薄荷葉同壞女兒推出唱片。話做就做，呢隻小白兔果然唔簡單。
編號WWR01嘅《涼》，係來自台北嘅薄荷葉嘅處女專輯。組成於1997年，前身為「去死去死合唱團」（好勁嘅樂隊名）嘅薄荷葉，創作大腦為主音小倩，佢同時負責彈結他。其他成員還包括鼓手君霞、結他手鍾語桐（佢亦係台灣另一支樂隊88顆芭樂籽嘅成員）、低音結他手冠伶（已離隊，現由壞女兒成員戴子補上）。
基本上，你可以話薄荷葉係一隊屬於主音小倩嘅樂隊。修讀中文系嘅她，筆下歌詞充滿年輕人多愁善感嘅憂鬱情緒，用詞亦帶有濃濃文學色彩，例如開場曲《落雪》對冬日意境嘅描寫：「空氣如此冷冽／憂鬱侵襲著指尖／抓住紛亂的細雪／一眨眼卻看不見」；又或《茄子》」一曲中嘅異端愛情故事：「今天的茄子看起來很美味／我會好好的吃光它／因為這是妳的肉妳的血」。不過更多時候，小倩嘅歌詞都是有關成長 / 存活嘅無助及質疑，筆者唔想曲解佢嘅歌詞真正意思，但當你聽過《夠了》、《存在 / 被遺忘》、《19歲》後，或者你都能夠大概明白小倩嘅私密心情，就好似日記內容浮現喺你面前。
如果小倩嘅旋律歌詞係薄荷葉嘅靈魂所在，咁靈魂嘅一層音樂外衣，相形之下無疑較薄弱。現階段薄荷葉最大問題係音樂嘅表達能力，好似《落雪》嘅爽勁Brit-Pop樂風卻同歌詞好唔夾；佢哋似乎仍未摸索到自己嘅音樂取向，於是喺專輯入面，我哋仲可聽到懷舊搖滾嘅《夠了》、Post-Punk嘅《狗臉的歲月》、Punk嘅《存在 / 被遺忘》同《惡魔入侵綿羊島》，亦有Acoustic Ballad《看你睡我很高興》。樂風嫌雜亂，未能串連起成張專輯嘅起承轉合。簡單嚟講，薄荷葉仍未搵到佢哋嘅Identity，就好似小倩仍然努力追尋自己嘅存在意義一樣。
小白兔橘子旗下另一隊嚟自高雄嘅六人樂隊壞女兒，男女成員剛好各佔一半，女嘅分別係外貌酷似彭鈴嘅主音香菇、低音結他手戴子及剛赴美國進修嘅小倩（唔係薄荷葉嗰位）；男嘅包括鍵琴手蘑菇、鼓手Losie及新結他手小姚。
如要同薄荷葉相比，壞女兒嘅音樂簡單清晰得多，帶點點民歌嘅旋律同飄緩電結他編曲，可以將佢哋歸納為Sad-Core音樂類別。試聽聽處女專輯《沒有毛的熊》內第一首《天使》，歌曲中嘅結他同手風琴彈奏，仲有香菇嘅甜美嗓子，會唔會令你諗起Mazzy Star？其他如《上下左右》、《27》、《壞了》等等，都係帶點傷感嘅慢歌，配合簡單但真摯嘅歌詞內容，令人聽得窩心。
筆者亦好鍾意《登登等》活潑可愛嘅編曲，而《Cm Dream》與《Mosquito》吵耳得嚟亦好溫柔，原來壞女兒一開始係聽Nirvana嗰種Grunge音樂呢！蘑菇嘅搶耳鍵琴彈奏，可以話係樂隊嘅特點所在，而客串打鼓嘅前甜梅號鼓手柚子（嗰時Loise仲未加入），佢一手花俏鼓擊，的確令專輯生色不少！其實，壞女兒嘅音樂一啲都唔石破天驚，不過能用唱出呢一種類型嘅音樂，而且水準亦相當唔錯，實在值得鼓勵及聆聽。佢哋仍有好多進步空間，努力慢慢嚟！
往後日子，小白兔橘子仲會推出主人Nipples，以及另一隊台灣Post-Rock樂隊八厘米天空嘅專輯。11月份，佢哋會邀請美國後搖滾樂隊Explosions In The Sky嚟台灣演出，薄荷葉稍後亦會跟隨椎名林檎作亞洲巡迴演唱，一眾小白兔正開始忙得樂不可支，玩音樂至此，筆者亦為佢哋高興！
我所理解嘅壞女兒
「也許天使也會偷偷哭泣／沒有光圈／沒有翅膀／脆弱的／像所有人類一樣…… ～《天使》」
壞女兒俾我嘅第一個感覺，係嚟自《天使》呢首歌，美麗而哀愁，天空剛落完雨，雨滴喺屋簷前，一顆一顆落下，好輕易滲進我心。點解音樂時常都可以如此簡單，但動容？呢一首歌，我好想好想能夠多啲人聽到，所以我喺呢度寫啊寫。如果我哋唔再見面，咁《天使》會唔會成為一首你永遠無聽過嘅動聽嘅歌？
「我站在高聳的大樓上跳了下來／擺動雙臂身體飄浮起來／風吹耳際好像好像玩耍中的小孩／沒有重心的感覺好愉快…… ～《飄》」
我知道，係關於尋死嘅。面對住呢個令人沮喪嘅世界，我聽見，Shed Seven喺地球另一邊和應著：「Are you going to follow me? I'm going to jump off the bridge…… ～《Song Seven》」
