（原文刊登喺2002年《mcb》，現版本稍作修改）
最近，腦裡成日有個夢，總係縈繞住我。我夢見一個女仔企喺我面前，耳邊傳嚟一首唔存在嘅歌叫《回想的你》。然後我跪下，唔知點解，嗰一刻感動莫名，眼淚係咁係咁流。
現實生活入面，總係無乜機會痛痛快快喊一場。不過，聽住Masha Qrella（Contriva結他手同Mina鍵琴手）嘅個人專輯《Luck》時候，嗰一刻真係令我感動莫名。碟入面嗰啲源自Contriva嘅乾澀結他掃撥、Mina嘅原始鍵琴彈奏，係我一直鍾意嘅嘢。仲有Masha輕柔嘅嗓子，低調唱住佢筆下一首首簡約旋律，令人產生無限思潮起伏。《I Want To Know》、《You Won't Be There》、《I Don't Like Her》都係結構簡單嘅美妙作品，少少流行曲味道，但更多時候好似Masha同我哋講緊佢生活入面一啲逸事，平淡而細膩。
主題曲《Luck》同《All She Feels Instead》喺編曲上更花心思，滿布KrautRock風格嘅鍵琴彈奏；《Hypersomnia》由Folky結他引入，最後同另一首《With Me》同樣變成機械化嘅電子曲調，處處引證Masha嘅音樂根源影響。結尾樂章分成兩部分，開首嘅《Insecure》擁有專輯少有嘅冷冷低調色彩，後半部嘅《Vertikal》，竟係一首簡陋的士高節拍樂章，配合左右穿插嘅刺激古怪電子聲效，中段仲加入好80年代嘅電結他彈奏，喜愛電子音樂嘅朋友，一定聽得興奮莫名。
我鍾意Masha Qrella，就係以上呢啲原因。聽住佢嘅音樂，好簡單、直接、純綷，屬於細水長流嘅感動，感覺係快樂嘅，只爭在無掉下快樂嘅眼淚。
