（原文刊登喺2002年《mcb》，現版本稍作修改。圖片由Fosca提供、John Clare攝影）
籌備呢篇訪問時候，我好驚。Dickon Edwards從來係影響我好深嘅音樂人，由以前嘅Orlando到而家嘅Fosca，一直都係。通常，訪問目的，係要令讀者更認識樂手 / 樂隊嘅音樂；但我好驚，好驚進一步認識Dickon。認識可以令所有嘢搞清楚，但我記得陳珊妮講過：「如果一切都能弄清楚，人又哪來這些美麗的執迷。」
Fosca係Dickon Edwards離開Romo組合Orlando後組成嘅樂隊，成員曾包括前Brighter低音結他手Alex Sharkey，佢哋喺2000年推出處男專輯《On Earth To Make The Numbers Up》。不過隨住舊年Alex離隊，Fosca由兩男兩女變為一男三女陣容，由Dickon負責主唱同填詞、Sheila B負責Cello、Rachel Stevenson同新隊員Kate Dornan負責Keyboard同和唱。透過電郵訪問，Dickon同我分享樂隊呢段日子以嚟嘅人事變動。
一男三女新陣容
「Alex係喺去年年尾推出細碟《Spuine On The Astroturf》後離隊，因為佢好清楚已好難再同我合作。不過我哋係喺和平氣氛下分手。至於Kate，佢嚟自曼徹斯特。同你一樣，佢都係Orlando同Fosca嘅歌迷，並曾幫助Fosca設計官方網頁。我哋一直有保持聯絡，後嚟佢搬嚟倫敦攻讀音樂，我知道佢有一定音樂底，便請佢加入樂隊。」
做最好嘅流行音樂
Fosca剛推出第二張專輯《Diary Of An Antibody》，大部份歌曲只有3至4分鐘長，同上張專輯以長篇作品為主嘅取向截然唔同，你哋係刻意咁做嗎？
「無錯！上張專輯，我係先寫好歌詞（通常好長），然後先研究配乜嘢音樂。今次我哋就一心製作一張好Pop嘅唱片，就好似某張Greatest Hits專輯，每首歌都係細碟！製作上唔似昔日由我同Alex獨攬大權，3位女隊員都有參與歌曲創作同編曲，同以往嘅Fosca十分唔同！當然，歌詞仍然由我一手包辦！」
《Diary Of An Antibody》10首曲目加埋只得33分鐘長度，初次聽的確覺得短咗啲。但睇返昔日Fosca嘅出色作品如《The Agony Without The Ecstasy》、《Spuine On The Astroturf》等，都係短小精桿歌曲，有啲電子、有啲結他，構成一種Fosca獨有嘅青澀電子小品風格。新專輯入面，便意圖將這呢風格繼續發揚光大。
雖然早前嘅熱身細碟《Secret Crush On Third Trombone》有啲失手，但環顧成隻《Diary Of An Antibody》，佳作的確唔少。 《Idiot Savant》一氣呵成嘅旋律同電子節拍、《Oh Well There's Always Reincarnation》嗰啲輕挑電結他彈奏同幽默歌詞一拍即合，仲有《I'm On Your Side》延續《Spuine On The Astroturf》嘅青澀味道，佢哋嘅和唱部份亦比以前更和諧動聽。《The Director's Cut》同《Letter To Saint Christopher》係唔錯嘅Sythn-Pop / Electro-Pop作品，尤其鍾意後者尾段好80年代嘅電結他Solo！
做有內涵嘅流行音樂
「我本身都好鍾意Sythn-Pop，好多樂評亦將Fosca歸納為呢種音樂類別，基本上我唔係太抗拒。但如果你細心聽，我哋採用嘅樂器除電子鍵琴外，仲有Cello、結他、鋼琴、豎笛等等，所以你唔能夠武斷界定我哋嘅音樂風格。如果真係要形容，我會話Fosca嘅音樂係『有內涵嘅流行音樂』（Pop music that means something）！」
