（原文刊登喺2004年《mcb》，現版本稍作修改）
NyLas係台灣樂隊草莓救星分支，一女一男成員分別係主音腊筆、負責音樂嘅ARNY。佢哋啱啱贏得台灣FNAC舉辦嘅新秀音樂比賽冠軍，獲得出版唱片機會。碟內5首作品同樣由ARNY用電腦音樂軟件Reason製作，評判之一林強就擔任統籌同混音，並幫佢哋炮製一首Remix。
NyLas同我所認知嘅草莓救星好唔同。我所認知嘅草莓救星，樂觀、積極；雖然前路茫茫，但只要一步一步繼續行，漸漸會變得堅強。但，NyLas選擇停留係喺深夜裡，逃避白晝。嗰啲低緩嘅節拍、迷離嘅電子音效、重覆又重覆嘅旋律，就連腊筆嘅唱腔，都從未試過咁陌生神秘，仲有佢嘅歌詞："「It's worth to try to see the dark side of the moon」。唯有黑夜，先適合聆聽NyLas。戴上耳筒，扭大音量，你會聽到，自己心內邪惡一面，正隨住NyLas音樂起舞。然後，你會發現，邪惡並唔可怕，因為佢能為你帶嚟另一種快樂！