從Orlando到Fosca，我一直都係咁認為，全因Dickon嘅歌詞。如果聽Fosca而唔細讀佢嘅歌詞，實在太浪費喇。譬如單係睇《Idiot Savant》歌名（笨蛋博士），大概你都估到呢首歌會係一個失敗者嘅故事：「You say your main bugbear's the way that underwear is taken down and used against you」。《Oh Well There's Always Reincarnation》喺幽默用詞背後，卻隱隱表達出Dickon對人世嘅厭倦：「I hope that reincarnation gives me a miss」。而《The Director's Cut》（The Popular print leaves me out of the luck. When do I get my director's cut?）同《Universal Gatecrasher》（You're out of place, you're out of favour, every single place you go）呢兩首歌歌詞，似乎更體現出Dickon同呢個世界係點樣格格不入。所以我同佢講，如果我哋活喺另一個世界，咁Fosca將會係嗰個世界最受歡迎嘅樂隊！
另一個世界最偉大嘅樂隊
「哈哈！你講得無錯！Fosca係世上最偉嘅樂隊！只可惜我哋生活喺錯誤嘅世界中！其實我嘅歌詞並唔算太消沉沮喪，佢哋只係表達我生活上一啲感受。我所希望嘅係，就算大家唔明白，甚或唔鍾意我嘅歌詞都好，但Fosca嘅音樂非常輕盈簡單、旋律亦出色，起碼純綷喺音樂層面，都可以令聽者投入享受其中，隨歌起舞！」
同Dickon講我最鍾意嘅歌曲，係專輯唯一慢板《I Know I Have Been Happier》。淡淡嘅鋼琴彈奏同Dickon真摯嘅演譯，歌詞係佢一直以嚟對成長多愁善感嘅疑問：「And though I don't mind the night outside, the inside one I mind / I know I could have you on a plate. But my room is such a state. And My heart is too」。隨後送上傷感嘅長笛吹奏作結，係有啲煽情，但，呢首可以話係Fosca自《Weightless》（《The Agony Without The Ecstasy》細碟B-side作品）以嚟最動容嘅歌曲啊。
「好高興你鍾意呢首歌，佢係一首好靚嘅慢板。歌詞描寫嘅心情，我相信好多人都感受過。每個人總會有啲時候感到唔開心，覺得快樂正離佢哋而去。不過我最鍾意嘅係完場曲《Rude Esperanto》，我十分滿意呢首歌，無論喺音樂上、演譯上同歌詞上－－呢首更係有史以嚟我填得最好嚟歌詞！」
《Rude Esperanto》末段迴轉又迴轉嘅副歌編排，Dickon、Rachel同Kate重覆又重覆合唱。而我，仍諗緊歌詞嘅真正意思。不過，我有必要咁做咩？正如Dickon講，就算你唔明白，都可以跟隨Fosca嘅音樂起舞啊。就算你唔開心，咁都唔算係壞事啊（Feel good about feeling sad）。
失掉了快樂嘅快樂
真係當頭棒喝。我一直以為Dickon嘅歌詞充滿消沉沮喪，但佢並唔認同：「某程度上，我嘅歌詞甚至係樂觀，因為內容表達出人生活喺世上所遇到嘅種種困擾問題。而能夠勇於承認，並接受呢啲問題存在，咁唔係好好咩？」
我開始明白Fosca嘅音樂意義所在。我開始為Kate Dornan嘅冷冷外型打扮心生傾慕，佢同我一樣鍾意Orlando、Fosca，仲有Piano Magic。我諗起《Supine On The Astroturf》嘅副歌：「Let's show we've got some nerve」。我發現喺訪問入面，Dickon常常提到Naturally呢個字。我開始明白，無論生活開心或唔開心，甚至覺得存活喺世上只係為湊夠數，我哋都必須先承認自己嘅存在，然後其他所有嘢先可以成立。我想同Dickon講：「好好，原來我哋咁樣係好好。」
